ኢስያሳ1

ገሉዋ

1ኦዝያነ፥ እዮኣታም፥ አካዝነ ህዝቂያስ ይሁዳ ካተቱዋ ግዴዳ ዎደ፥ አሞጻ ናአይ እስያስ ይሁዳባነ የሩሳላመባ በኤዳ ሳጻይ ሀዋ።

ጾሳይ ባረ አሳ ሴሬዳ

2ሳሎቱዋን ደእያዋንቶ፥ ስስተ፤ ሳኣን ደእያዋንቶ፥ ስስተ፤ አያዉ ጎፐ፥ መና ጎዳይ ሀዋዳን ያጌዳ፤ “ታን ናናቱዋ ድቻ ጋድ፤ ሽን ኡንቱንቱ ታዉ ማካሌድኖ።3ቦራይ ባረ ጎዳ ኤሬ፤ ሀሪካ ባረና ሞዴዳዋ ዛዳሉዋ ኤሬ፤ ሽን እስራኤላቱ ኤርክኖ፤ ታ አሳቱ አኬክክኖ።
4“ናጋራ ኦያ ካዉተዉ፥ ህንተ ናቁዋን ዴጸቴዳ አሳዉ፥ ኢታ ኦያ ዛርያዉ፥ ህንተ ማይዛቱዋ ቱናተ ካልያ ናቶ፥ ህንተንቶ አየ አና! መና ጎዳ ህንተ አጌድታ፤ እስራኤልያ ጌሻ ሸነዬድታ፤ አዉ ዞክያ ዛሬድታ።5ህንተ አያዉ ማካላ ቦላ ማካላ ጉጅ ጉጅ ቢቴ? አያዉ ቃይካ ሙረታናዉ ኮዪቴ? ህንተ ኩመን ሁጲ ሳከቴዳ፤ ህንተ ኩመን ዎዛናይካ ዳቡሬዳ።6ገድያ ብራያፐ ሁጲያ ብናና ጋካናዉ ፓጻተይ ባዋ፤ ማዱይ፥ ጋፉነ ጊይያባይ ደኤ፤ ኡንቱንቱነ ጊይበይክኖ፥ ዎይ ሜጨት ቃሸትበይክኖ፥ ዎይ ዛይትያን ኦከቲደ ሹግበይክኖ።
7“ህንተ ጋዲ ድርቃለቲደ ባያና፤ ህንተ ካታማቱካ ታማን ጹገቴድኖ፤ ህንተ ጎሻ ህንተ ጼልሽን፥ አላጋቱ አኪኖ፤ እማ አሳቱ፥ መላ አሻና።8የሩሳላመ ካታማይ ዎይንያ ቱራ ናግያ ዳስያዳን፥ ሌክያ ናግያ ጎልያዳን ሞርክያን ድረቴዳ ካታማዳን ሀኒደ አቴዳ።9ኡባፐ ዎልቃማ መና ጎዳይ ኑዉ አማሬዳ ዛራቱዋ አሸነንቶ፥ ኑን ሶዶማ ካታማዳንነ ጋሞራ ካታማዳን ሀኔዶሽን” ያጌዳ።
10ህንተኖ፥ ሶዶማ ሞድያዋንቶ ኡባቶ፥ መና ጎዳ ቃላ ስስተ! ህንተኖ፥ ጋሞራ አሳ ኡባቶ፥ ኑ ጾሳ ህግያ ስስተ!11መና ጎዳይ ሀዋዳን ያጌ፤ “ህንተ ያርሹዋ ዳሩ ታዉ አያ ጎኢ? ሀኖ ጋካናዉ ህንተ ታዉ ሺሼዳ ጹገቴዳ ኦርገ ዶርሳቱዋነ ኬዳ መህያ ሞዋ ያርሹዋ ታን ካላድ፤ ኮሩማ ቦራቱዋ፥ ዶርሳ ማራቱነ ዴሻቱዋ ሱን ታን ናሸትከ።12ህንተ ታዉ ጎይናናዉ ይያ ዎደ፥ ታ ጌሻ ጎልያ ዳባባ ህንተና የተ ጌዳዌ ኦኔ?13ስም ሀዳ ያርሹዋ አህያዋ አግተ! ህንተ ጩውስያ እጻናይ ታና ሸነዬ፤ አግና ጼሩዋ ህንተ ቦንችያ ጋላሳ፥ ህንተ ሳምባታነ ህንተ ኬሬዳ ያአቱዋ፥ ሀ ሺቃቱዋ ኡባ ኢታተና እትፐ ዋላከቴዳዋንታ ታን ዳንዳይከ።14አግና ጼሩዋ ህንተ ቦንችያ ጋላሳነ ኬረቴዳ ህንተ ባላ ጋላሳቱዋ ታን እጻድ፤ ኡንቱንቱ ታዉ ቶኩዋ ግዴድኖ፤ ታን ኡንቱንታ ቶካደ ዳቡራድ።
15“ህንተ ኩሽያ ምጪደ፥ ህንተ ዎስያ ዎደ፥ ታን ታ አይፍያ ህንተፐ ገንና፤ ህንተ ዳሮ ዎሳ ዎስንቶካ፥ ታን ስስከ፤ አያዉ ጎፐ፥ ህንተ ኩሺ ሱን ሙናቀቴዳ።16ሜጨትተ፤ ጌይተ፤ ህንተ ኢታ ኦሱዋ ታ ስንፐ ድግተ። ኢታ ኦያዋ አግተ፤17ሎኦባ ኦናዉ ታማርተ። ጽሎ ፕርዳ ኮይተ፤ ኡንኤቴዳዋንቱ ሞርግያ ኦይቂተ። አዉ ባይናዋንቶ ፕርድተ፤ አስናይ ሀይቄዳ ማጫ አሳቶ ሞተትተ” ያጌ።
18ቃይካ መና ጎዳይ፥ “ሃይተ፤ አነ ዞረቶይተ። ህንተ ናጋራይ ባራዳን ዞእንቶካ፥ ሻቻዳን ቦጻና፤ ሱዳን ዞእንቶካ፥ ፑቱዋዳን ቦጻና።19ህንተ ኤኖ ጊደ፥ ታዉ አዛዘቶፐ፥ ጋድያፐ ሞክያ ሙሩታ ማና።20ሽን ህንተ እጻድ ጊደ ማካሎፐ፥ ማሻን ሜተታና” ያጌ። መና ጎዳይ ባረ ዶናፐ ሀዋ ሃሳዬዳ።

ናጋራይ ኩሜዳ ካታማ

21አማነቴዳ ዎልቃማ ካታማታ ዋናደ ሻርሙጻ ግዳዴ! እዛ ካሰ ሱረ ፕርዳይ ኩሜዳኖ፤ ጽሎተይ ካሰ እ ግዶን ደኤዳ፤ ሽን ሀእ አሳ ዎያዋንቱ እዝ ግዶን ደኢኖ።22ነ ብራይ ሽእ ክቼዳ፤ ነ ሎኦ ዎይንያ ኤሳይካ ሃና ዬለቴዳ።23ህንተ ዳናቱ ማካላንቻቱዋነ ካይሶቱዋ ላገቱዋ ግዴድኖ፤ ኡንቱንቱ ኡባቱካ ማታይያ ዶሲኖነ ሚሻ የደርሲኖ፤ አዉ ባይናዋንቶ ፕርድክኖ፤ አስናይ ሀይቄዳ ማጫ አሳቱዋ ሞቱ ኡንቱንቱኮ ሺቀና።
24ሄዋ ድራዉ፥ ጎዳይ፥ ኡባፐ ዎልቃማ መና ጎዳይ፥ እስራኤልያ ዎልቃማይ፥ ሀዋዳን ያጌ፤ “ሀእ ታን ታና እጽያዋንቱፐ ሸምፓና፤ ታን ታ ሞርከቱዋ ቦላ ታ ሀሉዋ ከሳና።25ታን ታ ኩሽያ ነ ቦላ ዎና፤ ነ ሽኦዋ ቁልጹጽሳደ ጌሻና፤ ኔናና ዋላከቴዳባ ኡባ ጌሻደ የድሳና።26ታን በንዋንቱ ማላ ዳናቱዋ፥ ኮይሮዋንቱ ማላ ዞርያዋንታ ነዉ ዛራና። ሄዋፐ ጉይያን፥ ኔን ጽሎተ ካታማ፥ አማነቴዳ ካታማ ጌተታና” ያጌ።
27ጽዮኔ ሱረ ፕርዳን፥ ባረንቱ ናጋራ ፓጽያዋንቱካ ጽሎተን ዎዘታና።28ሽን ማካላንቻቱነ ናጋራንቻቱ ላኡካ መአና፤ መና ጎዳ አግያዋንቱ ያና።29ዎናዉ ዶሴዳ ዎላ ድራዉ፥ ህንተ ዬላታና፤ ህንተ ዶሬዳ ካሻ ግሻዉካ ህንተ ካዉሻና።30ቦንጪ ቆቆፈትያ ዎላዳን፥ ዎይ ዱቢ ባይና ሾይቃዳን፥ ህንተ ሀናና።31ምኑ ዳላ ግዳናዋ፤ አ ኦሱካ ጺፋ ግዳናዋ፤ ኡንቱንቱ እትፐ ጹገታናዋንታ፤ ሄ ታማ ቶይስያዌ ያና።

The Word for the World International

https://app.library.bible/content/812ecd29a9e60fdc