2 ቆሮንቶሳ13
ዉርሰ ዞርያነ ሳሮታ
1ሀዌ ታዉ ህንተኮ ዩሳይ ሄዘን ዎደ። አይ ሞቱካ ላኡ ዎይ ሄዙ ማርካይ ማርካትና ፕርደታናዉ ኮሼ።2ታን ላኤንዋ ህንተናና ጋከቴዳ ዎደ፥ ህንተና ናገትተ ጋድ፤ ሀእካ ሃኩዋን ደኦፐካ፥ ህንተና ናገትተ ጋይ። ታን ቃይካ ህንተኮ ብያ ዎደ፥ ናጋራ ካሰ ኦዳዋንታካ ቃይ ሀራቱዋ ኡባቱዋካ ሙረናን አግከ።3አያዉ ጎፐ፥ ክርስቶስ ታ ባጋና ሃሳይያዋ ኤርስያዋ ህንተ ኮዪታ። እ ህንተናና ሃሳይያ ዎደ አ ዎልቃፐ አትን ቤትያዌ አ ዳቡራ ግደና።4አያዉ ጎፐ፥ ክርስቶስ ማስቃልያ ቦላ ምስማርያን ሸቲደ፥ ዳቡራን ካቀቴዳ፤ ሽን ጾሳ ዎልቃን ፓጻ ደኤ። አያዉ ጎፐ፥ እ ዳቡራንቻ ግዴዳዋዳን፥ ኑንካ ዳቡራንቻ፤ ሽን ህንተናና ሃሳይያዋን ኑን ጾሳ ዎልቃን አናና ደአና።5አማኑዋን ህንተ ምን ደእንቶ አነ ህንተና ፓጭተ፤ ህንተና ብድተ። ክርስቶስ ህንተናን ደእያዋ ህንተ ኤርክቴ? ሄዌ ዮፐ ፓጭያን ኩንዴድታ ጉሳ።6ኑን ፓጭያን ኩንድቤናዋ ህንተ ኤርያዋ አማናይ።7ህንተ ኢታባ ሙለካ ኦና ማላ፥ ኑን ጾሳ ዎሴቶ። ኑን ፓጭያ ዳንዳይያዋንታ ግዲደ ቤታናሳ ግደና፤ ሽን ኑን ፓጭያ ዳንዳየናዋንታ ማላቲደ ቤቶፐካ፥ ሎኦባ ህንተ ኦናሳ።8አያዉ ጎፐ፥ ኑን ቱሙዋ ጻላላዉ ኦናፐ አትን፥ ቱሙዋፐ ሀራ አይነ ኦናዉ ዳንዳዮኮ፤9ኑን ዳቡራንቻ ሽን ህንተ ዎልቃማ ግዶደ ናሸቴቶ። ህንተ ፖሎ ግዳና ማላ ኑን ጾሳ ዎሴቶ።10ታን ህንተፐ ሃኩዋን ደኣደ ጻፌዳዌ ሄዋ ድራሳ፤ ታን ህንተኮ ብያ ዎደ፥ ጎዳይ ታዉ እሜዳ ማታን ዘምፓደ፥ ህንተና መቶናዉ ታና ዋዪ ኮሻና። ሄ ማታይ ታን ህንተና ኬጻናዉ ታዉ እመቴዳዋፐ አትን፥ ህንተና ኮላናዉ እመትቤና።11ዉርሰን ታናዳን ጾሳ ካልያዋንቶ፥ ሳሮ ደእተ፤ ባል ባይናን ደእተ፤ ታ ዞርያ ስስተ፤ እት ዎዛና ግዲደ ደእተ፤ ሳሮተን ደእተ። ሲቁዋነ ሳሮተ ጾሳይ፥ ህንተናና እትፐ ደአና።12እቱ እቱዋና ጌሻ የረታ የረቲደ ሳሮተትተ።13ጾሳ አሳ ኡባቱ ህንተና ሳሮ ሳሮ ጊኖ።14ጎዳ የሱስ ክርስቶሳ አ ኬካተይ፥ ጾሳ ሲቁ፥ ጌሻ አያና እትፐተይ ህንተናና ኡባና ግዶ። አመንእ።The Word for the World International