2 ኦዱዋ34
ይሁዳ ካትያ ዮስያሳ
1ዮስያሰ ካተትያ ዎደ፥ ላይይ አዉ ሆስፑና፤ እ የሩሳላመን ሀታማነ እት ላይ ካተቴዳ።2ዮስያሰ መና ጎዳ ስንን ሱረባ ኦዳ፤ ኡሸቻ ሀድርሳ ጌናን፥ ባረ ማይዛ አዉዋ ዳዊታ ኦግያን ሀመቴዳ።ዮስያሰ ኤቃዉ ጎይንያ ሳአቱዋ ይሴዳ
3እ ካተቴዳ ሆስፑን ላይን ብሮ ያላጋ ደኢደ፥ ባረ ማይዛ አዉዋ ዳዊታ ጾሳዉ ጎይናናዉ ዶሜዳ፤ ቃይካ እ ካተቴዳ ታማነ ላኤን ላይን ይሁዳንነ የሩሳላመን ደእያ ጎይንያ ቃ ሳአቱዋነ አሼሮ ግያ ጾሳት ምስለቱዋነ ማስ ጊግሴዳነ ሲልሴዳ መዳ ምስለቱዋ ይስያዋ ዶሜዳ።4እ ኤቂደ አዛዝና፥ ባኣላዉ ያርሽያ ሳኣ ላሌድኖ፤ ኡንቱቱፐ ቦላና ደእያ እጻና ጩዋይያዋንታካ ቃንጸሬድኖ። አሼር ምስለቱዋ፥ ማስ ጊግሴዳ ኤቃቱዋነ ሲልሴዳ መዳ ምስለቱዋ ክንቼሬ ሊቅሲደ፥ ለ ከሴድኖ፤ ያቲደ ሄ ልያ ኡንቱንቶ ጎይንያ አሳቱዋ ዱፉዋን ላሌድኖ።5ቃይ ዮስያሰ ኡንቱንቱ ቄሳቱዋ መቀ ሄ ያርሽያ ሳአቱ ቦላን ጹጌዳ፤ ያቲደ ይሁዳነ የሩሳላመ ጌሼዳ።6ምናሰ ቢታን፥ ኤፍሬማ ቢታንነ ስሞና ቢታን፥ ቢደ ንፍታሌማ ጋድያ ጋካናዉ ደእያ ካታማቱዋነ ባዬዳ ሳኣ ኡባ ሄዋዳን ኦደ ጌሼዳ።7ዮስያሰ ያርሽያ ሳኣ ላሌዳ፤ አሼር ምስለቱዋካ ሀራ ኤቃ ምስለቱዋካ ክንቼሬደ ሊቅሴዳ። እስራኤልያ ቢታን ኡባን እጻና ጩዋይያባቱዋ ኡባ ቃንጸሬዳ። ሄዋፐ ጉይያን፥ ዮስያሰ የሩሳላመ ስሜዳ።ጾሳ ህግያ ማጻፋይ ቤቴዳ
8ዮስያሰ ካተቴዳ ታማነ ሆስፑን ላይን፥ ጋድያነ ጌሻ ጎልያ ጌሼዳዋፐ ጉይያን፥ መና ጎዳ ባረ ጾሳ ጌሻ ጎልያ ኦራጽሳና ማላ፥ አጻልያ ናኣ ሳፋና፥ የሩሳላመ ካታማ ሞድያ ማእሴያነ ዮአካዛ ናኣ፥ ዋና ጻፍያ ዮኣሀ ኪቴዳ።9ኪተቴዳዋንቱ ቄሰ ኡባቱዋ ካፑዋ ህልቂያኮ ዬድኖ። ፐንግያ ናግያ ሌዋቱ ምናሰፐ፥ ኤፍሬማፐ፥ አቴዳ እስራኤልያ አሳ ኡባፐ፥ ይሁዳፐ፥ ቢንያመፐነ የሩሳላመን ደእያዋንቱፐ ካሰ ሺሺደ፥ ጾሳ ጌሻ ጎልያ አሄዳ ሚሻ ህልቂያዉ እሜድኖ።10ሄዋፐ ጉይያን፥ ኡንቱንቱ መና ጎዳ ጌሻ ጎልያ ኦራስያ ካፓቶ እሜድኖ። ኡንቱንቱ ጌሻ ጎልያ ኦራጽሳናዳንነ ዎ የጊደ ኬጻናዳን ኦሳንቻቶ እሜድኖ።11ቃይ ይሁዳ ካተቱ ባይዝሴዳ ጌሻ ጎልያ ሎይሳናዉ ሄ ሻሉዋን አናጸቱነ ግምቢያዋንታ ምነ ሹቻ ሻማናዳን እሜድኖ።12ኦሱዋ ኦያ አሳቱ አማነቴዳዋንታ። ኡንቱንቱ ቦላ ሱንቴዳ ኦይዱ ሌዋቱ፥ ማራራ ያራፐ ያሃታነ ኦባድያነ፥ ቃሃታ ያራፐ ማሹላማነ ዛካራሳ። የ ሚሻ ኤርያ ሌዋቱ ኡባይ13ቶክያ አሳቱዋ ቦላነ ዱማ ዱማ ኪታ ኦያዋንቱ ቦላ ሱንቴድኖ። ቃይ ሀራ ሌዋቱ ጻፈቱዋ፥ ካፓቱዋነ ፐንግያ ናግያዋንታ ግዴድኖ።14ኡንቱንቱ መና ጎዳ ጌሻ ጎልያ ዬዳ ሻሉዋ ከስያ ዎደ፥ ቄሲ ህልቂ መና ጎዳይ ሙሴ ባጋና እሜዳ ህግያ ማጻፋ ደሜዳ።15ህልቂ ዋና ጻፍያ ሳፋና፥ “ታን መና ጎዳ ጌሻ ጎልያፐ ህግያ ማጻፋ ደማድ” ያጌዳ። ሄ ማጻፋ ሳፋናዉ እሜዳ።16ሳፋን ሄ ማጻፋ ካትያኮ አሂደ፥ “ነ ኦሳንቻቱ አዛዘቴዳ አዛዙዋ ኡባ ኦኖ።17መና ጎዳ ጌሻ ጎልያን ደእያ ሻሉዋ ዉርስ አኪደ፥ ኦራስያ ካፓቶነ ኦራያ ኦሳንቻቶ እሜድኖ” ያጊደ ኦዴዳ።18ቃይካ ዋና ጻፊ ሳፋን ካትያ፥ “ቄሲ ህልቂ ታዉ ማጻፋ እሜዳ” ያጌዳ፤ ሳፋን ማጻፋ ካትያ ስንን ናባቤዳ።19ካቲ ህግያ ቃላ ስሴዳ ዎደ፥ ካዮቲደ ባረ ማዩዋ ፔዳ።20ሄዋፐ ጉይያን፥ ካቲ ህልቂያ፥ ሳፋና ናኣ አህቃማ፥ ምካያ ናኣ አብዶና፥ ዋና ጻፍያ ሳፋናነ ካትያ ኦሳንቻ አሳያ ሀዋዳን ያጊደ አዛዜዳ፤21“ቢተ፤ ቢደ ታ ድራዉነ እስራኤልያንነ ይሁዳን አቴዳዋንቱ ድራዉ፥ ሀ ቤቴዳ ማጻፋ ቃላዋ አነ መና ጎዳ ኦችተ። አያዉ ጎፐ፥ ሀ ማጻፋን ጻፈቴዳ ኡባባ ኦናዉ፥ ኑ ማይዛ አዎቱ መና ጎዳ ቃላ ናግቤና ድራዉ፥ ኑ ቦላ ትገቴዳ መና ጎዳ ሀንቁ ሎይ ዳሮ” ያጌዳ።22ህልቂነ ካቲ ኪቴዳ አሳቱ ትምቢትያ ኦድያ ሁልድኮ ቤድኖ። ሁልዳ ሀርሃሳ ናኣ ቲቅዋ ናኣ፥ ጌሻ ጎልያ ማዩዋ ናግያ ሻሉማ ማቻቶ። አ የሩሳላመን ላኤን ሹቻን ደኣዱ። ሄ ቤዳ አሳቱ እዝዉ ሀ የዉዋ ኦዴድኖ። 23ሁልዳ ኡንቱንታ፥ “መና ጎዳይ እስራኤልያ ጾሳይ፥ ‘ህንተና ታኮ ኪቴዳ ብታንያዉ ኦድተ’ ያጌ።24መና ጎዳይ ሀዋዳን ያጌ፤ ‘በእተ፥ ይሁዳ ካትያ ስንን ናባበቴዳ ማጻፋን ጻፈቴዳ ኢታ ሸቃ ኡባ፥ ሀ ሳኣ ቦላነ ሀ ሳኣን ደእያ አሳ ቦላ አሀና ሀናይ።25ኡንቱንቱ ታና አጊደ፥ ሀራ ጾሳቶ እጻና ጩዋዬድኖ፤ ያቲደ ኡንቱንቱ ባረንቱ ኩሽያን ኦዳዋን ኡባን ታና ሀንቀድኖ። ሄዋ ድራዉ፥ ታ ሀንቁ ሀ ሳኣ ቦላ ትገታና፤ እ ኡባካ ተኤተና’ ያጌ።26“መና ጎዳ ኦቻናዉ ህንተንታ ኪቴዳ ይሁዳ ካትያ ሀዋዳን ያግተ፤ ‘መና ጎዳይ እስራኤልያ ጾሳይ ኔን ስሴዳ ቃላዋ ሀዋዳን ያጌ፤27“ሀ ሳኣ ቦላነ ሀ ሳኣን ደእያ አሳ ቦላ መና ጎዳይ ሃሳዬዳዋ ኔን ስሴዳ ዎደ፥ ነ ዎዛናይ ሹግና፥ ታ ስንን ነ ሁጲያ ካዉሼዳ ድራዉነ ነ ማዩዋ ፔደ፥ ታ ስንን ዬኬዳ ድራዉ፥ ታን ነ ዎሳ ስሳድ።28ሄዋ ድራዉ፥ ታን ኔና ነ ማይዛን ጋና፤ ኔን ሳሮ ሞገታና። ታን ሀ ሳኣ ቦላነ ሀ ሳኣን ደእያ አሳ ቦላ አሀና ኢታባ ነ አይፊ በኤና” ያጌ’ ያግተ” ያጋዱ።ሄዋፐ ጉየ ኡንቱንቱ ቢደ፥ ሀ ሃሳየቴዳባ ካትያዉ ኦዴድኖ።
ዮስያሰ ጾሳዉ አዛዘታናዉ ገፔዳ
29ሄዋፐ ጉይያን፥ ካቲ ዮስያሰ ኪቲደ፥ ይሁዳ ጭማቱዋነ የሩሳላመ ጭማቱዋ ኡባ ሺሼዳ።30ካቲ መና ጎዳዉ ጌሻ ጎልያ ፑደ ከሴዳ፤ ይሁዳ አሳይ ኡባይ፥ የሩሳላመን ደእያ አሳይ፥ ቄሳቱ ነ ሌዋቱ፥ ጉፐ ዳሩዋ ጋካናዉ ደእያ አሳይ ኡባይ አናና እትፐ ፑደ ከሴድኖ። መና ጎዳ ጌሻ ጎልያፐ ቤቴዳ ቃላ ጫቁዋ ማጻፋ ቃላ ኡባ ካቲ ኡንቱንቱ ስስሽን ናባቤዳ።31ሄዋፐ ጉይያን፥ ካቲ ባረ ሳኣን ኤቂደ፥ መና ጎዳ ኦግያን ሀመታናዉነ መና ጎዳ ህግያ፥ አ ዎጋነ አ አዛዙዋ ባረ ኩመን ዎዛናንነ ባረ ኩመን ሸምፑዋን ናጋናዉ፥ ቃይ ሀ ማጻፋን ጻፈቴዳ ጫቁዋዳን ኦናዉ ጾሳ ስንን ገፔዳ።32የሩሳላመንነ ቢንያማን ደእያ አሳ ኡባ ሄ ቃላ ጫቁዋ ናጋናዳን ገፍሴዳ፤ የሩሳላመን ደእያ አሳይ ጾሳ፥ ባረንቱ ማይዛ አዎቱዋ ጾሳ ጫቁ ግያዋዳን ኦድኖ።33ዮስያሰ እስራኤልያ አሳዉ ደእያ ጋድያፐ ቱናባ ኡባ ድጌዳ። ያን ደእያ ኡባቱ መና ጎዳዉ፥ ባረንቱ ጾሳዉ፥ ኦናዳን ኦዳ። ዮስያሰ ደኤዳ ላይ ኡባን፥ ኡንቱንቱ መና ጎዳ ባረንቱ ማይዛ አዎቱዋ ጾሳ ካልያዋ አግበይክኖ።The Word for the World International