2 ኦዱዋ32
አሶረቱ የሩሳላመ ኦላናዉ ናሴድኖ
1ካቲ ህዝቂያሰ ጾሳዉ አማነቲደ ኦዳ ሀ ኦሱዋፐ ጉይያን፥ አሶረ ካቲ ሳናክሬበ ይሁዳ ጋድያ ቦላ ዶዴዳ፤ ባረዉ ኦይቃናዉ ቆፒደ፥ ግምበቱ ኡቴዳ ካታማቱዋ ዶዴዳ።2ሳናክሬበ የሩሳላመን ኦላናዉ ዬዳዋ ህዝቂያሰ በኤዳ ዎደ፥3ካታማፐ ካረና ጎግያ ፑልቱዋ ሃ ዜራናዉ ባረ ኦሳንቻቱዋነ ባረ ምኖ አሳቱዋ ዞረታ በሴዳ፤ ኡንቱንቱ አ ማዴድኖ።4ሄዋ ድራዉ፥ ኡንቱንቱ ዳሮ አሳ ሺሺደ፥ ሄዋ ሄራን ደእያ ፑልቶቱዋ ኡባነ ጎግያ ሻፋ ባሬድኖ። “አሶረ ካተቱ ዪደ፥ አያ ሃነ ደሞፕኖ” ያጌድኖ።5ሄዋፐ ጉይያን፥ ህዝቂያሰ ምን ኦደ፥ ላለቴዳ ድርሳ ግምቢያ ኡባ ዛረደ ግምቤዳ፤ ያቲደ አ ቦላ አዱሳ ግምቢያ ግምቤዳ። ሄ ድርሳ ግምቢያፐ ካረ ባጋና ሀራ ድርሳ ግምቢያ ግምቤዳ፤ ቃይ ዳዊታ ካታማን ደእያ ሚሎ ግያ ሳኣ ምንሴዳ። ዳሮ ኦላ ሚሻካ ጎንዳልያካ መዳ።6ያቲደ ኦላንቻቱ ካፓቱዋ አሳ ቦላ ሱንዳ፤ ኡንቱንቱ ኡባ ካታማ ፐንግያ ኤለካ ደእያ ጉታራን ሺሺደ፥7“ሀያና ምንተ! አሶረ ካትያና ደእያዋፐ ኑናና ደእያዌ አ። ሄዋ ድራዉ፥ አሶረ ካትያዉነ አናና ደእያ ዳሮ ኦላንቻቶ ያዮፕተ! ዳጋሞፕተ!8አናና አሳ ዎልቃይ ደኤ፤ ሽን ኑናና መና ጎዳይ ኑ ጾሳይ ኑና ማዳናዉነ ኑዉ ኦለታናዉ ደኤ” ያጊደ ኡንቱንታ ምንዳ። ይሁዳ ካቲ ህዝቂያሰ ሃሳዬዳባን አሳይ ምነቴዳ።9ሄዋፐ ጉይያን፥ አሶረ ካቲ ሳናክሬበ ባረ ኦላንቻቱ ኡባና እትፐ ላክሻ ካታማ ዶድሽን፥ ይሁዳ ካትያ ህዝቂያሳኮነ የሩሳላመን ደእያ ይሁዳ አሳ ኡባኮ፥ ኦሳንቻቱዋ ኪቴዳ።10ሄዌኔ፥ “አሶረ ካቲ ሳናክሬበ፥ ‘ህንተኖ፥ ሀ ዶደት ኡቴዳ የሩሳላመ ካታማን ደእያ አሳቶ፥ ኦናን አማነቴድቴ?11ህዝቂያሰ ህንተንታ፥ “አሶረ ካትያ ኩሽያፐ መና ጎዳይ ኑ ጾሳይ ኑና አሻናዋ” ያጌ፤ ሽን እ ህንተንታ ሄዋዳን ባለደ፥ ኮሻንነ ሳሙዋን ዎናዉ ሀኔ።12ሀ ጾሳቶ ጎይንያ ቃ ሳአቱዋነ ያርሽያ ሳኣ ድጊደ፥ ይሁዳነ የሩሳላመ አሳ፥ “ህንተንቱ እት ያርሽያ ሳኣ ስንን ጎይንተ፤ ቃይ ህንተንቱ ያርሹዋካ አ ቦላ ጹግተ” ያግያዌ ሀ ህዝቂያሳ ግደኔ?13“ ‘ታንነ ታ አዎቱ ሀራ ካዉተቱ አሳ ኡባ ቦላ ኦዳዋ ህንተንቱ ኤርበይክተ? ሄ ካዉተቱ ጾሳቱ ባረንቱ ጋድያ ታ ኩሽያፐ አሻናዉ ዳንዳዬድኖ?14ታ አዎቱ ይሴዳ ሀ ካዉተቱ ጾሳቱዋ ኡባ ግዶን ባረ አሳ ታ ኩሽያፐ አሻናዉ ዳንዳዬዳዌ ኦኔ? ያትና፥ ህንተንቱ ጾሳይ ህንተንታ ታ ኩሽያፐ ዎት አሻናዉ ዳንዳዪ?15ሄዋ ድራዉ፥ ሀእካ፥ ህዝቂያሰ ህንተንታ ባለፖ ዎይ ሀዋዳን ጭሞፖ። ህንተንቱ ህዝቂያሳ አማኖፕተ። አያዉ ጎፐ፥ አ አሳ ታ ኩሽያፐ ዎይ ታ አዎቱዋ ኩሽያፐ፥ ጋደ አሳ ጾሳቱ ዎይ ካዉተ ጾሳቱ አሻናዉ ዳንዳይበይክኖ። ያትና፥ ሄዌ ህንተንቱ ጾሳይ ህንተንታ ታ ኩሽያፐ አሻናዉ ዋን ዳንዳዪ?’ ያጌ” ያጌድኖ።16ሳናክሬባ ኦሳንቻቱ መታ ኡባ ጎዳ ቦላነ አ ቆማ ህዝቂያሳ ቦላ ሀራ ጮራባካ ሃሳዬድኖ።17ሳናክሬበ ቃይካ መና ጎዳ እስራኤልያ ጾሳ ቅሊጫናዉነ አ ቦላ ሃሳያናዉ ዳብዳቢያ ጻፊደ፥ “ሳኣ ቦላን ደእያ ካዉተቱ ጾሳቱ ባረንቱ አሳ ታ ኩሽያፐ አሽቤናዋዳን፥ ህዝቂያሳ ጾሳይካ ባረ አሳ ታ ኩሽያፐ አሸና” ያጊደ ጻፌዳ።18ሳናክሬባ ኦሳንቻቱ ካታማ ኦሞዳናዉ ኮዪደ፥ ድርሳ ግምቢያ ቦላ ኡቴዳ የሩሳላመ አሳ ያሽሳናዉነ ዳጋንናዉ ባረንቱ ቃላ ቁ ኦደ፥ እብራዌዋን ኡንቱንቱ ቦላ ዋሴድኖ።19አሳ ኩሽያን ኦሰቴዳ፥ ሀ ሳኣን ደእያ ሀራ አሳቱዋፐ ጾሳቱዋ ቦላ ሃሳይያዋዳን፥ የሩሳላመ ጾሳ ቦላካ ሃሳዬድኖ።20ሄዋፐ ጉይያን፥ ካቲ ህዝቂያስነ አሞጻ ናአይ፥ ትምቢትያ ኦድያ እሳያሰ ሀዋ ድራዉ፥ ጾሳ ዎሴድኖ፤ ኡንቱንቱ ሳሉዋ ፑደ ዋሴድኖ።21አሶረ ካቲ ዱንካኔዳ ሳኣን ደእያ ኦላንቻቱዋ ኡባቱዋ፥ ጋዳዋቱዋነ ካፓቱዋ ይስያ ኪታንቻ መና ጎዳይ ኪቴዳ። ሄዋ ድራዉ፥ አሶረ ካቲ ካዉሺደ፥ ባረ ጋድያ ስሜዳ። ስሚደ፥ ባረ ጾሳ ጎልያ ገሌዳ ዎደ፥ አ ናናይ አ ሄ ሳኣን ማሻን ዎድኖ።22ሄዋዳን ኦደ፥ መና ጎዳይ ህዝቂያሳነ የሩሳላመን ደእያ አሳ አሶረ ካትያ ሳናክሬባ ኩሽያፐነ ሀራ ሞርከቱዋ ኡባቱዋ ኩሽያፐ አሼዳ፤ ኡንቱንቱ ሾሮ ቢታቱዋ ኡባባፐ ኡንቱንቱ ሸምፕሴዳ።23ዳሮ አሳቱ መና ጎዳዉ እሞታ እሜድኖ፤ ይሁዳ ካትያ ህዝቂያሳዉካ አልኦ ሚሻ አሄድኖ። ሄ ዎድያፐ ዶሚደ፥ ካዉተ ኡባይ ህዝቂያሳ ሎይ ቦንቼዳ።ህዝቂያሳ ሀርግያነ አ ኦቶሩዋ
24ሄ ዎደ ህዝቂያሰ ሀርጊደ፥ ሀይቃና ማቴዳ፤ ያቲደ መና ጎዳ ዎሴዳ። ጾሳይ አዉ ዎሰቴዳ፤ አ ፓናዉ ማላታ እሜዳ።25ሽን ህዝቂያሰ ኦቶረቴዳ ድራዉ፥ ጾሳይ አዉ ኬኬዳ ኬካተዉ አ ጋላትቤና። ሄዋ ድራዉ፥ አ ቦላ፥ ይሁዳ ቦላነ የሩሳላመ ቦላ መና ጎዳ ሀንቁ ዎዳ።26ግዶፐነ፥ ዉርሰን ህዝቂያሰ ባረ ኦቶሩዋ አጊደ፥ የሩሳላመ አሳቱዋና እትፐ ባረናተ ካዉሼዳ። ሄዋ ድራዉ፥ ህዝቂያሳ ዎድያን መና ጎዳ ሀንቁ ኡንቱንቱ ቦላ ዎቤና።ህዝቂያሳ ዱረተነ ቦንቹዋ
27ህዝቂያሳዉ ሎይ ዳሮ ዱረተይነ ቦንቹ ደኤዳ፤ ህዝቂያሰ ባረ ብራዉ፥ ዎርቃዉ፥ አልኦ ሹቻዉ፥ ሳዎ፥ ጎንዳልያዉነ ሀራ አልኦ ሚሻ ኡባዉ ሚሻ ምንጅያ ሳኣ ኬጼዳ።28ካ፥ ዎይንያ ኤሳነ ዛይትያ ዎያ ሳአቱዋካ ኬጼዳ። ዱማ ዱማ መሂ ኤቂያ አቆቱዋነ ዶርሳ ዉዲ ኤቂያ አቁዋ ኦዳ።29ጾሳይ አዉ ሎይ ዳሮ ዱረታ እሜዳ ድራዉ፥ ባረዉ ካታማቱዋ ኬጼዳ፤ ዶርሳ ዉድያነ መህያ ዉድያ ዳሩዋ ሺሼዳ።30ሀ ህዝቂያስካ ቆሞ ባጋና ደእያ ግዮነ ሃ ፑልትያ ዜሪደ፥ ዳዊታ ካታማዉ አዋይ ዉልያ ባጋ ዛሪደ፥ ሃ የዴዳ። ህዝቂያሰ ኦዳባይ ኡባይ ሎኦ ፖለቴዳ።31ሽን ይሁዳ ቢታን ሀኔዳ ማላልስያ ማላታባ ኦቻናዉ ባብሎነ ሞድያዋንቱ ኪቴዳ አሳቱ ህዝቂያሳኮ ዬዳ ዎደ፥ ጾሳይ አ ፓጫናዉነ አ ዎዛናን ደእያዋ ኡባ ኤራናዉ አ የድ በሴዳ።ህዝቂያሳ ሀይቁዋ
32ህዝቂያሰ ሀኔዳ ሀራባይነ ጾሳዉ እ ኦዳ ሎኦ ኦሱዋባይ አሞጻ ናኣ፥ ትምቢትያ ኦድያ ኢስያሳ ሳፃ ማጻፋንነ ይሁዳ ካተቱነ እስራኤልያ ካተቱ ታርክያ ማጻፋን ጻፈት ኡቴዳ።33ህዝቂያሰ ሀይቂደ፥ ባረ ማይዛን ጋከቴዳ፤ ቆሞ ባጋና ደእያ ዳዊታ ዘረቱዋ ማካናን አ ሞጌድኖ። እ ሀይቂና፥ ይሁዳ አሳይ ኡባይነ የሩሳላመን ደእያ አሳይ አ ቦንቼድኖ። አ ኮታን አ ናአይ ምናሰ ካተቴዳ።The Word for the World International