2 ኦዱዋ24
ይሁዳ ካትያ ዮኣሻ
1ዮኣሽ ካተትያ ዎደ፥ ላይይ አዉ ላፑና፤ እ የሩሳላመን ኦይታሙ ላይ ካተቴዳ። አ ዳይ ሱንይ ጺብያ፤ አ በርሳበሀ ካታማፐ ዬዳ አሳ።2ቄሲ ዮዳሄ ደኤዳ ላይ ኡባን ዮኣሽ መና ጎዳ ስንን ሱረባ ኦዳ።3ዮዳሄ ዮኣሻዉ ላኡ ማጫዋንታ እሜዳ፤ ኡንቱንቱ አዉ አቱማ ናናነ ማጫ ናና የሌድኖ።4ሄዋፐ ጉይያን፥ ዮኣሽ መና ጎዳ ጌሻ ጎልያ ኦራናዉ ቆፔዳ።5ዮኣሽ ቄሳቱ ዋነ ሌዋቱዋ ሺሺደ፥ “ይሁዳ ካታማቱዋ ቢደ፥ ህንተንቱ ጾሳ ጌሻ ጎልያ ላይን ላይን ኦራናዉ እስራኤልያ ኡባፐ ሻሉዋ ሺሽተ፤ ሀ የዉዋ ኤለካ ኦተ” ያጌዳ። ሽን ሌዋቱ ኤለካ ኦበይክኖ።6ሄዋ ድራዉ፥ ካቲ ቄሰ ኡባቱዋ ካፑዋ ዮዳሀ ጼሲደ፥ “የሩሳላመ አሳፐነ ይሁዳ አሳፐ ጊራ ሺሻናዉ አያዉ ሌዋቱዋ ኪታበይኪ? መና ጎዳ አሽካሪ ሙሴነ እስራኤልያ አሳይ ጾሳ ዱንካንያ ኦሶ ጊራይ ሺቃናዳን በን ማይ ኡቴድኖ።7ሄ ኢታ ምሽራቶ አታሎ ካልያ አሳቱ ጾሳ ጌሻ ጎልያ ባይዝድጌድኖ፤ ኡንቱንቱ ጾሳ ጌሻ ጎልያን ደእያ ጌሻ ሻሉዋ ኡባ አኪደ፥ ባኣላዉ ጎይናናዉ ጎኤቴድኖ” ያጌዳ።8ሄዋ ድራዉ፥ ካቲ ሌዋቱዋ አዛዝና፥ ኡንቱንቱ ሳጽንያ ጊግሲደ፥ መና ጎዳ ጌሻ ጎልያ ፐንግያፐ ካረ ባጋና ዎድኖ።9ጾሳ ቆማይ ሙሴ መላ ቢታን ደኢደ፥ እስራኤልያ አሳፐ ሺሻናዳን አዛዜዳ ጊራ መና ጎዳዉ አሀና ማላ፥ ይሁዳንነ የሩሳላመን ሌዋቱ አዋዬድኖ።10ካፓቱነ አሳይ ኡባይ ናሸቲደ፥ ጊራይ ሳጽንያ ኩማና ጋካናዉ፥ አን የጌድኖ።11ሳጽኒ ሌዋቱ ባጋና ካትያ ኦሳንቻቱዋኮ ጋክና፥ ሳጽንያ ግዱዋን ዳሮ ሚሻይ ዳጋቴዳዋ ኡንቱንቱ በኤዳ ዎደ ኡባን፥ ካትያ ጻፊነ ቄሰ ኡባቱዋ ካፑ ሱንዳ ብታኒ ዪኖ፤ ሳጽንያፐ ሚሻ ከሲኖ፤ ሳጽንያ ሳኣን ዛር ዎኖ። ኡንቱንቱ ኡባ ጋላስ ሄዋዳን ኦደ፥ ዳሮ ሻሉዋ ዳጋዬድኖ።12ሄ ሚሻ ካቲነ ዮዳሄ መና ጎዳ ጌሻ ጎልያ ኪታ ዎቻናዉ ሱንቴዳ አሳቶ እሚኖ። ኡንቱንቱ መና ጎዳ ጌሻ ጎልያ ኦራናዉ ሹቻ ማስያዋንታነ አናጸቱዋ፥ ቃይ ጾሳ ጌሻ ጎልያ ኦራናዉ ብራታነ ናሃስያ ኦሳንቻቱዋ ቃጻሬድኖ።13ኦሳንቻቱ ጾሳ ጌሻ ጎሊ ባዬዳዋ ምን ኦደ፥ ባረንቱ ኩሽያን ካሰዋዳን ኦራጽሴድኖ።14ኦሳንቻቱ ጌሻ ጎልያ ኦራጽሱዋ ፖሌዳ ዎደ፥ ፓላሄዳ ዎርቃነ ብራ ካትያኮነ ዮዳሄኮ አሄድኖ። ያትና ኡንቱንቱ ሄ ዎርቃንነ ብራን መና ጎዳ ጌሻ ጎልያ ግዶ ኦሶ ማድያ ሚሻቱዋ፥ ጹግያ ያርሾ ሀንያ ሳነቱዋነ ሀራ ዱማ ዱማ ሚሻቱዋ ኦስሴድኖ።ዮዳሄ ደኤዳ ላይን መና ጎዳ ጌሻ ጎልያን ጹግያ ያርሹዋ ኡባ ዎደ ኡንቱንቱ ያርሺኖ።15ዮዳሄ ሎይ ጭሚደ ሀይቄዳ፤ እ ሀይቂያ ዎደ አ ላይይ ጼታነ ሀታማ።16ዮዳሄ እስራኤላን ጾሳዉነ ጾሳ ጌሻ ጎልያዉ ሎኦባ ኦዳ ድራዉ፥ ዳዊታ ካታማን ካተቱዋ ማካናን አ ሞጌድኖ።
ዮኣሽ ጾሳፐ ዎራ ስሜዳ
17ዮዳሄ ሀይቄዳዋፐ ጉይያን፥ ይሁዳ ካፓቱ ዪደ፥ ጉፋኔድኖ። ያትና፥ ካቲ ኡንቱንቱ ዞርያ ስሴዳ።18ኡንቱንቱ መና ጎዳ ባረንቱ ማይዛ አዎቱዋ ጾሳ ጌሻ ጎልያ አጊደ፥ አሼር ምስለቶነ ኤቃቶ ጎይኔድኖ። ኡንቱንቱ ኦዳ ባላ ድራዉ፥ ይሁዳ ቦላነ የሩሳላመ ቦላ ጾሳ ሀንቁ ዎዳ።19አሳይ ባረኮ ስማናዳን መና ጎዳይ ትምቢትያ ኦድያዋንታ ኡንቱንቱኮ ኪቴዳ፤ ትምቢትያ ኦድያዋንቱ ኡንቱንቱ ቦላ ማርካቴድኖ፤ ሽን ኡንቱንቱ ስሰናን እጼድኖ።20ሄዋፐ ጉይያን፥ ቄስያ ዮዳሄ ናኣ ዛካራሳ ቦላ ጾሳ አያናይ ዎዳ፤ ዛካራስ አሳ ስንን ኤቂደ፥ “ጾሳይ ሀዋዳን ያጌ፤ ‘ህንተ መና ጎዳ አዛዙዋ ፖልያዋ አያዉ እጺቴ? ሄዌ ህንተንቶ ኢታ። ህንተንቱ መና ጎዳ አጌዳ ድራዉ፥ እካ ህንተንታ አጌዳ’ ያጌ” ያጌዳ።21ሄዋፐ ጉየ አሳይ አ ቦላ ማቀቴዳ። ካቲ ኡንቱንቱ አዛዝና፥ መና ጎዳ ጌሻ ጎልያ ዳባባን አ ሹቻን ጫዲደ ዎድኖ።22ካቲ ዮኣሽ ዛካራሳ አዉ ዮዳሄ ባረዉ ኦዳ ኬካተ ሀሳየናን አጊደ፥ አ ናኣ ዛካራሳ ዎሴዳ። ዛካራስ ሀይቂደ፥ “መና ጎዳይ ሀዋ በኢደ፥ ሀሉዋ ከሶ” ያጌዳ።ዮኣሻ ካዉታ ዉርሰ
23ሄ ላይይ ላመትያ ዎደ፥ ሶርያ ኦላንቻቱ ዮኣሻ ኦላናዉ ዬድኖ። ይሁዳ ቦላነ የሩሳላመ ቦላ ማዪደ፥ አሳ ካፓቱዋ ኡባ ዎደ፥ ኡንቱቱፐ ኦሞዴዳዋ ኡባ ዳማስቆን ደእያ ባረንቱ ካትያዉ የዴድኖ።24ሶርያ ኦላንቻቱ ፓይዱዋን ጉ፤ ሽን ይሁዳ አሳይ መና ጎዳ ባረንቱ አዎቱዋ ጾሳ አጌዳ ድራዉ፥ መና ጎዳይ ሎይ ዳሮ ግዴዳ ኡንቱንቱ ኦላንቻቱዋ ሶርያ ኦላንቻቱ ኩሽያን አደ እሜዳ። ኡንቱንቱ ሀዋዳን ኦደ፥ ዮኣሻ ሙሬድኖ።25ሶርያ ኦላንቻቱ አፐ ሻከትያ ዎደ፥ ዮኣሽ ሎይ ማዱንጽ ኡቴዳ። ቄስያ ዮዳሄ ናኣ ሱ ድራዉ፥ አ ኦሳንቻቱ አ ቦላ ማቀቲደ፥ እ ባረ ግሱዋን ግስ ደእሽን ዎድኖ። እ ሀይቂና፥ ዳዊታ ካታማን አ ሞጌድኖ፤ ሽን ካተቱዋ ማካናን አ ሞግበይክኖ።26ዮኣሻ ቦላ ማቀቴዳዋንቱ አሞኒ ሽምኣት ናኣ ዛባዳነ ሞኣበ ሺምሪት ናኣ ይሆዛባዳ።27ዮኣሻ ናናቱዋባይ፥ አ ቦላ ትምቢትያ ኦዴዳ ዳሮባይነ ጾሳ ጌሻ ጎልያ እ ኦራጽሴዳባይ ካተቱ ታርክያ ማጻፋን ጻፈት ኡቴዳ። ዮኣሽ ሀይቂና፥ አ ሳኣን አ ናአይ አመስያስ ካተቴዳ።The Word for the World International