2 ኦዱዋ1

ካቲ ሶሎሞነ አዳ ኤራ አካናዉ ዎሴዳ

1ዳዊታ ናአይ ካቲ ሶሎሞነ ባረ ካዉተ ምንሴዳ። መና ጎዳይ አ ጾሳይ አናና ግዲደ፥ አ ሎይ ግታዬዳ።
2ሶሎሞነ እስራኤልያ ኡባ፥ ሻኣ ካፓቱዋ፥ ጼቱዋ ካፓቱዋ፥ ዳናቱዋ፥ እስራኤልያ አሳ ካለያ ኡባቱዋነ ጎልያ አሳቱዋ ካፓቱዋ ጼሲደ ሺሼዳ።3ሄዋፐ ጉይያን፥ ሶሎሞንነ ሺቄዳ አሳይ ኡባይ ጋባኦናን ደእያ ጎይንያ ቃ ሳኣ ቤድኖ፤ አያዉ ጎፐ፥ መና ጎዳ ቆማይ ሙሴ መላ ቢታን መ ጾሳ ዱንካኒ ያን ደኤዳ።4ካሰ ዳዊተ ጾሳ ታቦታዉ የሩሳላመን ዱንካንያ ጊግሴዳ፥ ጾሳ ታቦታ ቅርያት-ይኣሪማ ካታማፐ ሄ ጊግስ ዎዳ ሳአዉ አህ ዎዳ።5ሁራ ናኣ ኡራ ናአይ ባጻልኤል ናሃስያ ብራታፐ ኦዳ ያርሽያ ሳአይ ጋባኦናን መና ጎዳ ዱንካንያ ስንን ደኤ። ሶሎሞንነ ሄ ሺቄዳ አሳይ ጾሳ ሄዋን ኮዬድኖ።6ሶሎሞነ መና ጎዳ ዱንካንያ ስንን ደእያ ናሃስያፐ ኦሰቴዳ ያርሽያ ሳኮ፥ ጾሳ ስን ቢደ፥ እት ሻአ ጹግያ ያርሹዋ ያርሼዳ።
7ሄ ጋላሳ ቃማ ጾሳይ ሶሎሞናዉ ቆንጪደ፥ “ታን ነዉ አያ እማናዉ ኮያይ?” ያጌዳ።
8ሶሎሞነ ጾሳ፥ “ኔን ታ አዉዋ ዳዊታ አገና ዎልቃማ ሲቁዋን ሲቃደ፤ ያታደ ታና አ ኮታን ካተያዳ።9ሀእካ አቤት መና ጎዳዉ፥ ጾሳዉ፥ ኔን ታ አዉዋ ዳዊታዉ ካሰ ጌዳ ቃላይ ፖለቶ። ኔን ታና ሳኣን ደእያ ባናዳን ጮራቴዳ አሳ ቦላ ካተዬዳ ድራዉ፥10ታን ሀ አሳ ካለናዉ ኔን ታዉ አዳ ኤራተነ አኬካ እማ። ሄዌ ዮፐ፥ ሀ ነ ዎልቃማ አሳ ኦን አይሳናዉ ዳንዳዪ?” ያጌዳ።
11ጾሳይ ሶሎሞና ሀዋዳን ያጌዳ፤ “ኔን ዱረ ግዳናዉ፥ ዎይ አቁዋ ደማናዉ፥ ዎይ ቦንቼታናዉ፥ ዎይ ነ ሞርከቱ ሀይቃናዉ፥ ዎይ ነዉ ላይይ አዱቃናዉ ኦቼናን አጋደ፥ ታን ኔና ካተዬዳ ታ አሳ አይስያ አዳ ኤራተነ አኬካ ኦቼዳ ድራዉ፥12ታን ነዉ አዳ ኤራተነ አኬካ እማና። ቃይ ኔፐ ካሰ ደኤዳ ካተቶ ዎይ ኔፐ ጉይያን ያና ካተቶካ ባይና ዱረታ፥ አቁዋነ ቦንቹዋ ታን ነዉ እማና” ያጌዳ።
13ሄዋፐ ጉይያን፥ ሶሎሞነ ጾሳ ዱንካኒ ጋባኦናን ደእያ፥ ጎይንያ ቃ ሳፐ ስሚደ፥ የሩሳላመ ቤዳ፤ እስራኤልያ ቦላ ካተቴዳ።

ካትያ ሶሎሞነ ምኖተነ ዱረተ

14ሶሎሞነ ፓራ ጋረቱዋነ ፓራቱዋ ሺሼዳ። አዉ እት ሻአነ ኦይዱ ጼቱ ፓራ ጋረቱነ ታማነ ላኡ ሻአ ፓራቱ ደኢኖ። እ ኡንቱንቱ ፓራ ጋረቱዋ ካታማቱዋንነ ባረናና የሩሳላመን ዎዳ።15ካቲ ዎርቃይነ ብራይ የሩሳላመን ሹቻዳን ኬለታናዳን፥ ዝጋይካ ጋን ድጭያ ኤዳን ጮራታናዳን ኦዳ።16ሶሎሞነ ፓራቱ ግብጼፐነ ቃዌ ጌተትያ ጋድያፐ ዬድኖ። ካትያ ዛልአንቻቱ ኡንቱንታ ቃዌፐ ሻሉዋን ሻሚደ አሂኖ።17ኡንቱንቱ እት እት ፓራ ጋርያ ኡሱፑን ጼቱ ጻጋራ ብራን፥ እት እት ፓራ እት ጼታነ እሻታሙ ጻጋራ ብራን ግብጼፐ ሻሚደ አሂኖ፤ ሂተቱዋ ካተቱዋ ኡባቶነ ሶርያ ካተቶ ዛልኢኖ።

The Word for the World International

https://app.library.bible/content/812ecd29a9e60fdc