Read ማዝሙርያ 94

ማዝሙርያ94dwr_ent

ጾሳይ ኡባ ቦላ ፕርድያዋ

¹አቤት መና ጎዳዉ፥ ኔን ኩሽያ ጭገትያ ጾሳ።አቤት ኩሽያ ጭገትያ ጾሳዉ፥ ነ ቦንቹዋ በሳ።²አቤት ሳኣ ፕርድያዎ፥ ደንዳ፤ኦቶራንቻቶ በስያ ሙሩዋ እማ።³አቤት መና ጎዳዉ፥ አዉደ ጋካናዉ ጋምአኔ?ኢታቱ አዉደ ጋካናዉ ናሸታኔ?⁴ኢታ ኦያ ኡባቱ፥ባረንቱ ኦቶሮ ቃላ ሃሳዪኖ፤ኡንቱንቱ ጬቀቲኖ።

⁵አቤት መና ጎዳዉ፥ ኡንቱንቱ ነ አሳ ሊቂሲኖ፤ነ ላታ ናቂኖ።⁶ኡንቱንቱ አምኤቱዋነ በተቱዋ ዎኖ፤አዉ ባይናዋንታካ ዎኖ።⁷ያቲደ ኡንቱንቱ፥ “መና ጎዳይ ኑና በኤና፤ያቆባ ጾሳይ አኬከና” ያጊኖ።

⁸ህንተኖ፥ አሳ ግዶፐ አዳ ዳማቶ፥ አኬክተ!ህንተኖ ኤያቶ፥ አዉደ ኤራንቻ ግዳንቴ?⁹ሀይ መዳ ጾሳይ ስሰኔ?አይፍያ መዳዌ በኤኔ?¹⁰ካዉተ ሴርያዌ ሙረኔ?አሳ ኤራ ታማርስያዌ ባረዉ ኤረኔ?¹¹መና ጎዳይ አሳ ቆፋይ መላ ግድያዋ ኤሬ።¹²አቤት መና ጎዳዉ፥ ኔን ሴርያዌነነ ህግያፐ ታማርስያ አሳይ አንጀቴዳዋ።¹³ኢታቱ ኩንድያ ኦላይ ቦከታና ጋካናዉ፥መቱ ጋክያ ጋላሳን ኔን አ ሸምፕሳሳ።¹⁴መና ጎዳይ ባረ አሳ አገና፤እ ባረ ላታ አገና።¹⁵ፕርዳይ ስሚደ ጽሎ ፕርዳ ግዳናዋ፤ዎዛና ሱረቱ ኡባይ ሄ ጽሎ ፕርዳ ማዳና።

¹⁶ማካላንቻቱዋ ቦላታ ድራዉ ደንድያዌ ኦኔ?ኢታ ኦያዋንቱናታ ድራዉ ኤቀቴዳዌ ኦኔ?¹⁷መና ጎዳይ ታና ማደነንቶ፥ታን ኤለካ ዱፉዋን ገላደ ስርጵ ጋና ሽን።¹⁸አቤት መና ጎዳዉ፥ ታን፥“ታ ገዲ ሀልጼ” ያጌዳ ዎደ፥አገና ነ ሲቁ ታዉ ዘምፖ ግዴዳ።¹⁹ታና ህርጋይ ዎያ ዎደ፥ኔን ታና ዎፑ ኦደ ናሸቻሳ።²⁰ህግያ ባለያ ጌላ ዳናቱዋናኔን ዙፐታይ?²¹ጽሎቱዋ ዎናዉ ኡንቱንቱ እትፐ ቶበቲኖ፤ሱረቱዋ ቦላ ሀይቁዋ ፕርዲኖ።²²ግዶፐነ፥ መና ጎዳይ ታን ባቃታ አቴዳ ሳኣ፤ታ ጾሳይ ታን ቆሰትያ ዛላ።²³ኡንቱንቱ ኢታተ ድራዉ፥ እ ኡንቱንታ ሙራና፤ኡንቱንቱ ናጋራ ድራዉ፥ እ ኡንቱንታ ይሳና፤ኤ፥ መና ጎዳይ ኑ ጾሳይ ኡንቱንታ ይሳና።

ማዝሙርያ 94 / dwr_ent

ጾሳይ ኡባ ቦላ ፕርድያዋ

ማዝሙርያ94dwr_ent