ኦሱ ኦሰት ፖለተናዳን ደንዴዳ የዉዋ ጾኑዋ
1ሳምባላጽ፥ ጾቢ፥ አራባ ጋድያ አሳ ግድያ ገሼምነ ሀራ ኑ ሞርከቱ ኑን ግምቢያ ድርሳ ኦደ ፖሌዳዋነ ቃይ ኦሰትቤና ፓጫ ሳአይካ እቱነ አትቤናዋ ስሴድኖ። ግዶ ሽን፥ ኑን ግምቢያ ድርሳ ፐንገቱዋን ብሮ ሳንቃ ገልስበይኮ።2ሄዋ ኡንቱንቱ ስሴዳ ዎደ፥ ሳንባላጽነ ገሼም ሀዋዳን ያጊደ፥ ታኮ ኪቴድኖ፤ “ኦና ጌተትያ ደምባን ደእያ ቄር ካታማቱዋፐ እቱዋን ያደ ኑናና ጋከታ”። ሽን ኡንቱንቱ ታ ቦላ ኢታ ኦናዉ ማቀቴድኖ።3ሄዋ ድራዉ፥ ታን ኡንቱንቶ ሀዋዳን ያጋደ ዛራ ኪታንቻቱዋ ኪታድ፤ “ታዉ ዳሮ ኪታይ ደኤ፤ ሄዋ ድራዉ፥ ታን ህንተንቱ ግያ ሳኣ ባናዉ ዳንዳይከ። ታን ዱገ ህንተንቱኮ ቢና፥ ኪታይ አያዉ በቲ?”4ሄ ኪታ ዛር ዛር ኦይዱ ገደ ታኮ ኪቴድኖ፤ ሽን ታን እት ማላ ዛሩዋ ኡንቱንቶ እማድ።5እቼሸንዋን ሳምባላጽ ባረ ቆማ ቦላ ዶያ ደእያ ዳብዳቢያ ታኮ ኪቴዳ።6ዳብዳቢካ ሀዋዳን ያጌ፤ “ኔንነ ነ ዛርያ ግዴዳ አይሁዳቱ ማካላናዉ ቆፔዳዋነ ሄዋፐ ደንዴዳዋን ግምቢያ ድርሳ ግምቢያዋ ሾሮ ጋድያን ደእያ አሳይ ኡባይ ሃሳይያዋ ገሼም ታዉ ኦዴዳ። ቃይ ኔን ኔና ካትያ ከሳናዉ ኮይያዋነ፤7ኔን ይሁዳ ካትያ ግድያዋ የሩሳላመን አዋያና ማላ፥ ትምቢትያ ኦድያዋንታ ነ ዎዳዋካ እ ታዉ ኦዴዳ። ሀ ዋርያ ካቲ ስሱሳይ አተና። ሄዋ ድራዉ፥ ታናና ጋከታደ ዞረታናዉ ሃያ”።8ታንካ፥ “ሀ ኔን ግያ የዉዋ ኡባይ ኡባካ ቱማ ግደናዋነ ኔን ጮ መዳዋ” ያጋደ ዛራድ።9ኑ ኦያ ኪታይ ፖለተና ማላ፥ “ኡንቱንቱ ኩሺ ኦሶ ዳቡር ክቼዳ” ያጊደ ኡንቱንቱ ኑና ያሽሲደ ጋምኤድኖ። ሄዋ ድራዉ፥ “ኑ ጾሳዉ ሀእ ታና ምንርኪ” ያጋደ ታን ዎሳድ።10ሄዋፐ ጉይያን፥ ሶፐ ከሰናዳን ጎርድ ዎዳ ማሄጻብኤላ ናኣ ናኣ ዳላያ ናኣ ሻማእያኮ ባድ። እ ታዉ ሀዋዳን ያጌዳ፤ “እት ቃማ አዉደንቶ ኡንቱንቱ ኔና ዎናዉ ያና ደእያ ድራዉ፥ ኔንነ ታን ጾሳ ጎልያ ግዶ ገሊደ፥ ጾሳ ጌሻ ጎልያ ግዶን ጾሳ ጌሻ ጎልያ ፐንገቱዋ ጎርዲደ ጋከቶይተ”።11ታን ሀዋዳን ያጋደ ዛራድ፤ “ታና ማላትያ አሳይ ባቃቲ? ዎይ ቃይ ታና ማላትያ አሳይ ጌሻ ጎልያ ግዶ ገሊደ፥ ባረ ሸምፑዋ አሺ? ታን ሄዋ ኡባካ ኦከ”።12ታ የዉዋ ቆፕያ ዎደ፥ ቱሙካ አ ጾሳይ ኪቴዳ ትምቢትያ ኦድያዋ ግደናዋነ ጾቢነ ሳንባላጽ አ ሚሻን ሻሜዳ ድራዉ፥ ታ ቦላ ዎርዶ ትምቢትያ ኦድያዋ ግድያዋ አኬካድ።13እ ሚሻን ሻመቴዳ ጋሱ ታን ያያደ፥ እ ግያዋዳን ኦደ ታን ናጋራን ገላናዳና። ያትና፥ ኡንቱንቱ ኡባይ ሄዋ ስሴዳ ዎደ፥ ታና ካስያባ ታ ቦላን ደማናሳ።14“ታ ጾሳዉ፥ ጾቢነ ሳንባላጽ ኦዳዋ ቆፓ። ኖኣዶ ጌተትያ ማጫ ትምቢትያ ኦድያናነ ሀራ ትምቢትያ ኦድያዋንቱ ኡባይ ታና ያሽሳናዉ ኡንቱንቱ ኦዳዋ ኡባካ ቆፓ” ያጋድ።ግምቢያ ድርሳ ኦሱ ፖለቴዳ
15ግምቢያ ድርሳ ኪታይ እሻታማነ ላኡ ጋላሳን፥ ኤሉላ ጌተትያ አግናን ላታማነ እቼሻን ጋላሳን ፖለቴዳ።16ኑ ዩሹዋን ደእያ ካዉተቱዋ ግዶን ደእያ ኑ ሞርከቱ ሄዋ ስሴዳ ዎደ ያዬድኖነ ዬላቴድኖ። አያዉ ጎፐ፥ ሀዌ ኪታይ ኑ ጾሳይ ማድና ኦሰቴዳዋ አኬኬድኖ።17ሄ ዎድያን አይሁዳቱዋ ካለያዋንቱ ጾቢያዉ ጮራ ዳብዳበቱዋ ጻፌድኖ፤ ጾቢ ዛሪደ፥ ኡንቱንቶ ጻፌዳ።18አያዉ ጎፐ፥ እ አራሀ ናኣ ሻካንያ ናቶ አኬዳ ድራዉነ አ ናአይ ያሆሀናን በረክያ ናኣ ማሹላማ ናቶ አኬዳ ድራዉ፥ ይሁዳፐ ዳራቱ አናና ጫቀት ኡቴድኖ።19ኡንቱንቱ ጾቢ ኦዳ ሎኦባ ኡባ ታ ስንን ሃሳይኖ፤ ቃይ ታን ግያዋካ አዉ ኦዲኖ። ጾቢካ ታና ያሽሳናዉ ዳብዳበቱዋ ጻፍ የዴ።