እስራኤልያ አሳይ አላጋ አሳፐ ሻከቴዳ
1ሄ ጋላስ አሳይ ኡባይ ስስሽን፥ ሙሴ ማጻፋይ ናባበቴዳ፤ ሄ ዎደ ኡንቱንቱ፥ “ሞኣበ ጋድያ አሳይነ አሞና ጋድያ አሳይ ጾሳ ማባራን ጋከታናዉ በሰና” ግያ ሳኣ ማጻፋ ግዶን ደሜድኖ።2አያዉ ጎፐ፥ እስራኤልያ አሳይ ግብጼፐ ከሲደ፥ ካናነ ብያ ዎደ፥ ሞኣባነ አሞና ጋድያ አሳይ ኡንቱንቶ ካነ ሃ እመናን እጼድኖ። ሄዋ ቦላካ ቃይ እስራኤልያ አሳ ሸቃና ማላ፥ ባላማዉ ሻሉዋ እሚደ ሻሜድኖ። ግዶ ሽን፥ ኑ ጾሳይ ሸቃ አንጆ ላሜዳ።3ሀ ህግያ እስራኤልያ አሳይ ስሴዳ ዎደ፥ አላጋ ዛርያ ዋላካይ ደእያ ኡባ እስራኤልያፐ ሻኬዳ።ናህሚ ባዬዳ ዎጋ ኦራጽሴዳ
4ሄዋፐ ካሰቲደ፥ ጌሻ ጎልያን ሚሻቱዋ ዎያ ክፍለቶ ካፑዋ ግዴዳ ኤልያሽብ ጾቢያና ዳቦታ መ ዎዳ።5ሄዋፐ ደንደዳዋን ካ እሞታ፥ እጻና፥ ጌሻ ጎልያን ደእያ ዱማ ዱማ ሚሻቱዋ፥ ካፐ ዎይንያፐነ ዛይትያፐ ሌዋቶ፥ ማዝሙርያ የጽያዋንቶነ ፐንግያ ናግያዋንቶ እምያ አስራታነ ቄሳቶ እምያ ቆሙዋ ዎያ ዎጋ ክፍልያ ኤልያሽብ ጾቢ አቃና ማላ፥ አዉ ጊግሴዳ።6ሀ ኡባባይ ሀንያ ዎደ ታን የሩሳላመን ደእከ። አያዉ ጎፐ፥ አርጸክሲስ ባብሎነ ጋድያን ካተቴዳ ሀታማነ ላኤን ላይን ታን ስማደ ባብሎነ ጋድያ ካትያኮ ባ ክቻድ። ግዶ ሽን፥ ጉ ዎድያፐ ጉይያን፥ ካትያ ኦቻደ፥7የሩሳላመ ስማደ ያድ። ጾሳ ጌሻ ጎሊ ደእያ ሳኣን ኤልያሽብ ጾቢያዉ አቅያ ክፍልያ ጊግሲደ፥ እ ኦዳ ኢታባ አኬካድ።8ሎይ ሀንቀታደ፥ ጾቢያ ሶይ ሻሉዋ ኡባ ክፍልያፐ ከሳደ፥ ካረ ኦላድ።9ክፍልያካ ቃይ ዎጋዳን ጌሻና ማላ አዛዛድ። ጾሳ ጌሻ ጎልያ ሚሻቱዋ፥ ካ፥ እሞታነ እጻና ዛራደ ሄ ሳኣ ገልሳድ።10ቃይ አሳይ ሌዋቶነ ማዝሙርያ የጽያዋንቶ በስያ ቁማዉ እምቤና ድራዉ፥ ሌዋቱነ ማዝሙርያ የጽያዋንቱ ኡባይ ባረንቱ ኪታ አጊደ፥ ጎሻዉ ጉየ ቤዳዋ በኣድ።11ሄዋ ድራዉ፥ ታን ካፓቱዋ፥ “ጾሳ ጌሻ ጎልያ ኦሱዋ አያዉ ኦል አጌድቴ?” ያጋደ ሀንቀታድ። ሄዋፐ ጉይያን፥ ኡንቱንታ ጼጋደ ኡባካ ኡንቱንቱ ኦሶ ኦሱዋ ዛራድ።12ያትና፥ ይሁዳ አሳይ ኡባይ ካፐ፥ ዎይንያፐነ ዛይትያፐ እምያ አስራታ ጌሻ ጎልያ ሚሻቱዋ ዎያ ጎልያ ዛሪደ፥ አሁዋ ዶሜዳ።13ታን ቄስያ ሸሌምያ፥ ጻፍያ ጻዶቃነ ሌዊያ ፓዳያ ሚሻ ዎያ ጎልያዉ ካፑዋ ኦደ ሱንድ። ቃይ ማታንያ ናኣ ናኣ ዛኩራ ናአይ ሀናን ኡንቱንታ ማድያዋ። ሀዋንቱ ኡባይካ ኮሽያዋ ኡባ ባረንቱ እሻቶ ሻክ ሻክ እምያዋን አማነትያዋንታ ግዴድኖ።14“ታ ጾሳዉ ታና ቆፓ፤ ቃይ ነ ጌሻ ጎልያ ኪታይ ጊጋና ማላ፥ ታን ኦዳ ሎኦ ኦሱዋካ ዶጎፓ” ያጋደ ታን ዎሳድ።15ሄ ዎድያን ታን ይሁዳን ደእያ አሳይ ሳምባታ ጋላስ ዎይንያ ጉምእሽን በኣድ፤ ሀራቱካ ቃይ ካ፥ ዎይንያ ኤሳ፥ ዎይንያ አይፍያ፥ ባላስያ አይፍያነ ሄዋንታ ማላትያባቱዋ ባረንቱ ሀርያን ጫኒደ፥ ሳምባታ ጋላሳን የሩሳላመ አህያዋ በኣድ። ሄዋ ድራዉ፥ ኡንቱንቱ ሳምባታ ጋላሳን ዛልኤናዳን ታን ኡንቱንቶ ምንሳደ ኦዳድ።16ሄዋ ቦላካ ቃይ የሩሳላመን ደእያ ጺሮሳ ጋድያ አሳቱ ሞልያነ ሀራ እት እት ዛልኤ ሚሻቱዋ አሂደ፥ ሳምባታን የሩሳላመን ይሁዳ አሳዉ ዛልኢኖ።17ሄዋ ድራዉ፥ ታን ይሁዳ ካለያዋና ሀዋዳን ያጋ ዋላቀታድ፤ “ሀዋ ማላ ኢታ ኦሱዋ ኦደ፥ ሳምባታ አያዉ ቱንሲቴ?18ጾሳይ ሀዋ ማላ መቱዋ ኑ ቦላንነ ኑ ካታማ ቦላን አሄዳዌ፥ ካሰ ህንተንቱ አዎቱ ሄዋ ማላ ኢታባ ኦና ግደኔየ? ሀእ ህንተንቱ ቃይ ሳምባታ ቱንሲደ፥ እስራኤልያ ቦላን ሀራ ሀንቁዋ አሀናዉ ሀኒታ” ያጋድ።19ሄዋፐ ጉይያን፥ ሳምባታ ጋላሳፐ ካሰቲደ ደእያ ጋላሳን ሳአይ ለለምእያ ዎደ፥ የሩሳላመ ግምቢያ ፐንገቱ ጎርደታናዳንነ ሳምባታይ አናዉ ዶየተናዳን ታን አዛዛድ። ቃይ ሳምባታ ጋላሳን አይ ዛልእያነ አኪደ ገለናዳን ናጋና ማላ፥ ታ ቆማቱዋፐ እቱዋ እቱዋ ግምቢያ ፐንግያን ኤሳድ።20ሄዋ ድራዉ፥ ዱማ ዱማ ዛልኤ ሚሻቱዋ አህያ ዛልአንቻቱ እቱዋፐ ቢደ ላኡዋ ጋካናዉ፥ የሩሳላመ ግምቢያፐ ጋጻ ባጋና አቄድኖ።21ሽን ታን ኡንቱንታ ሀዋዳን ያጋደ ሴራድ፤ “ግምቢያፐ ጋጻና ዋናናዉ አቂቴ? ህንተንቱ ላኤን ሄዋዳን ኦፐ፥ ታን ዎልቃንካ ህንተንታ ተአና” ያጋድ። ሄ ጋላሳፐ ጉይያን፥ ላኤን ሳምባታ ጋላስ ሙለ ይበይክኖ።22ሌዋቱ ባረንቱ ሁጲያ ጌሻናዳንነ ሳምባታ ጋላሳይካ ጌሻ ግዳና ማላ፥ ግምቢያ ፐንገቱዋ ናጋናዳን ታን አዛዛድ። “ታ ጾሳዉ፥ ሀ ኡባባ ድራዉ፥ ኔን ታና ቆፓ፤ ቃይ ነ አገና ሲቁዋ ድራዉ፥ ኔን ታዉ ቃረታ” ያጋደ ዎሳድ።23ሄ ዎደ ቃይካ ታን ይሁዳ አቱማ አሳፐ እቱ እቱ ማችያ አሽዶዳ፥ አሞናነ ሞኣበ ጋደቱዋፐ አኬዳዋ በኣድ።24ኡባ ቃይ ኢታባይ ኡንቱንቱ ናናቱዋፐ ባጋይ አሽዶዳ ጋድያ ዎይ እት እት ሀራ ጋድያ ቃላን ሃሳዪኖፐ አትና፥ ባረንቱ ጋድያ፥ ይሁዳ ቃላን ሃሳያናዉ ዳንዳይክኖ።25ታን ኡንቱንቱና ኦሸታድነ ኡንቱንታ ሸቃድ፤ ቃይ ኡንቱንቱፐ እቱዋ እቱዋ ደቻደ፥ ኡንቱንቱ ሁጲያ ብናና ሾዳድ። ሄዋ ጻላላ ግደናን ኡንቱንቱ ላኤን ባረንቱ ማጫ ናና ኡንቱንቱ አቱማ ናናቶ እመናዳንነ ኡንቱንቱ ማጫ ናናካ ባረንቶነ ባረንቱ አቱማ ናናቶ አከናዳን ጾሳ ሱንን ጫቀታድ።26ቃይካ ኡንቱንታ ሀዋዳን ያጋድ፤ “ካትያ ሶሎሞነ ናጋራ ኦዳዌ አላጋ ጋድያ ማጫ አሳቱዋፐ ደንዴዳዋና ግደኔየ? ሶሎሞነ ማላ ካቲ ሀራ ዳሮ ጋድያ ካተቱዋ ግዶንካ ባዋ፤ ጾሳይካ አ ዶሴዳ ድራዉ፥ እስራኤልያ አሳ ኡባ ቦላን ካተዬዳ። ግዶ ሽን፥ ሀራይ አቶ አካ አላጋ ጋድያ ማጫ አሳቱ ሀዋ ማላ ናጋራ ኦስሴድኖ።27ያትና፥ ኑንካ ቃይ ህንተንቱ ዞርያ ስሲደ፥ አላጋ ማጫ አሳ አኪደነ ሄዋ ማላ ኢታባ ኦደ፥ ጾሳ ናቃኔየ?” ያጋድ።28ቄስያ ኡባቱዋ ካፑዋ ኤልያሽባ ናናቱዋፐ እቱ ዮያዳአ፤ ሽን አ ናናቱዋፐ እቱ ቤት-ሆሮና ካታማ አሳ ግድያ ሳንባላጻ ናቶ አኬዳ። ያትና፥ ታን አ ታ ደእያ ሳኣፐ የደርሳድ።29“ታ ጾሳዉ፥ ሀዋንቱ ቄሰተ ዎጋ ቱንሴዳዋነ ኔን ቄሳቱ ዋናነ ሌዋቱዋና ዎዳ ቃላ ጫቁዋ ኮሌዳዋ በአ” ያጋደ ታን ዎሳድ።30ኡንቱንታ አላጋ ግዴዳ የዉዋ ኡባፐ ጌሾዋፐ ጉይያን፥ ቄሳቶነ ሌዋቶ ኡንቱንቱ ኦሱዋ ኦሱዋ እማድ።31ቃይ ያርሹዋ ጹግያ ምይካ ዎድያን ዎድያን ያና ማላነ አሳይካ ባረዉ አይፌዳዋፐ ኮይሮ አይፍያ እሞታ ኦደ አሀና ማላ፥ ዎጋ ዎድ። “ታ ጾሳዉ፥ ነ ሎኦተን ታና ቆፓ” ያጋደ ታን ዎሳድ።