ያርኮ ኩንዴዳ
1እስራኤልያ አሳዉ ያዬዳ ጋሱዋን ያርኮ ካታማ ድርሳ ፐንገቱ ጎርደቲደ ናገቲኖ፤ ካታማ ገላናዉነ ካታማፐ ከሳናዉ ዳንዳይያ ኦንነ ባዋ።2መና ጎዳይ ኢያሳ፥ “ጼላ፥ ታን ያርኮ ካታማ አ ካትያና አ ምኖ ኦላንቻቱዋካ ነ ኩሽያን አደ እማድ።3ኔንነ ነ ኦላንቻቱ ሳልፒደ፥ ኡሱፑን ጋላሳይ ጋካናዉ ሀቼ ሀቼ ካታማ ድርሳ እት ገደ ዩይ አተ።4ቃይ ላፑን ቄሳቱ ዶርሳቱዋ ካጭያፐ ከሴዳ ላፑን ማላካታቱዋ ኦይቂደ፥ ጾሳ ቃላ ጫቁዋ ታቦታ ስንና ሀመትኖ። ላፑን ጋላስ ቄሳቱ ማላካታቱዋ ፑንሽን፥ ኦላንቻቱ ሳልፒደ፥ እትፐ ካታማ ላፑ ገደ ዩይ አተ።5ሄዋፐ ጉይያን ማልካታቱዋ ፑኑዋ ጎቺደ ፑንያዋ ስስያ ዎደ፥ ኤለካ አሳይ ኡባይ ባረ ቃላ ቁ ኦደ ዋሶ። ያቶፐ ካታማ ድርሳ ግምቢ ኩንድና አሳይ ኡባይ ስንዉ ላዉሁ ጊደ ገላና” ያጌዳ።6ነዌ ናአይ ኢያሱ ቄሳቱ ዋ ጼጊደ፥ “መና ጎዳ ቃላ ጫቁዋ ታቦታ ቶክተ፤ ህንተፐ ላፑን ቄሳቱ ላፑን ማላካታቱዋ ኦይቂደ፥ ቃላ ጫቁዋ ታቦታፐ ስንዉ አደ ሀመትኖ” ያጌዳ።7አሳ፥ “ስንዉ ቢተ፤ ካታማ ዩይ አተ፤ ኦላዉ ጊጌዳዋንቱካ መና ጎዳ ቃላ ጫቁዋ ታቦታ ስንን ሀመትኖ” ያጊደ አዛዜዳ።8ኢያሱ አሳዉ ሃሳዬዳዋዳን፥ ላፑን ቄሳቱ ላፑን ማላካታቱዋ መና ጎዳ ስንን ኦይቂደ፥ ፑኒደ ሀመቴድኖ፤ ቃይ መና ጎዳ ቃላ ጫቁዋ ታቦታይ ኡንቱንታ ካሌዳ።9ኦላዉ ጊጌዳዋንቱ ማላካታቱዋ ፑንያ ቄሳቱዋ ስንን ብያ ዎደ፥ ጉየና ናግያ ኦላንቻቱ ቃላ ጫቁዋ ታቦታ ጉየና ካሌድኖ። ሄ ዎድያ ኡባን ማላካታቱ ፑነቲኖ።10ሽን ኢያሱ አሳ፥ “ታን ህንተንታ፥ ‘ዋስተ!’ ጋና ጋላሳይ ጋካናዉ፥ ኦላ ዋሱዋ ዋሶፕተ፤ ህንተንቱ ቃላይ ስሰቶፖ፤ እት ቃላካ ቃቶፕተ። ግድን ሄ ዎደ ዋስተ!” ያጊደ አዛዜዳ።11ያቲደ መና ጎዳ ቃላ ጫቁዋ ታቦታይ ቶከቲደ፥ ሄ ካታማ እት ገደ ዩይ አናዳን ኦዳ። ሄዋፐ ጉይያን አሳይ ባረ ዱንካኔዳ ሳኣ ስሚደ፥ ቃማ ያን አቄዳ።12ዎንተ ጋላስ ኢያሱ ጉሪደ ደንዴዳ፤ ቄሳቱካ መና ጎዳ ቃላ ጫቁዋ ታቦታ ቶኬድኖ።13ላፑን ማላካታቱዋ ኦይቂደ ላፑን ቄሳቱ ስንዉ አደ፥ ማላካታቱዋ ፑኒደ መና ጎዳ ቃላ ጫቁዋ ታቦታ ስንን ሀመቴድኖ። ኦላዉ ጊጌዳዋንቱ ህንቱቱፐ ስንና ሀመቴድኖ፤ ጉየና ናግያ ኦላንቻቱካ መና ጎዳ ቃላ ጫቁዋ ታቦታ ጉየና ካሌድኖ። ሄ ዎድያ ኡባን ማላካታቱ ፑነቲኖ።14ላኤን ጋላስ ካታማ እት ገደ ዩይ አደ፥ ባረንቱ ዱንካኔዳ ሳኣ ስሜድኖ። ኡሱፑን ጋላሳ ጋካናዉ ሄዋዳን ሀኔድኖ።15ላፑን ጋላስ ጻልቂ ዶልያ ዎደ ደንዲደ፥ ካሰዋዳን ካታማ ላፑ ገደ ዩይ ዩይ አድኖ። ካታማ ኡንቱንቱ ላፑ ገደ ዩይ ዩይ አዳዌ ሄ ጋላስ ጻላላና።16ላፑን ዩሻን፥ ቄሳቱ ማላካታቱዋ ፑንያ ዎደ፥ ኢያሱ አሳ፥ “መና ጎዳይ ካታማ ህንተንቶ አደ እሜዳ ድራዉ፥ ዋስተ!17ካታማይነ ካታማ ግዶን ደእያባይ ኡባይ መና ጎዳዉ ሸቀቶዋ ግዲደ፥ ያናዉ በሰ። ኑን ጋድያ ጌዳናዉ ኪቴዳ አሳቱዋ ቆሳደ አሼዳ ድራዉ፥ ሻርሙጽያ ራኣባነ እ ሶን እዝና እትፐ ደእያ አሳ ጻላላይ አታናዋ።18ሽን ህንተንቱ ሸቃ ግዴዳባፐ አያነ አከናዳን ህንተንቱ ሁጲያዉ ናገትተ። ሸቃ ግዴዳባፐ ህንተንቱ አኮፐ፥ እስራኤላቱ ዱንካኔዳ ሳኣ ባይያ ሳኣ ኦንታ፤ ያቲደ ሄ ሳአዉ መቱዋ አሀንታ።19ብራይነ ዎርቃይ ኡባይ፥ ቃይ ናሃስያፐነ ብራታፐ መቴዳ ሚሻቱ ኡባይ መና ጎዳዉ ጌዬዳዋ ግድኖ። ኡንቱንቱ መና ጎዳ ሚሻ ምንጅያ ሳኣን ደእኖ” ያጌዳ።20ሄዋ ድራዉ ማላካታቱ ፑነትና አሳይ ዋሴዳ። ማላካታቱ ፑኑዋን አሳይ ባረ ቃላ ቁ ኦደ ዋሴዳ፤ ኤለካ ካታማ ድርሳ ግምቢ ኩንድ አጌዳ! ሄዋፐ ጉይያን አሳይ ኡባይ ስንዉ ላዉሁ ግ ገልነ ካታማ ኦይቂ አጌዳ።21ካታማን ሸምፑዋና ፓጻ ደኤዳዋ ኡባ፥ ማጫዋ አቱማዋ፥ ናናቱዋ ጭማ፥ ሚዛ፥ ዶርሳነ ሀርያ ኡባ ቃራ ማሻን ዉርስ ዎዳ።22ኢያሱ ቢታ ጌዳናዉ ኪተቴዳ ላኡ አሳቱዋ፥ “ሻርሙጻት ራኣብ ሶ ቢደ ካሰ ህንተንቱ እዝዉ ጫቄዳዋዳን፥ እዞነ እዝዉ ደእያዋ ኡባ ጋጻ ከስተ” ያጌዳ።23ቢታ ጌዴዳ ዎዳላቱ ቢደ፥ ራኣቦ፥ እ አዉዋ፥ እ ዳዮ፥ እ እሻቱዋነ እዝዉ ደእያዋ ኡባ ጋጻ ከሴድኖ። እስራኤልያ አሳይ ዱንካኔዳ ሳኣፐ ጋጻና ዎድኖ።24ሄዋፐ ጉይያን ካታማነ አ ግዶን ደእያዋ ኡባ ታማን ጹጌድኖ፤ ሽን ብራነ ዎርቃ ቃይ ናሃስያፐነ ብራታፐ መቴዳ ሚሻቱዋ መና ጎዳ ሚሻ ምንጅያ ሳኣን ዎድኖ።25ሽን ኢያሱ ሻርሙጻቶ ራኣቦ እ አዉዋ ሶ አሳናነ እዝዉ ደእያ ኡባባና ሀይቁዋፐ አሼዳ። አያዉ ጎፐ፥ ኢያሱ ያርኮ ካታማ ጌዳናዉ ኪቴዳ አሳቱዋ እዛ ካሰ ቆሳደ አሻዱ። እዝ ዛራቱ ሀቼ ጋካናዉ እስራኤልያ ቢታን ደኢኖ።26ሄ ዎደ ኢያሱ፦“ደንዲደ ሀ ያርኮ ካታማዛረ ኬጽያ ኡራይ፥መና ጎዳ ስንን፥ሸቀቴዳዋ ግዶ።ብሮ ባሱዋ ባስያ ዎደ፥አ ባይራ ናአይ ሀይቆ።ፐንግያ ኤስያ ዎደ፥አ ዉርሰ ቴፋ ናአይ ሀይቆ”ያጊደ ሸቄዳ።27መና ጎዳይ ኢያሱና ግዴዳ፤ ኢያሱ ዋሪ ቢታ ኡባ ጋኬዳ።