ዮናሰ ናናዌ ቡሳነ አሳ ናጋራ ፓጸ
1መና ጎዳ ቃላይ ላኤንዋ ዮናሳኮ ሀዋዳን ያጊደ ዬዳ፤2“ደንዳ! ሄ ዎልቃማ ካታማ ነነዌ ባ፤ ታን ነዉ ኦድያ ቃላ ኡንቱንቶ ማርካታ” ያጌዳ።3ዮናስ ደንዲደ፥ መና ጎዳ ቃላዳን ነነዌ ቤዳ። ናናዌ ሎይ ዎልቃማ ካታማ፤ ሀ ጋጻፐ ያ ጋጻ ጋካናዉ ሄዙ ጋላሳ ሀመትሴ።4ዮናስ ካታማ ብ ጋኪደ፥ እት ጋላሳ ኦግያ ካታማ ግዱዋኮ ሀመቴዳ፤ ሀመቲደ፥ “ኦይታሙ ጋላሳፐ ጉየ፥ ናናዌ ያና” ያጊደ አዋዬዳ።5ያትና፥ ነነዌ አሳይ ጾሳ አማኔዳ፤ ጾማ አዋዬዳ። ዎጋፐ ቄራ ጋካናዉ፥ ኡባይካ ማቅያ ማዬድኖ።6ኦዱ ነነዌ ካትያኮ ጋኬዳ፤ እ ባረ ካዉተ አራታፐ ዎደ፥ ካዉተ ማዩዋ ማዬዳዋካ ቃሪደ፥ ማቅያ ማዪደ፥ ብድንን ኡቴዳ።7ያትደ ነነዌ አሳዉ ሀዋዳን ያጊደ አዋይሴዳ፤ “ካትያፐነ ካትያ ኦሳንቻቱዋፐ እመቴዳ አዛዙዋ ማራን፥ ሀቼፐ ዶሚደ፥ አሳይነ መሂ፥ ሚዛይነ ዶርሳይካ ኡባይ አያነ እንጻርሳን ላጮፕኖ፤ ሃካ ጋንጾፕኖ።8አሳይካ መሂካ ማቅያ ማዮ፤ አሳይ ኡባይ ምንሲደ ጾሳኮ ዋሶ፤ ባረንቱ ኢታ ኦግያፐነ ናቆ ኦሱዋፐካ ስምኖ።9ያትንቶ ኦን ኤሪ፥ ጾሳይ ኑዉ ቃረቲደ፥ ኑን የናዳን፥ ባረ ዎልቃማ ሀንቁዋፐ ስማነንቶነ” ያጌዳ።10ኡንቱንቱ ባረንቱ ኢታ ኦግያፐ ስሜዳዋ ጾሳይ በኤዳ ዎደ፥ ኡንቱንቶ ቃረቲደ፥ ኡንቱንቱ ቦላ አሀና ጌዳ ኢታባ አግ ባሼዳ።