ባብሎነ ቦላን ጉጃ ፕርዳ
1መና ጎዳይ ሀዋዳን ያጌ፤ “ባብሎነ አሳነ ባብሎነ ቢታ ይስያ ጫርኩዋ ታን ኪታና።2ታን ባብሎነ ቦላ አላጋቱዋ፥ ጫርኩዋዳን ፑንያዋንታ ኪታና፤ አ ቢታ አይነ ባይናዋ ኦና። አ ባየ ጋላስ ኡንቱንቱ ኡባ ሳና አ ዶዳና።3አ ኦላንቻቱ ዎንዳፍያ ዱካናዉ ዎይ ባረንቱ ኦላ ሚሻ ዳንጫናዉ ናጎፕተ። አ ያላጋቱዋ አሾፕተ፤ አ ኦላንቻቱዋ ሙልያ ይስተ።4ኡንቱንቱ ባብሎነ ቢታን ሲፈት ዉራና፤ ኡንቱንቱ ካታማቱዋ ኦገቱዋንካ ጫደት ኩንዳና።5እስራኤልያ ቢታይነ ይሁዳ ቢታይ እስራኤልያ ጌሻ፥ ታና፥ ናቄዳ ናጋራን ኩሜዳዋ ግዶፐነ፥ እስራኤልያ ግድና፥ ይሁዳ ግድና፥ ላኡዋካ ታን ኡንቱንቱ ጾሳይ፥ ኡባፐ ዎልቃማ መና ጎዳይ አምአቲዳን የጋበይከ።6“ባብሎነፐ ባቃትተ! አሳይ ኡባይ ባረ ሸምፑዋ ሸምፑዋ አሾ! እ ኦዳ ናጋራ ጋሱዋን ህንተ ዎፕተ! ሀዌ ዎዲ ታን መና ጎዳይ ታ ሀሉዋ ከስያ ዎደ።7ባብሎነ ሳኣን ደእያ አሳይ ኡባይ ኡሺደ ማትያ ዎይንያ ኤሳይ ትገትያ፥ መና ጎዳ ኩሽያን ደእያ ዎርቃ ዋንጫ ማላ። ካዉተቱ ኡባቱ ሄ ዎይንያ ኤሳ ኡሺደ ጎዬድኖ።8ባብሎነ ቆፐናን ኩንዲደ መኤዳ። ሄዋ ድራዉ፥ አዉ ዬክተ! አ ማዱዉ ልያ እምተ። ኦን ኤሪ፥ እ ፓጻነንቶነ።9ባብሎነን ደእያ አላጋ አሳቱ፥ ‘ኑን ባብሎነ ፓናዉ ኮዬዶ፤ ሽን ፓጻናዉ ዳንዳይቤና። አነ አ አግ ባሺደ፥ ኑ ቢታ ቢታ ስሜቶ። አያዉ ጎፐ፥ አ ፕርዳይ ሃኪደ፥ ሳሉዋ ጋኬዳ፤ ቦላ ሻርያ ጋካናዉ ፑደ ቄዳ’ ያጌድኖ” ያጌ።10እስራኤልያ አሳይ፥ “መና ጎዳይ ኑና ሻትንዳ! አነ ጽዮነ ቢደ፥ መና ጎዳይ ኑ ጾሳይ ኦዳዋ አሳዉ ኦዶይተ!” ያጋና።11መና ጎዳይ ባብሎነ ይሳናዉ ቆፋ ቃቼዳ ድራዉ፥ ሜዶናቱዋ ካተቱዋ ኦላዉ ደንዳ፤ መና ጎዳይ ባረ ጌሻ ጎልያ ሀሉዋ ሀዋዳን ኦደ ጭገታና። ሜዶናቱዋ ጋዳዋቱ ሀዋዳን ያጌድኖ፤ “ዎንዳፍያ ሌፍተ፤ ጎንዳለቱዋ ኦይቂተ!12ባብሎነ ቦላ ኦላ ባንድራ ደንተ፤ ናግያዋንታካ ምንተ! ዎችያዋንታካ ኡንቱንቱ ሳኣን ሳኣን ዎተ፤ ዙጊደ ናግያ ኦላንቻቱዋካ ጊግስተ!” ያጌድኖ። አያዉ ጎፐ፥ መና ጎዳይ ባብሎነን ደእያ አሳ ቦላ ሃሳዬዳዋነ ቆፔዳዋ ኦና።13ባብሎነ፥ ኔን ዳሮ ሻፋቱነ ዳሮ ማጹ ኩሜዳ ቢታ፤ ሽን ነ ዉርሰይ ጋኬዳ፤ ኔን በሰና ኦግያን ደምያ ጎአይካ ዱጼዳ።14ኡባፐ ዎልቃማ መና ጎዳይ፥ “ቦሊ ቢታ ኩምያዋዳን፥ ታን አሳቱዋ ነ ቢታን ኩንና፤ ኡንቱንቱካ ኔና ጾኔዳ ናሸቻ ባረንቱ ቃላ ቁ ኦደ፥ ነ ቦላን ጋይራና” ያጊደ ባረ ሱንን ጫቄዳ።ጋላታ የ
15ጾሳይ ባረ ዎልቃን ሳኣ መዳ፤ባረ አዳ ኤራተን ቢታ ባሴዳ፤ሳሎቱዋካ ባረ አኬካን ምጬዳ።16እ ሃሳይያ ዎደ፥ሳሉዋን ደእያ ሃቱ ጉሚኖ።ሻራቱዋ እ ሳኣ ጋጻፐ አዬ።ቃይ እራይ ቡክያ ዎደካ፥ዋልቃን ዎልቃምሴ።ባረ ምንጅያ ሳኣፐካ ጫርኩዋ ከሴ።17አሳይ ኡባይ አኬካይነ ኤራይ ባይናዋ።ቃይ ዎርቃ ትጊደ፥ኤቃ ምስለቱዋ መያዋንቱ ኡባቱ ዬላቴድኖ።አያዉ ጎፐ፥ ኡንቱንቱ ምስለቱ ዎርዶነ ሸምፑ ባይናዋንታ።18ሄ ምስለቱ ፓናዋንታነ፥ካቴዳዋንታ።ኡንቱንቱ ቦላን ፕርዳይ ይያ ዎደ፥ ኡንቱንቱ ያና።19ሽን ያቆባ ጾሳይ፥ሄዋ ማላ ግደና።አያዉ ጎፐ፥ እ ኡባባ መዳዋ።እስራኤልያ አሳይ እ ባረዉ ዶሬዳ ዛረ።አ ሱንይካ ኡባፐ ዎልቃማ መና ጎዳ።ጾሳ ድጅኑዋ
20ጾሳይ ሀዋዳን ያጌ፤ “ባብሎነ፥ ኔን ታ ድጅኑዋነ ታ ኦላ ሚሻ። ኔናን ጎኤታደ ታን ቢታቱዋ መንሬድ፤ ካዉተቱዋካ ይሳድ።21ኔናን ጎኤታደ ፓራቱዋነ ፓራ ቶግያዋንታ፥ ፓራ ጋረቱዋነ ኡንቱንታ ላግያዋንታ መንሬድ።22ኔናን ማጫዋነ አቱማዋ፥ ጭማነ ናናቱዋ፥ ዎዳላቱዋነ ጌላዮቱዋ መንሬድ።23ኔናን ሄንንቻነ አ ዉድያ፥ ጎሽያዋነ አ ዋ ቦራቱዋ፥ ደርያ ሞድያዋንታነ ካፖቱዋ መንሬድ” ያጌ።ባብሎነ ፕርዳ
24መና ጎዳይ ሀዋዳን ያጌ፤ “ባብሎነ አሳይነ ባብሎነን ደእያዋንቱ ጽዮነ ቦላ ኦዳ ኢታ ሀሉዋ ታን ህንተ ጼልሽን ከሳና።25“ኔኖ፥ ባብሎነ፥ ኔን ቢታ ሳኣ ባይዝያ ዎጋ ደርያ ማላ፤ ሽን ታን መና ጎዳይ ኔና ሞርካይ። ታን ታ ኩሽያ የዳደ፥ ኔና ደርያ ቦላፐ ዱገ ጎንዶርሳና፤ ሄዋፐ ጉይያን፥ ኔን ጹገቴዳ ደርያ ግዳደ አታና።26ላኤን ኔፐ ባሱዋን የግያ ዎይ ግምቢያዉ አክያ ሹቻይ ደኤና፤ ኔን መናዉካ አይነ ባይናዋ ግዳናዋ። ታን መና ጎዳይ ሀዋ ኦዳይ።27“ባብሎነ ቦላ ኦላ ባንድራ ደንተ፤ አሳ ኡባ ግዶን ማላካታ ፑንተ። አ ኦላናዉ አሳ ኡባ ጊግስተ፤ አራራተ፥ ሚናነ አሽካናዛ ካዉተቱዋ ጼስተ። ኦላ ጋዳዋካ ሱንተ፤ ቦልያ ኬሻ ዳሮ ፓራቱዋካ አህተ።28ባብሎነ ኦላናዉ ካዉተቱዋ ኡባ ጊግስተ፤ ሜዶና ካተቱዋ፥ ኡንቱንቱ ካፖቱዋ፥ ደርያ ሞድያዋንታነ ኡንቱንቱ ሞድያ ቢታ አሳ ኡባ ደንተ።29“ባብሎነ ኦንነ ደኤና ባዞ ኦናዉ መና ጎዳይ ሀልቼዳ ሀልቹዋ ፖልያ ድራዉ፥ ቢታይ ኡባይ ኮኮረነ ፖርቃካቴ።30ባብሎነ ኦላንቻቱ ኦላ ኦለትያዋ አጌድኖ፤ ባረንቱ ጌሱዋን ኡት ባሼድኖ። ኡንቱንቱ ዎልቃይ እጽና፤ ኡንቱንቱ ማጫ አሳ ማላ ግዴድኖ። ኡንቱንቱ ጎላቱካ ጹገቴድኖ፤ ኡንቱንቱ ካታማ ዩሹዋ ግምቢያ ፐንገቱዋ ኩልቡካ መኤድኖ።31ሀ ጋጻፐ ህን ጋጻ ጋካናዉ፥ ካታማይ ሞርክያን ኦይቀቴዳዋ ባብሎነ ካትያዉ ኦዳናዉ፥ ዎጽያዌ ዎጽያዋ ካሊደ፥ ኪተቴዳዌካ ኪተቴዳዋ ካሊደ ቢኖ።32ቃይ ሻፋና ፕንያ ሳአቱ ኦይቀቴዳዋ፥ ሻፋ ዩሹዋን ደእያ ዎራይ ጹገቴዳዋነ ኦላንቻቱ ዳጋሜዳዋ ኡንቱንቱ ካትያዉ ኦዳናዉ ቢኖ” ያጌ።33ኡባፐ ዎልቃማ መና ጎዳይ፥ እስራኤልያ ጾሳይ ሀዋዳን ያጌ፤ “ባብሎነ ቢታይ ካ ቆጽያ ኡዱማ ማላ፤ ጉ ዎድያፐ ጉይያን፥ እ ጫከትያ ዎዲ ያና” ያጌ።ጾሳይ እስራኤልያ አሳ ማዳና
34ባብሎነ ካቲ ናቡካዳናጾር ኑና ዉርሲደ ሜዳ፤ ኑ ካታማካ መላ ደእያ ኦቱዋ ማላ ከሴዳ። ዳዊ ምትያዋዳን፥ አ ምቴዳ፤ ማልኦባ ሚደ ኩንዳዋዳን፥ እ ኑ አቁዋን ባረ ጋንጅያ ኩንዳ፤ ያቲደ አቴዳዋ ሙጪደ ጩቼዳ።35ሄዋ ድራዉ፥ ጽዮነ አሳይ፥ “ባብሎነ ኑ ቦላነ ኑ አሳ ቦላ ኦዳ ኢታባይ ኡባይ አ ቦላ ስሞ።” የሩሳላመ አሳይ፥ “ኑ ሱ አጩ ባብሎነን ደእያ አሳ አቾ” ያጌ።36ሄዋ ድራዉ፥ መና ጎዳይ የሩሳላመ አሳዉ ሀዋዳን ያጌ፤ “ነ ድራዉ ታን ሞተታና፤ ነ ሀሉዋካ ታን ከሳና። ታን ባብሎነ ሃ መልሳና፤ አ ፑልቶቱዋካ ቶይሳና።37ባብሎነ ሹቻ ኬላነ ዎራካናቱ ደእያ ጌሶ ግዳናዋ። ቃይ አ በኤዳ ኡባይ ዳጋማናነ፥ ‘ፖራ!’ ጋና። አን እት አሳይነ ላኤን ደኤና።38ባብሎነ አሳይ ኡባይ ጋሙዋዳን ጉዳና፤ ቃይ ጋሙዋ ማራዳን ዳራና።39ኡንቱንቶ ቦላይ ሆእያ ዎደ፥ ታን ኡንቱንቶ ናሸችያ ኡሻ ግብራ ጊግሳና፤ ኡንቱንቱ ሄዋፐ ኡሺደ፥ ባረንታ ዶጋና ጋካናዉ፥ ታን ኡንቱንታ ማያና። ኡንቱንቱ ላኤን ደንደናዳን፥ መናዉ ገምእሻና። ታን መና ጎዳይ ሀዋ ኦዳይ።40ሹካናዉ አፍያ ዶርሳቱዋዳን፥ ዶርሳ ኦርገቱዋዳንነ ዴሻ ኦርገቱዋዳን፥ ታን ኡንቱንታ ሹካዉ አፋና።ባብሎነ ቦላ ጋካናባ
41“አሳይ ኡባይ ሳቢያ ባብሎነ ኦይቀቴዳ! ባብሎነ ካዉተቱዋ ኡባ ግዶን አይባ ዳጋንያባ ግዴዴ!42ባብሎነ ሞርከቱ አባ ቤታይ ደንድያዋዳን ደንዲደ፥ ካታማን ኤሌድኖ።43አ ካታማቱ ኮለቲደ፥ ዳጋንያባ ግዴድኖ፤ እራይ ቡከና ባዞ ቢታ፥ አይ አሳይነ ደኤና ቢታነ አሳ ናአይ ግዱዋና አና ቢታ ግዴድኖ።44ቤላ ግያ ባብሎነ ጾሳ ታን ሙራና፤ እ ምቴዳዋካ ታን አ ኡሉዋፐ ከስሳና። ሄዋፐ ጉይያን፥ ካዉተቱ አኮ ዙልያዋ አጋና፤ ባብሎነ ግምቢካ ኩንዳና።45“ታ አሳዉ፥ አ ግዶፐ ከስተ! ህንተ ኡባይካ መና ጎዳ ሀንቁዋ ሱሉዋፐ ህንተ ሁጲያ ሁጲያ አሽተ!46ቢታን ኦደትያ ኦዱዋ ስስያ ዎደ፥ ህርጎፕተነ ያዮፕተ! ላይን ላይን ኦዱ ኦዱዋ ካል ካሊደ ያና። ሄ ዎደ ካቲ ካትያ ቦላ ደንድያ ማካላ ኦዱ ቢታን ስሰታና።47“ሄዋ ድራዉ፥ ታን ባብሎነ ኤቃ ምስለቱዋ ሙርያ ጋላሳቱ ያና። ሄ ቢታይ ኡባይካ ዬላታና፤ ሲፈቴዳዋንቱ ኡባይ ካታማ ግዶን ኩንዳና።48ሁጲሳ ባጋፐ ይያ ባይዝያዋንቱ ኩሽያን ባብሎነ ኦይቀትያ ድራዉ፥ ሳሉነ ሳአይ ቃይ ኡንቱንቱ ግዶን ደእያ ኡባባይ እልላና። ታን መና ጎዳይ ሀዋ ኦዳይ።49ባብሎነ እስራኤልያ አሳነ ሀራ ቢታን ደእያ አሳ ኡባ ዎዳዋዳን፥ ባብሎነ አሳይካ ሀይቃናዉ ኮሼ።ባብሎነን ደእያ እስራኤላቶ ኦደቴዳ ትምቢትያ
50“ታ አሳዉ፥ ህንተ ኦላፐ ከስ አኬድታ። ሄዋ ድራዉ፥ ቢተ! ሀዋን ኤቆፕተ! ህንተ ደእያ ሃኮ ቢታንካ ታና መና ጎዳ ሀሳይተ፤ የሩሳላመካ ቆፕተ።51ህንተ፥ ‘ኑን ቦረቴዳ ድራዉ ካዉሼዶ፤ አላጋቱ መና ጎዳ ጎልያን ጌሻ ሳአቱዋ ገሌዳ ድራዉ፥ ኑን ዬላ ማዬዶ’ ያጌድታ።52“ሽን ታን መና ጎዳይ ባብሎነ ኤቃቱዋ ሙርያ ዎዲ ያና። ደሸቴዳዋንቱ ቢታ ኡባን ኦላና።53ባብሎነ ሳሉዋ ፑደ ከሲደ፥ ያን ጌሱዋ መናዉ ዳንዳይንቶነ፥ ያ ጋካናዉ ከሲደ፥ አ ያን ባይዝያ አሳ ታን ኪታና። ታን መና ጎዳይ ሀዋ ኦዳይ።ባብሎነ ያና
54“ባብሎነፐ አሳ ዋሱዋ ኮሻይ፥ ባብሎነ ቢታፐ ዎልቃማ ባየ ኮሹንቻይ ስሰታና!55አያዉ ጎፐ፥ መና ጎዳይ ባብሎነ ባይዛና፤ አ ዎልቃማ ኮሻካ ጮኡ ኦና። አባ ቤታዳን ጉምያ ሞርከቱ ዎራጂደ ጋርማማና።56ባይዝያዋንቱ ባብሎነ ቦላ ያና፤ አ ኦላንቻቱ ኦይቀታና፤ ኡንቱንቱ ዎንዳፊካ መአና። ታን መና ጎዳይ ሀሉዋ ከስያ ጾሳ ግድያ ድራዉ፥ ኡንቱንቱ ኦሱዋዳን ታን ኡንቱንቶ ዛራና።57ታን አ ካፖቱዋ፥ አ አዳ ኤራንቻቱዋ፥ አ ደርያ ሞድያዋንታ፥ አ ኦላ ጋዳዋቱዋነ አ ኦላንቻቱዋ ማያና፤ ኡንቱንቱ ላኤን ደንደናዳን፥ መናዉ ገምእሻና። ታን ካቲ፥ ኡባፐ ዎልቃማ መና ጎዳ ጌተትያዌ ሀዋ ኦዳይ” ያጌ።58ኡባፐ ዎልቃማ መና ጎዳይ ሀዋዳን ያጌ፤ “ኦርድያን ግምበቴዳ ባብሎነ ዩሹዋ ግምቢ ሳኣን ዋላከታና፤ አ አዱሳ ፐንገቱካ ታማን ጹገታና። አሳይ ኦዳዌ ኡባይ መላ፤ ካዉተቱካ ታማይ ማናባዉ ጮ ዳቡሪኖ” ያጌ።ኤርማስ ባብሎነ ኪታ የዴዳ
59ማህሴያ ናኣ ኔርያ ናአይ ሳራይ ካትያ ሰደቅያሳዉ ኦያ ካፑዋ። ሰደቅያስ ይሁዳን ካተቴዳ ኦይደን ላይ፥ ሳራይ አናና ባብሎነ ብያ ዎደ ኤርማስ ሳራያ ቦላ ኪታ የዴዳ።60ባብሎነ ቦላን ጋካናዉ ደእያ ኢታባ ኡባነ ባብሎነ ጼልያ ሀራባ ኡባ ኤርማስ እት ጻ ማጻፋን ጻፌዳ።61ሳራያ ሀዋዳን ያጌዳ፤ “ኔን ባብሎነ ቢታ ጋኬዳ ዎደ፥ ነ ቃላ ቁ ኦደ፥ አሳዉ ሀ ማጻፋ ናባባ።62ቃይ ሀዋዳን ያጋደ ዎሳ፤ ‘አቤት መና ጎዳዉ፥ ኔን፥ “ታን ሀ ሳኣ ባይዛና፤ ሀ ሳኣን ፓጻ ቃጽያ መት፥ አሳይካ፥ መሂካ ደኤና፤ ሀ ሳአይ መናዉ ባዞ ግዳናዋ” ያጋዳ’ ያጋ።63ሀ ጻ ማጻፋ ናባባደ ዉርሴዳዋፐ ጉይያን፥ ሹቻ ሄ ማጻፋና ጋ ቃቻደ፥ ኤፍራጺሳ ሻፋን ኦላ።64‘ታን ጾሳይ አ ቦላን አህያ ኢታ ጋሱዋን፥ ባብሎነካ ሀዋዳን ላኤን ደንደናዳን ሙከታና’ ያጋይ ያጋ” ያጌዳ። ኤርማስ ሃሳዬዳ ቃላይ ሀዋን ፖለቴዳ።