ግብጼን ደእያ አይሁዳቶ ኦደቴዳ ጾሳ ቃላ
1ግብጼ ቢታን ምግዶላ፥ ጻፍናሳነ መምፒሳ ጌተትያ ካታማቱዋንነ ገድሳ ባጋና ደእያ ፓትሮሳ ቢታን ደእያ አይሁዳቱዋ ጼልያዋን ጾሳ ቃላይ ኤርማሳኮ ሀዋዳን ያጊደ ዬዳ፤2“ኡባፐ ዎልቃማ መና ጎዳይ፥ እስራኤልያ ጾሳይ፥ ሀዋዳን ያጌ፤ ‘የሩሳላመ ቦላንነ ይሁዳ ካታማቱዋ ኡባ ቦላን ታን አሄዳ ባየ ኡባ ህንተ ህንተ ሁጲያን በኤድታ። ኡንቱንቱ ሀች ጋካናዉ፥ ኮለት ኡቴድኖ፤ ኦንነ ያን ደኤና።3ሄዌ ሀኔዳዌ ኡንቱንቱ ኢታ ኦሱዋ ኦደ፥ ታና ሀንቀሲደ ድራሳ። ኡንቱንቱ ግድና፥ ህንተና ግድና፥ ዎይ ህንተ ማይዛ አዎቱዋ ግድና፥ ኦንነ ኤረና ሀራ ጾሳዉ እጻና ጩዋዪደ፥ አዉ ጎይኔድኖ።4“ሀዋ ማላ ታን ጾሳይ እጽያ ሸነይያባቱዋ ኦፕተ!” ያጊደ ኦዳና ማላ፥ ዛራ ዛራደ ታ ቆማቱዋ፥ ትምቢትያ ኦድያዋንታ፥ ኪታድ።5ሽን ኦድያዋ ኡንቱንቱ ስሰናን ዎይ ሀይዘናን እጼድኖ። ኡንቱንቱ ሀራ ጾሳቶ እጻና ጩዋይያ ኢታ ኦሱዋ አገናን እጼድኖ።6ሄዋ ጋሱዋን ታ ሱልያ ሀንቁነ ይሉ ትገቴዳ፤ ይሁዳ ካታማቱዋንነ የሩሳላመ ኦገቱዋን ኤጼዳ። ኡንቱንቱካ ሀች ህንተ በእያዋዳን፥ ኮለቴዳዋንታነ አይነ ባይናዋንታ ግዴድኖ’ ያጌ።7“ሀእካ መና ጎዳይ፥ ኡባፐ ዎልቃማ ጾሳይ፥ እስራኤልያ ጾሳይ፥ ሀዋዳን ያጌ፤ ‘ህንተዉ ዘረይ ደኤና ማላ፥ ማጫ አሳ፥ አቱማ አሳ፥ ናናቱዋነ ዘረ ይሁዳ ቢታፐ ይሳናዳን፥ ሀ ሎይ ኢታባ ህንተ ህንተ ቦላ አያዉ ኦቴ?8ህንተ ደአናዉ ገሌዳ ሀ ግብጼ ቢታን ሀራ ጾሳቶ እጻና ጩዋይያዋን ታና አያዉ ሀንቀቴ? ዎይ ሳኣን ደእያ ካዉተቱዋ ኡባ ግዶን ሸቃነ ቦረ ግዲደ፥ ህንተ ሁጲያ ባይዛናዉ አያዉ ኮዪቴ?9ካሰ ህንተ አዎቱ፥ ይሁዳ ካተቱነ ኡንቱንቱ ማቼቱ፥ ቃይ ህንተነ ህንተ ማቼቱ ይሁዳ ካታማቱዋንነ የሩሳላመ ኦገቱዋን ኦዳ ኢታተ ኡባ ዶጌድቴየ?10ህንተ ሀች ጋካናዉ፥ ህንተናተ ሆክስበይክታ፤ ታዉካ ያይበይክታ። ቃይ ታን ህንተዉነ ህንተ ማይዛ አዋቶ እሜዳ ህግያንነ ዎጋን ብበይክታ’ ያጌ።11“ሄዋ ድራዉ፥ ኡባፐ ዎልቃማ መና ጎዳይ፥ እስራኤልያ ጾሳይ፥ ሀዋዳን ያጌ፤ ታን ህንተና ይሁዳ ዘረ ኡባ፥ ይሳናዉ ቆፋ ቃቻድ።12ይሁዳን አቴዳዋንቱ ግዶፐ፥ ግብጼ ቢደ፥ ያን ደአናዉ ቆፋ ቃቼዳዋንታ ታን ይሳና። ኡንቱንቱ ኡባይ ግብጼን ዉራና፤ ኦላንነ ኮሻን ሀይቃና። ዎጋፐ ጉ ጋካናዉ ደእያ ኡባይ ኦላንነ ኮሻን ዉራና። ኡንቱንቱ ዳጋማ፥ ሸቃ፥ ቶሽያነ ቅሊጭያዋ ግዳናዋንታ።13ታን የሩሳላመ ኦላን፥ ኮሻንነ ኢታ ሀርግያን ሙሬዳዋዳን፥ ግብጼ ቢታን ደእያዋንታካ ሙራና።14አቴዳ ይሁዳ አሳቱዋፐ ግብጼን ደአናዉ ዬዳዋንቱ ግብጼቱዋ ኩሽያፐ ከስ አክክኖ። ኡንቱንቱ ስም ዪደ ደአና ጊደ አሞትያ ይሁዳ ቢታ አይ አሳይነ ስመና፤ ሀይቁዋፐ ፓላሄዳ እት አማራ አሳፐ አትና፥ ስሚደ ያና ሀራ አሳይ ደኤና ያጌ” ያጌዳ።15ባረንቱ ማጫ አሳቱ ሀራ ጾሳቶ እጻና ጩዋይያዋ ኤርያ አቱማ አሳቱ ኡባይነ ሄዋን ኤቄዳ ማጫ አሳቱ ኡባይ ዎልቃማ ማባራ ግዲደ፥ ግብጼን ገድሳ ባጋና ፓትሮሳ ግያ ሳን ደእያ አሳይ ኡባይ ኤርማሳ ሀዋዳን ያጌድኖ፤16“ኔን መና ጎዳ ሱንን ኑዉ ኦድያባ ኡባ ኑን ስሶኮ።17ኑን ኦና ጌዳዋ ኡባ ኦና። ኑን፥ ኑ ማይዛ አዎቱ፥ ኑ ካተቱነ ኑ ካፓቱ ይሁዳ ካታማቱዋንነ የሩሳላመ ኦገቱዋን ካሰ ኦዳዋዳን፥ ሳሉዋ ካታቶ ጌተትያ ኑ ጾሳትዉ እጻና ጩዊሳና፤ ኡሻ ያርሹዋካ እዉ ጉሳና። አያዉ ጎፐ፥ ኑን ካሰ ሄዋ ኦያ ዎደ፥ ኑዉ ዳሮ ቁማይ ደኤ፤ ሄ ዎደ ኑዉ ሳአይ ኬካ፤ ኑና አያይነ መትቤና።18ሽን ሳሉዋ ካታትዉ እጻና ጩዋይያዋነ ኡሻ ያርሹዋ ጉስያዋ አጎደፐ ሃ ስምና፥ ኑዉ ኡባባይካ ፓጬዳ፤ ኑን ኦላንነ ኮሻን ዉሬዶ” ያጌድኖ።19ማጫ አሳቱ ጉጂደካ ሀዋዳን ያጌድኖ፤ “ኑን ሳሉዋ ካታቶ ማላትያ ኡክ ኡክያ ዎደ፥ እጻና ጩዋይያ ዎደነ ኡሻ ያርሹዋ እዉ ጉስያ ዎደ ኡባን፥ ኑ አስናቱ ኤረናን ደእሺና፥ ኑን ኦዳዌ አያይነ ባዋ” ያጌድኖ።20አዉ ሄዋዳን ጊደ ዛሬዳ አሳዉ ኡባዉ፥ ማጫነ አቱማዎ፥ ኤርማስ ሀዋዳን ያጌዳ፤21“ህንተነ ህንተ ማይዛ አዎቱ፥ ህንተ ካተቱነ ህንተ ካፓቱ፥ ቃይ ቢታን ደእያ አሳይ ኡባይ ይሁዳ ካታማቱዋንነ የሩሳላመ ኦገቱዋን እጻና ጩዋዬዳዋ መና ጎዳይ ኤረና ዎይ ዶጌዳ ጊደ ቆፒቴ?22ህንተ ኦያ ኢታነ ሸነይያ ኦሱዋ መና ጎዳይ ጮኡ ጋናዉ ዳንዳይቤና ድራዉ፥ ህንተ ቢታይ ባዬዳ፥ ባዙዋነ ሸቀቴዳ ቢታ ኦዳ። ሀች ህንተ በእያዋዳን፥ ህንተ ቢታይ አሳይ ደኤና ቢታ ግዴዳ።23ሀ ባሻይ ኡባይ ህንተና ጋኬዳዌ ህንተ ሀራ ጾሳቶ እጻና ጩዋዬዳ ድራሳ፥ መና ጎዳ ናቄዳ ድራሳ፥ መና ጎዳ ቃላ ስሰናን እጼዳ ግሻሳነ አ ህግያዉነ አ ዎጋዉ አዛዘተናን እጼዳ ድራሳ” ያጌዳ።24ሄዋፐ ጉይያን፥ ኤርማስ አሳዉ ኡባዉ፥ ማጫነ አቱማዎ ሀዋዳን ያጌዳ፤ “ህንተኖ፥ ይሁዳፐ ዪደ፥ ግብጼ ቢታን ደእያ አሳቶ፥ ኡባይካ መና ጎዳይ ግያዋ ስስተ!25ኡባፐ ዎልቃማ መና ጎዳይ፥ እስራኤልያ ጾሳይ፥ ሀዋዳን ያጌ፤ ‘ህንተነ ህንተ ማቼቱ፥ “ኑን ሳሉዋ ካታትዉ እጻና ጩዊሳና፤ ኡሻ ያርሹዋካ እዉ ጉሳና” ጊደ ጫቄዳ ጫቁዋ ፖሊደ፥ ኦሱዋን በሴድታ። ሀእካ ግዶፐ፥ ህንተ ጫቁዋ ምንስተነ ፖልተ’ ያጌ።26“ግዶፐነ፥ ህንተኖ፥ ግብጼ ቢታን ደእያ ይሁዳ አሳቶ፥ መና ጎዳይ ግያዋ ስስተ! መና ጎዳይ ሀዋዳን ያጌ፤ ‘ሀዋፐ ህን ባጋን ግብጼ ቢታን ደእያ ይሁዳ አሳፐ እቱነ ታ ሱንን፥ “ኡባ ሞድያ መና ጎዳይ ኤሮ!” ጊደ ጫቀና ማላ፥ ታን ታ ዎልቃማ ሱንን ጫቃድ።27ታን ኡንቱንቱ ቦላ ሎኦባ አሀናዉ ግደናን፥ ኢታባ አሀናዉ ጼላይ። ግብጼን ደእያ ይሁዳ አሳይ ኡባና ዉራና ጋካናዉ፥ ኦላንነ ኮሻን ሀይቃና።28ሽን ኦላፐ አቴዳ እት አማሬዳዋንቱ ግብጼፐ ይሁዳ ስማና። ሄ ዎደ ግብጼን ደእያ ይሁዳ አሳይ ታ ቃላፐነ ኡንቱንቱ ቃላፐ ኦግ ቱማቴደንቶነ አኬኪደ ኤራና።29“ ‘ታን ህንተና ሀ ሳኣን ሙራናነ፥ “ታን ህንተ ቦላ ኢታባ አሀና” ጌዳዌ ቱማታናዎ፥ ታን መና ጎዳይ ህንተዉ ማላ እማይ:30ታን ይሁዳ ካትያ ሰደቅያሳ አዉ ሞርከ ግዲደ፥ አ ዎናዉ ኮይያ ባብሎነ ካትያ ናቡካዳናጾራዉ አደ እሜዳዋዳን፥ ግብጼ ካትያ ሆፍራካ አ ዎናዉ ኮይያ አ ሞርከቶ አደ እማና። መና ጎዳይ ሀዋ ኦዳይ’ ያጌ” ያጌዳ።