ግብጼ ቤናዳን ጾሳይ ኦዴዳ
1ኦላ ጋዳዋቱ ኡባይ፥ ቃሬሀ ናአይ ዮሀናን፥ ሆሻያ ናአይ አዛርያስነ አሳይ ኡባይ፥ ጉፐ ዎጋ ጋካናዉ ዪደ፥2ትምቢትያ ኦድያ ኤርማሳ ሀዋዳን ያጌድኖ፤ “ኑን ኔና ኦችያዋ ኑዉ ኦርኪ! ሀ አቴዳ ኑ ድራዉ መና ጎዳ ነ ጾሳ ዎሳርኪ! ኑን ካሰ ዳራ፤ ሽን ሀእ ኔን በእያዋዳን፥ ጉቱዋ ጻላላይ አቴዶ።3ኑን ብያ ኦግያነ ኑን ኦናባ እ ኑና በሳናዳን፥ መና ጎዳ ነ ጾሳ ኑ ድራዉ ዎሳ” ያጌድኖ።4ትምቢትያ ኦድያ ኤርማስ ዛሪደ፥ “ሎአ። ህንተ ጌዳዋዳንካ፥ መና ጎዳ ህንተ ጾሳ ታን ዎሳና፤ ቃይ ህንተፐ አያነ ቆሰናን፥ መና ጎዳይ ኦድያባ ኡባካ ህንተዉ ኦዳና” ያጌዳ።5ኡንቱንቱ ዛሪደ፥ ኤርማሳዉ ሀዋዳን ያጌድኖ፤ “መና ጎዳይ ነ ጾሳይ ነ ባጋና ኑዉ ኪትያዋ ኡባ ኑን ፖላና ዮፐ፥ ጾሳይ ባረ ሁጲያን ኑ ቦላ ቱሙነ አማነቴዳ ማርካ ግዶ።6ኑን ዶስያዋ ግድና፥ እጽያዋ ግድናካ፥ ኑን ኔና አኮ ኪትያ መና ጎዳይ ኑ ጾሳይ አዛዝያዋ ኑን ኦና። አያዉ ጎፐ፥ መና ጎዳዉ አዛዘቶፐ፥ ኑዉ ኡባባይ ሎአ ግዳናዋ” ያጌድኖ።7ታሙ ጋላሳፐ ጉይያን፥ መና ጎዳ ቃላይ ኤርማሳኮ ዬዳ።8ያትና፥ እ ቃሬሀ ናኣ ዮሀናና፥ አናና ደእያ ኦላ ጋዳዋቱዋነ አሳ ኡባ፥ ጉፐ ዎጋ ጋካናዉ ጼጊደ፥9ሀዋዳን ያጌዳ፤ “ህንተ ዎሳ ታን አኮ ሺሻና ማላ፥ ህንተ ታና ኪቴዳ መና ጎዳይ እስራኤልያ ጾሳይ ሀዋዳን ያጌ፤10‘ህንተ ሀእ ሀ ቢታን ኡቶፐ፥ ታን ህንተና ኬጻናፐ አትና ኮልከ፤ ቶካናፐ አትና፥ ሾድከ። አያዉ ጎፐ፥ ታን ካሰ ህንተ ቦላን አሄዳ ኢታባይ ታና ካዮዬዳ።11ህንተ ሀእ ያይያ ባብሎነ ካትያዉ አይነ ያዮፕተ! ህንተና አ ኩሽያፐ አሻናዉ ታን ህንተናና ደእያ ድራዉ ያዮፕተ! ታን መና ጎዳይ ሀዋ ኦዳይ።12ታን ህንተዉ ቃረታና፤ ያታደ እ ህንተዉ ቃረቲደ፥ ህንተና ህንተ ቢታዉ ዛራናዳን ኦና’ ያጌ።13“ሽን ህንተ መና ጎዳዉ፥ ህንተ ጾሳዉ፥ አዛዘተናን እጺደ፥ ‘ሀ ቢታን ኡቶኮ’ ጎፐ፥14ቃይ ህንተ፥ ‘ኦላ ዎርያነ ኦላዉ ፑንያ ማላካታ ስሰናሳንነ ኮሻይ ባይናሳ ግብጼ ቢደ፥ ያን ደአና’ ጎፐ፥15ህንተኖ ይሁዳን አቴዳዋንቶ፥ መና ጎዳይ ህንተና ግያዋ ስስተ። ኡባፐ ዎልቃማ መና ጎዳይ፥ እስራኤልያ ጾሳይ ሀዋዳን ያጌ፤ ‘ህንተ ግብጼ ቢደ፥ ያን ደአናዉ ቆፋ ቃቾፐ፥16ሄ ህንተ ያዬዳ ኦላይ ግብጼን ህንተና ኦይቃና፤ ህንተ ህርጌዳ ኮሻይካ ህንተና ካሊደ ባና፤ ህንተካ ያን ግብጼን ሀይቃና።17ግብጼ ቢታ ቢደ ደአናዉ ቆፋ ቃቼዳ አሳይ ኡባይ ኦላን፥ ዎይ ኮሻን ዎይ ኢታ ሀርግያን ሀይቃና። ታን ኡንቱንቱ ቦላን አህያ ኢታባፐ እቱነ ከስ አከና፤ እቱነ አተና’ ያጌ።18“ኡባፐ ዎልቃማ መና ጎዳይ፥ እስራኤልያ ጾሳይ ሀዋዳን ያጌ፤ ‘የሩሳላመን ደእያዋንቱ ቦላን ታ ሀንቁነ ታ ይሉ ጉኬዳዋዳን፥ ህንተ ግብጼ ገልያ ዎደ ህንተ ቦላንካ ታ ሀንቁ ሄዋዳን ጉካና። ህንተ ዳጋማ፥ ሸቃ፥ ቶሽያነ ቅሊጭያዋ ግዳንታ፤ ሀ ሳኣ ላኤን ኡባካ በእክታ’ ያጌ።19“ይሁዳን አቴዳዋንቶ፥ መና ጎዳይ ህንተና፥ ‘ግብጼ ቦፕተ!’ ያጌዳ። ታን ሀች ህንተና፥ ‘የኤ!’ ጌዳዋ ኤርተ።20ህንተ ታና፥ ‘ኑ ድራዉ መና ጎዳ ኑ ጾሳ ዎሳ፤ እ ነዉ ኦድያባ ኡባካ ኑዉ ኦዳ፤ ኑን ኦና’ ያጊደ፥ ታና መና ጎዳኮ፥ ህንተ ጾሳኮ፥ ኪቴድታ፤ ሄዋን ዎልቃማ ባላ ባሌድታ።21እ ጌዳዋ ኡባ ሀች ህንተዉ ኦዳድ። ሽን መና ጎዳይ ህንተ ጾሳይ ታ ባጋና ህንተዉ ኪቴዳ ቃላዉ ህንተ አዛዘተናን እጼድታ።22ስም ሀዋ ኤርተ: ህንተ ቢደ ደአናዉ ኮይያ ቢታን ህንተ ኦላን፥ ኮሻንነ ኢታ ሀርግያን ሀይቂደ ዉራና” ያጌዳ።