Read ኤርማሳ 10

ኤርማሳ10dwr_ent

ጾሳነ ኤቃ

¹ህንተኖ፥ እስራኤልያ አሳቶ፥ መና ጎዳይ ህንተዉ ኦድያ ቃላ ስስተ!²መና ጎዳይ ሀዋዳን ያጌ፤ “ደረቱዋ ኦግያ ህንተ ታማሮፕተ። ደረቱ ሳሉዋ ቦላ ማላታ በኢደ ዳጋሞፐካ፥ ህንተ ዳጋሞፕተ።³አያዉ ጎፐ፥ ደረቱዋ ዎጋይ መላ። ኡንቱንቱ ም ዎራፐ ቃንጺኖ፤ ማስያዌ ካልታን ማሴ።⁴ኡንቱንቱ ብራንነ ዎርቃን አሌቂሲኖ፤ ቃጸናዳን ማዶሻን ምስማርያ ሺደ ኦይኖ።⁵ኡንቱንቱ ኤቃቱ ኡንቱንቱ ሌክያ ጋርሳን ካፉዋ ዳጋንናዉ ኤስያ ምስልያ ማላ። ሃሳያናዉ ዳንዳይክኖ። ሀመታናዉ ዳንዳየና ድራዉ፥ አሳይ ኡንቱንታ ቶኬ። ኡንቱንቶ ሙለካ ያዮፕተ። አያዉ ጎፐ፥ ኡንቱንቱ ህንተና ቆሀናዉ ዳንዳይክኖ፤ ቃይ ማዳናዉካ ዳንዳይክኖ” ያጌ።⁶አቤት መና ጎዳዉ፥ ነ ማላይ ኦንነ ባዋ። ኔን ዎልቃማ፤ ነ ሱንይካ ዎልቃማነ ዎልቃማ።⁷አቤት ካዉተቱዋ ካትያዉ፥ ኔና ቦንቼናን አጋናዌ ኦኔ? ኔና ቦንቻናዉ በሴ፤ አያዉ ጎፐ፥ አዳ ኤራንቻ አሳ ግዶንነ ኡንቱንቱ ካዉተ ኡባ ግዶን ነ ማል ባዋ።⁸ኡንቱንቱ ኤያነ ዶንጭሎዋንታ፤ ኡንቱንቱ ምፐ ማሴዳ፥ ፓና ኤቃቱዋፐ አያ ታማሪኖ?⁹ሄ ኤቃቱ ታርሴሳፐ ዬዳ ብራንነ ኡፋዘፐ ዬዳ ዎርቃን አሌቀቴድኖ። ኡንቱንቱ ዎይንያ ኤሳነ ሳሉዋ ማላትያ መዋና ማዩዋን ካመቴድኖ። ኡንቱንቱ ኡባይ ኩሽያ ኦሱዋ ሂላቱዋን ኦሰቴድኖ።¹⁰ሽን መና ጎዳይ ቱሙ ጾሳ፤ እ ደኡዋ ጾሳነ መና ካትያ። አ ሀንቁዋን ቢታይ ቃጼ፤ ካዉተቱካ አ ሀንቁዋ ዳንዳይክኖ።¹¹ጾሳይ ሀዋዳን ያጌ፤ “ኡንቱንቶ ሀዋዳን ያጋደ ኦዳ፤ ‘ሄዋንቱ ሳሉዋነ ሳኣ መቤና ጾሳቱ ሳኣፐነ ሳሉዋ ጋርሳፐ ያና’ ያጋ” ያጌ።

ጾሳ ሳቢያ ሳባ

¹²ባረ ዎልቃን ሳኣ መዳዌ፥ባረ አዳ ኤራን ሳኣ ኤሴዳዌ፥ባረ አኬካን ሳሎቱዋ ምጬዳዌ አ።¹³እ ዎልቃምያ ዎደ፥ሳሎቱዋን ደእያ ሃቱ ጉሚኖ።እ ሻረቱዋ ሳኣ ጋጻፐ ፑደ ደን።እ እራ ቡክሲደ፥ዋልቃን ዎልቃምሴ።ጫርኩዋካ ባረ ምንጃ ሳፐ ከሴ።

¹⁴አስ ኡባይ ኤራ ዪደ ዳሜዳ፤ዎርቃ ትግያ አሳይ ኡባይባረ ኤቃቱዋን ዬላቴዳ።አያዉ ጎፐ፥ ሄ ኤቃቱ ጭሙዋ፤ኡንቱንቱን ሸምፑ ባዋ።¹⁵ኡንቱንቱ ፓናባ፤ኡንቱንቱ ቅ ኦሱዋ።ኡንቱንቱ ሙረትያ ዎድያን ያና።¹⁶ሽን ያቆባ ሳማ ግድያዌሄዋንቱ ማላ ግደና።አያዉ ጎፐ፥ እ ኡባባ መዳዋ፤እስራኤሊ እ ባረዉ ዶሬዳ ካዉተ።አ ሱንይካ ኡባፐ ዎልቃማ መና ጎዳ።

ይያ ኢታ

¹⁷ህንተኖ፥ ሞርኪ ዶዴዳዋንቶ፥ ቢታፐ ከሳናዉ ህንተዉ ደእያዋ ቆሪደ ሺሽተ።¹⁸አያዉ ጎፐ፥ መና ጎዳይ ሀዋዳን ያጌ፤ “ታን ሀ ዎድያን ሀ ቢታን ደእያ አሳቱዋ ከሳደ ያምባራና። ህንተ ኦሞደታና ማላ፥ ታን ህንተ ቦላ ኢታባ አሀና” ያጌ።¹⁹አየ ታ ማዱዉ! ታ ማዱይ ፓጸናዋ። ሽን ታን፥ “ሀዌ ታ ሀርግያ፤ ታን ዳንዳያናዉ በሴ” ያጋድ።²⁰ታ ዱንካኒ ኮለት ዬዳ፤ አ ዎዶሩ ኡባይ ዱጸረቴዳ። ታ ናናቱ ኡባይ ታፐ ሻከቲደ ብ ክቼድኖ፤ ኡንቱንቱ ባዋ። ታ ዱንካንያ ዛሪደ ቶላናዉ ዎይ ታ ጋርዱዋ ካቃናዉ ሀእ እት አሳይነ አትቤና።²¹ሄንንቻቱ ዳሜድኖ፤ ኡንቱንቱ መና ጎዳ ኦችበይክኖ። ሄዋ ድራዉ፥ ኡንቱንቶ እንጀተናን እጼዳነ ኡንቱንቱ ዉዲ ኡባይ ላለቴዳ።²²ስስተ! ኦራ ኦዱ ዬዳ፤ ሄዌነ፥ “ሁጲሳ ባጋና ደእያ ካዉተን ዎልቃማ ድርባይ ደንዴ” ያግያዋ። አ ኦላንቻቱ ዪደ፥ ይሁዳ ካታማቱዋ ባዙዋነ ዎራካናቱ ጌሶይያሳ ከሳና።²³አቤት መና ጎዳዉ፥ አሳ ደኡ ሄ አዎ ቡዞ ግደናዋነ ባረ ሄመታ ሱርሳናዌ አዉ ሸነ ግደናዋ ታን ኤራይ።²⁴አቤት መና ጎዳዉ፥ ታና ሴራ፤ ሽን ልክያን ግዶ። ነ ሀንቁዋን ግዶፖ፤ ሄዌ ዮፐ ኔን ታና ጉደ ይሳና።²⁵ነ ሀንቁዋ ኔና ኤረና ካዉተቱዋ ቦላነ ነ ሱን ጼሰና አሳቱዋ ቦላ ትጋ። አያዉ ጎፐ፥ ኡንቱንቱ ያቆባ አሳ ሜድኖ፤ ኡንቱንቱ ኡንቱንታ አሸናን ም ድጌድኖነ ኡንቱንቱ አዉዋ ቢታ ይሴድኖ።

ኤርማሳ 10 / dwr_ent

ጾሳነ ኤቃ

ጾሳ ሳቢያ ሳባ

ይያ ኢታ

ኤርማሳ10dwr_ent