ያርሹዋ ዎጋ
1“ ‘ኡባ ሞድያ መና ጎዳይ ሀዋዳን ያጌ፤ “ግዶ ዳባባ ገልስያ አዋይ ዶልያ ባጋ ድርሳ ፐንጊ ኦሱዋ ጋላሳቱዋን ኡሱፑናቱዋንካ ጎርደቲደ ጋምኦ፤ ሽን ሳምባታ ጋላስነ አግናይ ጼርያ ጋላስ ዶየቶ።2እስራኤልያ አሳ ካፑ ድርሳዉ ፐንገ ባጋ ዳባባፐ ገልያ ባራንዳ ባጋና ገሊደ፥ ድርሳ ፐንገ ም ማታን ኤቆ። ቄሳቱ እ እሜዳ ጹግያ ያርሹዋነ እትፐተ ያርሹዋ ያርሽኖ። እ ሄዋን ድርሳ ፐንገን ጎይኒደ፥ ስሚደ ካረ ከሶ። ሽን ድርሳ ፐንጊ ኦማርሳናስካ ጎርደቶፖ።3ሄ ቢታ አሳይካ ሳምባታንነ አግናይ ጼርያ ዎድያን ግዶ ዳባባ ድርሳ ፐንግያ ገልያሳን፥ መና ጎዳ ስንን ጎይንኖ።4“ ‘ “ካፑ ሳምባታ ጋላስ መና ጎዳዉ ጹግያ ያርሹዋ ኦደ፥ ኡሱፑን ዶርሳ ማራቱዋነ እት ዶርሳ ኦርግያ፥ ኡባይካ ትላ ቦላና ደእያዋንታ እሞ።5እት ዶርሳ ኦርግያና 17 ክሎ ግራመ ካ ያርሹዋ እሞ። ዶርሳ ማራቱዋና ሺቅያ ካ ያርሹ ካፑ ባረዉ ሺሻናዉ ኮዬዳዋ ኬሻ ግዶ። ቃይ እት እት 17 ክሎ ግራመ ካና ሄዙ ሄዙ ሊትሮ ዛይትያ እሞ።6“ ‘ “አግናይ ጼርያ ጋላስ ጋላስ ቃይ እት ኮሩማ፥ ኡሱፑን ዶርሳ ማራቱዋነ እት ዶርሳ ኦርግያ፥ ኡባይካ ትላ ቦላና ደእያዋንታ እሞ።7እት እት ኮሩማነ እት እት ዶርሳ ኦርግያ ያርሽያ ዎደ፥ ካ ያርሾ እት እት 17 ክሎ ግራመ ዛርጋነ ሄዙ ሄዙ ሊትሮ ዛይትያ እሞ። ዶርሳ ማራቱዋና ሺቅያ ካ ያርሹ ካፑ ባረዉ ሺሻናዉ ኮዬዳዋ ኬሻ ግዶ።8ካፑ ገሊደ፥ ድርሳ ፐንግያ ባራንዳና አደ ገሎ፤ ከሲደካ ሄዋና ከሶ።9“ ‘ “ሽን ሄ ቢታ አሳይ ባላ ጋላስ መና ጎዳ ስንን ጎይናናዉ ይያ ዎደ፥ ጎይኖ ሁጲሳ ፐንግያና ገሌዳዋንቱ ገድሳ ፐንግያና ከስኖ፤ ቃይ ገድሳ ፐንግያና ገሌዳዋንቱ ሁጲሳ ፐንግያና ከስኖ። አይ አሳይነ ባረ ስንን ደእያ ፐንግያና ስት ጊደ ከሶፐ አትና፥ ባረ ገሌዳ ሳና ከሶፖ።10ኡንቱንቱ ገልያ ዎደ፥ ካፑ ኡንቱንቱና ገሎ፤ ኡንቱንቱ ከስያ ዎደካ፥ ኡንቱንቱና ከሶ።11“ ‘ “ናሸቻ ጋላሳትዋንነ ላይ ባላቱዋን እት እት ኮሩማናነ እት እት ዶርሳ ኦርግያና ሺቅያ ካ ያርሹ እት እት 17 ክሎ ግራመ ዛርጋነ ሄዙ ሄዙ ሊትሮ ዛይተ ግዶ። ቃይ ዶርሳ ማራቱዋና ሺቅያ ያርሹ ካፑ ባረዉ ሺሻናዉ ኮዬዳዋ ኬሻ ግዶ።12ካፑ ባረ ዶሱዋን እምያ ያርሹዋ፥ ጹግያ ያርሹዋ፥ ዎይ እትፐተ ያርሹዋ መና ጎዳዉ አህያ ዎደ፥ አዋይ ዶልያ ባጋ ግዶ ዳባባ ድርሳ ፐንጊ አዉ ዶየቶ። ባረ ጹግያ ያርሹዋ ዎይ እትፐተ ያርሹዋ ሳምባታ ጋላስ እ እምያዋዳን እሞ። ያቲደ እ ከሲደ ቢና፥ ድርሳ ፐንጊ ጎርደቶ።ሀች ሀች ሺሽያ ያርሹዋ
13“ ‘ “ካፑ ሀች ሀች ትላ ቦላና ደእያ እት ላይ ግዴዳ እት ዶርሳ ጹግያ ያርሹዋ ኦደ፥ መና ጎዳዉ እሞ፤ እ ሄዋ ዎንታ ዎንታ ፓጨናን አሆ።14ሄዋናካ ላኡ ክሎ ግራመ ሊ እት ሊትሮ ዛይትያን ሙናቀቲደ፥ ዎንታ ዎንታ ካ ያርሹዋ ግዲደ ሺቆ። ሀዌ ህንተ መና ጎዳዉ ሀች ሀች ሺሽያ ያርሹዋ ዎጋ።15ሀዌ ስም ኦርገ ዶርሳይ፥ ካ ያርሹነ ዛይቲ ፓጭ ባይናን ዎንታ ዎንታ ሺቃናዉ በስያ ጹገትያ ያርሹዋ” ያጌ።ካፑዋ ጋድያባዉ እመቴዳ ዎጋ
16“ ‘ኡባ ሞድያ መና ጎዳይ ሀዋዳን ያጌ፤ “ካፑ ባረ ጋድያፐ ሻኪደ፥ ባረ አቱማ ናናቱዋፐ እቶ እሞፐ፥ ሄዌ ሄ ናኣሳነ አ ናናቱዋስ ላታ ግዴ።17ሽን ካፑ ባረ ጋድያፐ ሻኪደ፥ ባረ ቆማቱዋፐ እቶ እሞፐ፥ እሻታማን ላይ ባላይ ጋካናዉ፥ ሄ ጋዲ አዋ። ሄዋፐ ጉይያን፥ ካፖ ስሞ፤ ሄዌ ካፖ ግድያ ድራዉ፥ መናዉ አሳነ አ ናናቶ ላታ ግዴ።18ካፑ አሳ ሱጊደ፥ አሳ ላታ ጋድያ ዎልቃን አኮፖ። ታ አሳይ ባረ ላታ ጋድያፐ ቆለተና ማላ፥ እ ባረ አቱማ ናናቶ ባረ ጋድያፐ እሞ” ያጌ’ ያጋ” ያጌዳ።ያርሹዋ ዶይስያ ሳአቱዋ
19ሄዋፐ ጉይያን፥ ሄ ብታኒ ታና ሁጲሳ ጼልያ፥ ቄሳቱ ዋ ጌሻ ክፍለቱዋኮ ገልያሳ አሄዳ። ሄዋንቱካ ግዶ ዳባባዉ ጋያ ዱገ ባጋ ድርሳ ፐንግያ ማታን ደእያዋንታ። ኡንቱንቱፐ አዋይ ዉልያ ባጋና ታን እት ሳኣ በኣድ። እ ታና ሀዋዳን ያጌዳ፤20“ሀ ሳአይ ቄሳቱ ናጋራ ያርሹዋነ ናቁዋ ያርሹዋ ዶይስያ ሳነ ካ ያርሹዋ ኡክያ ሳኣ። ሀ ሳኣን ጎኤትያ ጋሱ ሄ ጌሻ ያርሾቱዋ አሳኮ ካረ ዳባባ ከስና፥ አሳይ ጌሻባ ቦቺደ ጌየናዳን ናጋናሳ” ያጌዳ።21ሄዋፐ ጉይያን፥ ሄ ብታኒ ታና ካረ ባጋ ዳባባዉ አፊደ፥ ሄ ዳባባዉ ኦይዱ ማዛንያ ታና ዩሼዳ። ሄ ዳባባ ማርያን ኡባንካ ቄር ዳባባቱ ደእያዋንታ በኣድ።22ኡንቱንቶ ኡባዉካ 40 ዋ፤ ጎምፓይካ 30 ዋ፤ ኦይዱ ማርያን ደእያ ዳባባቱካ እት ላገ።23ሄ ኦይዱ ዳባባቱዋ ዩሹዋንካ ሹቻ ግምቢ ደኤ፤ ቃይ ግምቢያ ላንቂያን አኮ ሺቂደ ኦሰቴዳ፥ ታማ ኤያ ሳአቱ ደኢኖ።24ሄ ብታኒ ታና፥ “ሀዋንቱ ኡባይ ጌሻ ጎልያን ኦያዋንቱ አህያ ያርሹዋ ዶይስያ ሳአቱዋ” ያጌዳ።