አዋይ ዶልያ ፐንግያ ዎጋ
1ሄዋፐ ጉይያን፥ ሄ ብታኒ ታና ጉየ ዛሪደ፥ ጌሻ ጎልያዉ አዋይ ዶልያ ባጋና ደእያ ካረ ባጋ ድርሳ ፐንግያኮ አህያ ዎደ፥ ድርሳ ፐንጊ ጎርደት ኡቴዳ።2መና ጎዳይ ታና ሀዋዳን ያጌዳ፤ “ሀ ፐንጊ ጎርዱዋን ደእ ባሻናፐ አትና፥ ላኤን ዶየተና። አሳይካ አናና ገለና፤ አያዉ ጎፐ፥ መና ጎዳይ እስራኤልያ ጾሳይ አናና ገሌዳ። ሄዋ ድራዉ፥ ሄ ፐንጊ ጎርዱዋን ደአና።3ግዶፐነ፥ እስራኤልያ ቄስያ ጻላላይ መና ጎዳ ስንን ኡክ ማናዉ ሄዋን ኡታና ዳንዳዬ። ፐንግያ ባራንዳና እ ገላናዉነ ከሳናዉ ዳንዳዬ” ያጌዳ።ጌሻ ጎልያ ገልያ ዎጋ
4ሄዋፐ ጉይያን፥ ሄ ብታኒ ታና ሁጲሳ ፐንግያኮ አፍያ ኦግያና አፊደ፥ ጌሻ ጎልያ ስን ባጋ ጋዳ። ሄዋን ታን ጼልያ ዎደ፥ መና ጎዳ ቦንቹ መና ጎዳ ጎልያ ኩም ኡቴዳዋ በኣድ፤ ሄኮ፥ ታ ሶምኡዋ ቢታ ጋደ ጉፋናድ።5ያትና፥ መና ጎዳይ ታና ሀዋዳን ያጌዳ፤ “ላ አሳ ናአዉ፥ መና ጎዳ ጌሻ ጎልያ ዎጋቱዋ ኡባነ አ ህገቱዋ ኡባ ጼልያዋን ታን ነዉ ኦድያዋ ነ ሀይን ሎይደ ስሳ፤ ነ አይፍያንካ ሎይደ ጼላ። ጌሻ ጎልያ ገላናዉነ ከሳናዉ በስያ አሳቱነ በሰና አሳቱ ሀቃዋንተንቶ ሎይደ አኬካ።6ማካላንቻ እስራኤልያ አሳዉ ሀዋዳን ያጋደ ኦዳ፤ ‘ኡባ ሞድያ መና ጎዳይ ሀዋዳን ያጌ፤ “ህንተኖ፥ እስራኤልያ አሳቶ፥ ህንተ ኦያ ቱና ኦሱ ኤቆ።7ህንተ ታዉ ታ ቁማ፥ ሞዋነ ሱ ያርሹዋ ኦደ ሺሽያ ዎደ፥ ዎዛናይነ አሹ ቃጻረትቤና አላጋ አሳቱዋ ታ ጌሻ ጎልያ ገልሲደ፥ ኡንቱንቱ አ ቱንሳናዳን ኦድታ። ህንተ ቱናተ ኡባ ቦላንካ ጉጂደ፥ ታ ቃላ ጫቁዋ ኮሌድታ።8ቃይ ታ ጌሻ ሚሻቱዋ ቦላ አዎተናን እጺደ፥ ታ ጌሻ ጎልያን አላጋቱዋ አዎዬድታ” ያጌ።9“ ‘ሄዋ ድራዉ፥ ኡባ ሞድያ መና ጎዳይ ሀዋዳን ያጌ፤ “እስራኤልያ አሳ ግዶን ደእያ አላጋ አሳይ፥ ባረ ዎዛናንነ ባረ አሹዋን ቃጻረትቤናዌ፥ ኦንነ ታ ጌሻ ጎልያ ገሎፖ።ሌዋቱ አክያ ሙሩዋ
10“ ‘ “ታፐ ሃኬዳ ሌዋቱ፥ እስራኤልያ አሳይ ታና አጊደ ዎራ ስምና፥ ባረንቱ ኤቃቶ ጎይናናዉ ዎራ ስሜዳዋንቱ፥ ባረንቱ ሙሩዋ አክኖ።11ግዶፐነ፥ ኡንቱንቱ ታ ጌሻ ጎልያን ኦሳንቻ ግድኖ፤ ታ ጌሻ ጎልያ ድርሳ ፐንገቱዋ ናግኖ፤ ጌሻ ጎልያ ኦሱዋካ ኦኖ። ኡንቱንቱ ጹግያ ያርሹዋነ አሳይ አህያ ሀራ ያርሹዋ ሹክኖ፤ ቃይ አሳዉ ኦናዉ፥ ኡንቱንቱ አሳኮ ሺቅኖ።12ሽን ኡንቱንቱ ካሰ እስራኤልያ አሳ ኤቃቶ ጎይንሴዳ ድራዉነ አሳ ናጋራን ኩንድስያ በ ግዴዳ ድራዉ፥ ኡንቱንቱ ባረንቱ ናጋራ ሙሩዋ አካናዳን፥ ታን ኩሽያ ደንደ ጫቃድ። ታን ኡባ ሞድያ መና ጎዳይ ሀዋ ኦዳይ።13ኡንቱንቱ ቄስያ ግዲደ ኦናዉ ታኮ ሺቆፕኖ፤ ዎይ ታዉ ዱማቴዳ ጌሻባኮነ ኡባፐ አዳ ጌሻባኮ ሺቆፕኖ። ኡንቱንቱ ባረንቱ ኦዳ ቱና ኦሱዋ ድራዉ፥ ዬላ ማይኖ።14ግዶፐነ፥ ኡንቱንቱ ጌሻ ጎልያን አዎታናዳንነ አ ግዶን ኦናዉ ደእያ ኦሱዋ ኡባካ ኦናዳን፥ ታን ኡንቱንታ ሱንና።ቄሳቱ ዋ ዎጋ
15“ ‘ “ሽን እስራኤልያ አሳይ ታና አጊደ፥ ዎራ ስሜዳ ዎደ፥ ታ ጌሻ ጎልያ ዎጋ አማነቲደ ፖሌዳ፥ ሌዊያ ዛረ ቄሳቱ፥ ጻዶቃ ያራቱ፥ ኡንቱንቱ ታዉ ኦናዉ ታኮ ሺቅኖ። ሞዋነ ሱ ሺሺደ፥ ኡንቱንቱ ታ ስንን ኦኖ። ታን ኡባ ሞድያ መና ጎዳይ ሀዋ ኦዳይ።16ታ ጌሻ ጎልያ ኡንቱንቱ ገልኖ፤ ታዉ ኦናዉ ታ ያርሽያ ሳ ኡንቱንቱ ሺቅኖ፤ አዎተካ ኡንቱንቱ ኦይቂኖ።17ኡንቱንቱ ጌሻ ጎልያዉ ግዶ ዳባባ ገልያ ዎደ፥ ሊኑዋፐ ዳደቴዳ ማዩዋ ማይኖ፤ ግዶ ዳባባ ፐንገን ዎይ ጌሻ ጎልያ ግዶን ኦያ ዎደ፥ ሱፍያ ማዩዋ ማዮፕኖ።18ኡንቱንቱ ባረንቱ ሁጲያን ላይኑዋ ሻሽያ ጻጽኖ፤ ባረንቱ ጼሳንካ ላይኑዋ ቃን ሱርያ ዳንጭኖ። ባረንታ ጫዋይያዋ አያነ ማዮፕኖ።19አሳይ ደእያ ካረ ዳባባ ኡንቱንቱ ከስያ ዎደ፥ ጌሻ ጎልያን ኦደ ማዬዳ ማዩዋ ቃሪደ፥ ጌሻ ክፍለቱዋን ዎኖ። ሄዌ ዮፐ፥ ኡንቱንቱ ባረንቱ ጌሻ ማዩዋን አሳ ጾሳዉ ጌሻና።20“ ‘ “ቄሳቱ ባረንቱ ሁጲያ ሜደቶፕኖ፥ ዎይ ባረንቱ ብናና አዱሶፕኖ፤ ባረንቱ ሁጲያ ልክያን ቃንጽስኖ።21አይ ቄሲነ ግዶ ዳባባ ገልያ ዎደ፥ ዎይንያ ኤሳ ኡሾፖ።22ኡንቱንቱ አስናይ ሀይቄዳ፥ ዎይ የደቴዳ ማጫ አሳ አኮፕኖ። እስራኤልያ አሳፐ ጌላያቶ አክኖ፤ ዎይ አስናይ ቄስያ ግዲደ ደኢድ ሀይቄዳ ማጫ አሳ አክኖ።23“ ‘ “ቄሳቱ ጾሳዉ ዱማቴዳዋፐነ ዱማተናን ጮ ደእያዋፐ ግዱዋን ደእያ ዱማተ ታ አሳ ታማርስኖ። ቃይ ጌሻፐነ ቱናፐ ግዱዋን ደእያ ዱማተ ኡንቱንቱ በስኖ።24አይ ሞቱ ደንዶፐካ፥ ቄሳቱ ታ ህጊ ኦድያዋዳን ፕርድኖ። ታ ህግያነ ታ ዎጋ ናጊደ፥ ታ ባላቱዋ ቦንችኖ፤ ታ ሳምባታካ ዱማዪደ ቦንችኖ።25“ ‘ “ቄሲ ሀይቄዳ አሃኮ ሺቂደ፥ ባረና ቱንሶፖ። ግዶፐነ፥ ሀይቄዳዌ አዉዋ፥ ዎይ አቶ፥ ዎይ የሌዳ አቱማ ናኣ፥ ዎይ ማጫ ናኣ፥ ዎይ እሻ፥ ዎይ አስና ገላቤና ምቻቶ ግዶፐ፥ አሃ ቦቻናዉ ዳንዳዬ።26እ ባረ ቱናተፐ ጌዬዳዋፐ ጉይያን፥ ላፑን ጋላሳ ፓይዲደ ታኮ። ሄዋፐ ጉይያን፥ እ ጌሻ ግዳና።27ሄዋፐ ስሚደ፥ ጌሻ ሳኣን ኦናዉ ግዶ ዳባባ ብያ ጋላስ፥ ባረ ናጋራ ያርሹዋ ሺሾ። ታን ኡባ ሞድያ መና ጎዳይ ሀዋ ኦዳይ።28“ ‘ “ቄሳቶ ላታይ ባዋ፤ ታን ኡንቱንቶ ላታ። እስራኤልያ ቢታን ኡንቱንቶ አይ ላታነ እሞፕተ፤ ኡንቱንቱ ላታይ ታና።29ኡንቱንቱ ካ ያርሹዋ፥ ናጋራ ያርሹዋነ ናቁዋ ያርሹዋ ሚኖ። እስራኤልያ ቢታን መና ጎዳዉ ዱማዬዳዌ ኡባይ ኡንቱንቱሳ።30ኮይሮ ጋክያ ዱማ ዱማ ካዉ ኮይሮ አይፊነ ህንተ ጾሳዉ እምያ እሞታ ኡባይ ቄሳቱ ዋሳ። ህንተ ጎልያን አንጁ ሸምፓና ማላ፥ ህንተ ልያፐ ኮይሮ ኩሽያ ኡንቱንቶ እምተ።31ቄሳቱ ባኩቴዳዋ ዎይ ዶአይ ዎዳዋ ካፉዋ አሹዋ ግድና፥ መህያ አሹዋ ግድና፥ አያነ ሞፕኖ።