Read ኤራንቻ 12

ኤራንቻ12dwr_ent

¹ነ ያላጋተ ላይን ኔና መዳዋ ቆፓ። መትያ ጋላሳቱ ዬናን ደእሺና፥ ኔን፥ “ታና ሀዌ ናሸቼና” ግያ ዎደቱ ጋከናን ደእሽና፥²አዋይነ ፖኡ፥ አግናይነ ጾልንቲ መናን ደእሺና፥ እራይ ቡክ አናካ ሻሪ ሃ ስመናን ደእሺና፥ ኔና መዳዋ ቆፓ።³አያዉ ጎፐ፥ ሄዌ ጎልያ ናግያዋንቱ ኮኮርያ ዎደ፥ ምኖ አሳይ ቁንያ ዎደ፥ ጋጭያዋንቱ ፓይዱዋን ጉጼዳ ጋሱዋን ጋቻ አግያ ዎደ፥ ቃይ ማስኮትያና ጼልያዋንቱ ጋልጅያ ዎደ ግዳናዋ።⁴ሄ ዎደ ዎጋ ኦግያኮ ስሜዳ ፐንገቱ ጎርደትያ ዎደ፥ ጋጭያ ዎጻቱዋ ኮሻይ ዝቂ ግያ ዎደ፥ ካፉዋ ዋሱ አሳ ገምእሹዋፐ ቤጎያ ዎደ፥ ሽን፥ የንቻ ማጫ ናናቱዋ የ ኮሻይ ለፕያ ዎደ ግዳናዋ።⁵ሄ ዎዲ አሳይ ቃ ሳአቱዋ ከሳናዉነ አኮ ኦገቱዋና ሄመታናዉ ያይያ ዎደ፥ ነ ሁጲ ፑሉምያ ዎደ፥ ኔን ኔና ዳንዳያደ ሄመትያዌ ነዉ እጽያ ዎደ፥ አሞይያባይ አግያ ዎደ ግዳናዋ። ሄ ዎዲ አሳይ ባረ መና ጎልያ ብያ ዎደ፥ ዬክያዋንቱካ አኮ ኦግያና ዬኪደ ዩይያ ዎደ ግዳናዋ።⁶ብራ ቃጭናይ ዱጸናን፥ ዎርቃ ከሪካ መኤናን፥ ሃ ኦቱካ ፑልቱዋ ላንቂያን መኤናን፥ ሃ ፑደ ጎችያ ዎዶሩካ ዱጸናን ደእሺና፥⁷ቢታይ ካሰ ባረ አከቴዳ ቢታኮ ስመናን፥ ሸምፑካ ባረና እሜዳ ጾሳኮ ስሚደ ቤና ደእሺና፥ ኔና መዳዋ ቆፓ።⁸ኤራንቻይ ኦዲደ፥ “ሀዳ! ሀዳ! ኡባባይካ መላ!” ያጌዳ።

ጾሳ ቦንቹሳነ አዛዘቱሳ

⁹ኤራንቻዉ አዳ ኤራተይ ደእያ ድራዉ፥ ኤራተ ደርያ አሳ ታማርሴዳ። እ ዳሮ ሌምሳቱዋ ፕልግ ቆሪደ፥ እቱዋ እቱዋ አ ማራን ማራን ዱማዪደ ኦዳ።¹⁰ኤራንቻይ ልከ ግዴዳ ቃላ ደማናዉ ኮዬዳ፤ ሄዋ ድራዉ፥ እ ጻፌዳዌ ሱረነ ቱማ።¹¹ኤራንቻቱዋ ቃላይ ሄንንቻይ ዉድያ ላግያ ጼራ ሌኦ ጻምኣ ማላ። ቃይ እትፐ ሺሼዳ ሌምሶቱካ ጎምፓ ጋኪደ ገልያ ምስማረቱዋ ማላ።¹²ታ ናአዉ፥ ሀ ኡባፐ ቦላና ኔን ናገታናዉ ኮሽያባይ ደኤ። ማጻፋ ጻፊደ ዉርሳናዉ ዳንዳየተና። ቃይ ዳሮባ ፕልግ ጼሊደ አገናን እጽያዌካ አሳተ ዳቡርሴ።¹³ሄኮ ኡባባይ ኦደቴዳ፤ ሄዋ ድራዉ፥ ኡባባዉ ኩሻይ ሀዋ: ጾሳዉ ያያ፤ አ አዛዙዋ ናጋ። አያዉ ጎፐ፥ ሄዌ አሳዉ ዋና ኦሱዋ።¹⁴ጾሳይ ኦሱዋ ኡባ ቦላን፥ ቃይ ጌሜዳ የዉዋ ኡባ ቦላን፥ ሎአ ግድና፥ ኢታ ግድናካ ፕርዳናዉ ደኤ።

ኤራንቻ 12 / dwr_ent

ጾሳ ቦንቹሳነ አዛዘቱሳ

ኤራንቻ12dwr_ent