ሙሴ ማዝሙርያ
1ህንተኖ፥ ሳሎቶ፥ ታን ኦድያዋ ስስተ፤ ቢታይካ ታ ዶና ቃላ ስሶ።2ታ ትምርቲ እራዳን ቡኮ፤ ታ ቃላቱካ ከተርሳዳን፥ ጾኩ ማታ ቦላን ዎያ ፑሰ እራዳንነ ጫርሻ ቦላን ዎያ ፑስያዳን ዎ።3ታን መና ጎዳ ሱን አዋያና፤ ግታተ ኑ ጾሳዉ እምተ።4እ ኑ ዛላቴ፥ አ ኦሱዋን ፖኩ ባዋ፤ አ ኦገ ኡባይካ ሱረ። ኑ ጾሳይ አማነትያዋነ ኢታተይ ባይናዋ፤ እ ቱማንቻነ ሱረ።5ህንተ አማነተናነ አያዉነ ፓና፥ ናጋራንቻነ ባለያ የለታ ግድያ ድራዉ፥ አ አሳ ግዳናዉ ህንተ በስክታ።6ህንተኖ ኤያነ አኬክ ባይና አሳዉ፥ ህንተ መና ጎዳዉ እምያ ዛሩ ሀዌ? እ ህንተና መዳ ህንተ አዉዋ ግደኔ? እ ህንተና መደ፥ ምንስ ኤሴዳ።7ካሰ ዎድያ ቆፕተ፤ ዳሮ የለታቱ ላይካ አኬክተ። ህንተ አዎቱዋ ኦችተ፤ ኡንቱንቱ ህንተና በሳና። ህንተ ጭማቱዋካ ኦችተ፤ ኡንቱንቱ ህንተንቶ ኦዳና።8ኡባፐ ዎልቃማይ ካዉተቶ ኡንቱንቱ ደኢያሳ ላትሴዳ ዎደ፥ አሳ ናናቱዋ ኡንቱንቱ ዛርያን ዛርያን ሻኬዳ ዎደ፥ እስራኤልያ አሳ ፓይዱዋዳን፥ ኡንቱንቱ ዛዋ ኤሴዳ።9አያዉ ጎፐ፥ ሻኩዋን መና ጎዳ ጋኬዳዌ እስራኤልያ፤ ያቆብካ አ ጋኬዳ ላታ።10ቢታ መላ ቢታን ኡንቱንቱ ሳሙዋን ደእሽን፥ ጫርኩዋ ጻላላይ ሱራግያሳን ብቻርሽን፥ ኡንቱንታ ደሜዳ። ያቲደ ባረ አይፍያ ቡሉዋዳን፥ ኡንቱንቶ ጎንዳለ ግዲደ፥ ኡንቱንታ ምንሲደ ናጌዳ።11አርጋንይ ባረ ማራ ፓሉዋ ታማርስያዋዳን፥ ባረ ምጬዳ ቀፍያን ጋክ ኦይቂደ አሽያዋዳን፥ ሄዋዳን ጾሳይ ባረ ቀፍያን ሀጲደ ኡንቱንታ አሼዳ።12ሀራ አላጋ ጾስ ባይናን፥ መና ጎዳ ጻላላይ ባረ አሳ ካለዳ።13እ ቢታዉ ቃ ሳኣ ኡንቱንታ ከሴዳ። ሾይቃን ሞኬዳ አይፍያ ኡንቱንታ ምዜዳ። ዛላ ጳልቀፐ ኡንቱንታ ኤሳ ምዜዳ፤ ሹቻ ጋድያፐ ዛይትያ ምዜዳ።14ኡንቱንቱ መህያ ዉድያፐ መኤዳ ማነ ዴሻ ዉድያፐካ ማ፥ ዶርሳ አንቃራነ ጋልሳ ሜድኖ፤ ቃይ ባሳነ ዶርሳ ዉድያነ ዴሻ፥ ሎኦ ዛርጋ ሜድኖ፤ ሱ ማላትያ ዎይንያ ኤሳካ ኡሼድኖ።15ያኒደ ይሽሩን ኦርዴዳ፤ ማካሌዳ፤ ም ሚደ፥ ቦቦርጬዳ። ባረና መዳ ጾሳ አጌዳ፤ ባረ አቶተ ዛላ ካዳ።16ኡንቱንቱ አላጋ ጾሳቶ ጎይንያዋን አ ምሽሴድኖ፤ ባረንቱ ቱና ኤቃቱዋን አ ሀንቀድኖ።17ጾሳ ግደና ጻላሄቶ፥ ካሰ ኡንቱንቱ ኤርቤና ጾሳቶ፥ ዝኖ ከሴዳዋንቶ፥ ኡንቱንቱ አዎቱ ያይቤና ጾሳቶ ያርሼድኖ።18ኡንቱንቱ ደኡዋ እሜዳ ዛላ ቆፕበይክኖ፤ ቃይ የል ድቼዳ ጾሳ ዶጌድኖ።19መና ጎዳይ ሄዋ በኢደ፥ ኡንቱንቱ ቦላ ሀንቀቴዳ። አ አቱማነ ማጫ ናናቱዋ እጼዳ።20ያቲደ ሀዋዳን ያጌዳ፤ “ታን ታ ሶምኡዋ ኡንቱንቱፐ ገንና፤ ኡንቱንቱ ጌላነ አማነተና አሳ ግድያ ድራዉ፥ ኡንቱንቱ ኦማርሳ ጮኡ ጋደ ጼላና።21ጾሳ ግደናዋን ታና ምሽሴድኖ፤ ባረንቱ ኤቃቱዋን ታና ሀንቀድኖ። ታንካ ኡንቱንቱ ዛረ ግደናዋንቱን ምሽሳና፤ ኤያ አሳ ዛራቱዋን ታን ኡንቱንታ ሀንቀትሳና።22ታ ሀንቁ ታማዳን ኤጺደ፥ ጋድያን ደእያዋ ኡባ ጹጋና። ሄ ታማይ ስኦልያን ደእያዋናካ ጋደ ጹጋና፤ ደርያ ባሱዋ ጋካናዉ፥ ሄ ታማይ ማና።23“ታን ኡንቱንቶ መቱዋ መቱዋ ቦላ ዶራና፤ ታ ዎንዳፍያን ኡንቱንታ ዱካና።24ኡንቱንቱ ኮሻን፥ ጹግያ ምሹዋንነ ኢታ ሀርግያን ዉራና። ኡንቱንቱ ቦላ መቶ ጋያ ባዙዋ ዶአቱዋነ ኡንቱንታ ዱክያ አላጋ ሾሻቱዋ ኡንቱንቱ ቦላ የዳና።25ቶራይ ኦገ ኡባን ኡንቱንቱ ናናቱዋ ዉርሳና። ጎልያ ኡባን ሻቢርሳይነ ዳጋማይ ካተታና። ያላጋ አቱማዋንቱነ ማጫዋንቱ ዉራና፤ ጉ ናናይካ ጭማቱካ አትክኖ።26ኡንቱንታ ታን ሃኮ ሳአ ላላና፤ ሄዋፐ ጉይያን፥ ኡንቱንታ ሀሳይያባይ ያና።27ሽን ኡንቱንቱ ሞርከቱ፥ ‘ኑ ዎልቃይ ኡንቱንታ ጾኔዳ፤ ሀዋ ኡባ መና ጎዳይ ኦቤና’ ያጊደ ኦቶሩዋን ጬቀተናን አግክኖ ያጋደ ቆፓድ” ያጌዳ።28እስራኤልያ አሳይ ዞረት ባይና አሳ፤ አኬክ ኡንቱንቶ ባዋ።29ኡንቱንቱ ጾነቴዳዌ አያነንቶ በአናዉ ኡንቱንቶ እጸቴዳ፤ ባረንቱ ዉርሰይካ አየንቶካ ኤርክኖ።30እት ሻአ አሳይ እት አሳን፥ ታሙ ሻአ አሳይ ላኡ አሳን፥ ዋን ጾነቴዴ? ኡንቱንቱ ዛላይ ኡንቱንታ ዛልኤዳ ግሻሳነ መና ጎዳይ ኡንቱንታ አ እሜዳ ድራሳ ግደኔ!31ኡንቱንቱ ሞርከቱ ባረንቱ ጾሳይ ላፋ ግድያዋነ እስራኤልያ ጾሳዳን ዎልቃማ ግደናዋ ኤሪኖ።32ኡንቱንቱ ዎይኒ ሶዶማ ዎይንያፐነ፥ ጋሞራ ሾይቃፐ ዬዳዋ። ኡንቱንቱ ቴራይ ማርዘ፤ ኡንቱንቱ ዉርጩካ ጫምያዋ።33ኡንቱንቱ ዎይንያ ኤሳይ ሾሻ ማርዘ፤ ዎያ ማርዚ ደእያ ሀሱዋ።34ጾሳይ፥ ሀዋ ታን ናጋደ ታ ማዝጎብያን አታማበይክታ?35ኡንቱንቱ ባሻ ጋላሳይ ማታቴዳ፤ ኡንቱንቱ ቦላ ጋካናባይ ኤሌሌ። ሄ ዎደ ኡንቱንቱ ገዲ በታና። ታን ኡንቱንቶ ሀሉዋ ከሳናነ ኩሽያ ዛራና ያጌዳ።36ኡንቱንቱ ዎልቃይ ዳቡሬዳዋነ ኡንቱንታካ ማድያዌ ባይናዋ በኤዳ ዎደ፥ መና ጎዳይ ባረ አሳዉ ፕርዳና፤ ባረ ቆማቶካ ቃረታና።37እ ኡንቱንታ ሀዋዳን ያጋና፤ ኡንቱንቱ አማነትያ ኡንቱንቱ ጾሳቱ ሀቃነ? ኡንቱንቱ ባቃቲደ አ ግዶን ቆሰትያ ኡንቱንቱ ዛላይ ሀቃነ?38ኡንቱንቱ ያርሹዋ ሞዋ ሜዳዋንቱ፥ ኡንቱንቱ ኡሻ ያርሹዋ ዎይንያ ኤሳ ኡሼዳዋንቱ ሀእ ደንዲደ፥ አነ ኡንቱንታ ማድኖ፤ አነ ኡንቱንታ አሽኖ።39ጾሳይ ታናቴ። ታ ጻላላይ ጾሳ። ታፐ አትና፥ ሀራ ጾስ ባዋ። ዎያዌ፥ ደኡዋካ እምያዌ ታና፤ ታን ማዱጽሳደ፥ ታን ፓና፤ ታ ኩሽያፐ ኦንነ አሸና።40ታ ኩሽያ ፑደ ደንደ ሀዋዳን ያጋና፤ “ታን መናዉካ ደኦ።41ጶሉጶሉ ግያ ታ ማሻ ሌፋደ፥ ፕርዳናዉ ታ ኩሽያን ኦይቂያ ዎደ፥ ታ ሞርከቱዋ ቦላ ታ ሀሉዋ ከሳና፤ ታና እጽያዋንቶ ኡንቱንቱ ኩሽያ ዛራና።42ታ ዎንዳፈቱ ኡንቱንቱ ሱን ማታና፤ ታ ማሻይካ ኡንቱንቱ አሹዋ ማና። ታና እጽያ ኡባካ ማርከ። ሀራይ አቶ ማዱጼዳዋንቱነ ኦሞደቴዳዋንቱካ ሀይቃና” ያጋና ያጌዳ።43ህንተኖ ካዉተቶ፥ ጾሳ አሳና ናሸትተ። እ ባረ ቆማቱ ሱ አቻና፤ ባረ ሞርከቱዋ ቦላንካ ሀሉዋ ከሳና። ቢታን ደእያ ባረ አሳ ናጋራካ አቶ ጋና ያጌዳ።44ሙሴነ ኔዌ ናአይ ኢያሱ እስራኤልያ አሳ ስሲደ፥ ሀ ማዝሙርያ ቃላ ኡባ ሃሳዬድኖ።ሙሴ እሜዳ ዉርሰ ዞርያ
45ሙሴ ሀ ቃላ ኡባ እስራኤልያ አሳ ኡባዉ ኦድ ዉርሴዳ ዎደ፥46ኡንቱንታ ሀዋዳን ያጌዳ፤ “ሀ ህግያ ቃላ ኡባ ኡንቱንቱ ናጋናዳንነ ኦናዳን ህንተ ናናቱዋ አዛዛና ማላ፥ ሀች ታ ህንተንቶ ማርካትያ ቃላ ኡባ ህንተ ዎዛናን ዎተ።47ሀ ቃላይ ህንተንቶ ደኦፐ አትና፥ ጮ መላ ቃላ ግደና። ሀ ቃላ ናጎፐ፥ ህንተ ዮርዳኖሳ ፕኒደ ላታና ቢታንካ አዱሳ ላይ ደአና” ያጌዳ።48ሄ ጋላሳንካ መና ጎዳይ ሙሳ ሀዋዳን ያጌዳ፤49“ሞኣበን እያርኮ ካታማፐ ስን ባጋና ደእያ አባርማ ደረቱዋፐ እቱዋ፥ ህን ናቦ ደርያ ከሳ፤ ሄዋን እስራኤልያ አሳ ታ ላትሳና ካናነ ቢታ ሄፍን ጼላ።50ነ እሻ አሮን ሆራ ደርያን ሀይቂደ፥ ባረ ማይዛ አዎቱዋን ጋከቴዳዋዳን፥ ኔንካ ሀ ከሴዳ ደርያን ሀይቃደ፥ ነ ማይዛ አዎቱዋን ጋከታና።51አያዉ ጎፐ፥ ህንተ ላኡካ እስራኤልያ አሳ ስንን ታዉ አማነትበይክታ፤ ጺና መላ ቢታን፥ ቃዴሳ ካታማ ማታን ደእያ ማሪባ ሃ ማታን፥ ታ ጌሻተ እስራኤልያ አሳ በስበይክታ።52ሄዋ ድራዉ፥ ቢታ ሃኩዋን ሄፍን ጼላናፐ አትና፥ ታን እስራኤልያ አሳ ላትሳና ቢታ ገላካ” ያጌዳ።