ማቻቶ የድያዋነ ላኤን አኩዋ
1“እት አሳይ ማቼ አክ ስሚደ፥ እት ኢታባ እ ቦላ ደሚደ እዞ እጾፐ፥ እዝዉ ፓራማ ጻፍ እሚደ፥ ባረ ጎለፐ ከሲደ የዶፐ፥2እዛ አ ጎለፐ ከሳደ፥ ሀራ አስና ገሎፐ፥3ሄ ላኤን አስናይካ እዞ ዶሰናን እጺደ፥ ፓራማ እዝዉ ጻፍ እሚደ፥ ባረ ጎለፐ እዞ ከሲደ የዶፐ፥ ዎይ እዞ አኬዳ ሄ ላኤን አስናይ ሀይቆፐ፥4አ ቱኔዳ ድራዉ፥ ኮይሮ ፓራሜዳ አስናይ ላኤን እዞ ዛሪደ አኮፖ። ሄዌ መና ጎዳ ማታን እጸቴዳዋ፤ ቃይ ህንተካ መና ጎዳይ ህንተ ጾሳይ ህንተንቶ እምያ ጋድያን ሀዋ ማላ ናጋራ ኦፕተ።5“ኦራ ማቼ አኬዳ አሳይ ኦላዉ ቦፖ፤ ሀራ ዴጾ ኦሱዋካ አዉ እሞፕተ። እት ላይይ አና ጋካናዉ፥ ሀቃነ ቤናን ባረ አኬዳ ማቻቶ ናሸቾ።ዱማ ዱማ ህገቱዋ
6“አይ አሳይነ አጮ ዎጻ ዎይ ማይድያ ኦይቆፓ፤ አያዉ ጎፐ፥ ሄዌ ጎልያ አሳይ ጋጭያባ ዪደ፥ ሀይቂኖ ግያዋ።7“ባረ እሻ ግድያ እስራኤልያ አሳ ዉእ አፊደ፥ አይልያ ከስያ አሳይ ዎይ ሀራዉ ዛልእያ አይ አሳይነ ሀይቆ። ሄዋዳን ኦያዋን ህንተ ግዶፐ ኢታ ድጊታ።8“ዎልቃማ ጋልባ ሀርግያን ሳከትያ አሳዉ ሌዊያ ዛረ ግድያ ቄሳቱ ህንተና ታማርሴዳዋዳን ኡባባ ፖልተ፤ ታ ኡንቱንታ አዛዜዳዋ ሄዋዳን ኦናዉ ናገትተ።9ህንተ ግብጼፐ ከሲደ ኦግያን ደእሽን፥ መና ጎዳይ ህንተ ጾሳይ ሚርያም ቦላ ኦዳዋ ሀሳይተ።10“ኔን ነ ሾሮ እትባ ታልኣደ፥ እ ኦይያዋ ኦቻናዉ አ ጎለ ገሎፓ።11ኔን ካረን ኤቃ ደእሽን፥ ነ ታልኤዳ ብታኒ ኦይያዋ ባረ ጎለፐ ከሲደ ነዉ እሞ።12እ ህዬሳ ግዶፐ፥ ነ አጮ ኦይቄዳ አ ማዩዋ ነ ሶን አይሶፓ።13እ ማዪደ አቃናዳን፥ ኦማርስ ዎደ አዉ ጉየ ዛራ፤ እ ሄዋን ኔና ጋላታና። ሄዌ መና ጎዳ ነ ጾሳ ማታንካ ነዉ ጌሻተ ግዳናዋ።14“ነ እሻ ግድያ እስራኤልያ አሳ ግድና፥ ዎይ ነ ቢታ ካታማፐ እቱዋን ደእያ ካረ ቢታ አሳ ህዬሳ ቃጻራደ ናቆፓ።15እ ሀች ኦዳዋ ሀች አካናዉ ምንሲደ ኮይያ ድራዉ፥ አዋይ ዉለናን ሀች ጭጋ። ሄዌ ዮፐ፥ መቶታንቻይ ኔፐ መና ጎዳዉ ዋስና፥ ነዉ ናጋራ ግዳናዋ።16“ናናይ ኦዳ ናጋራ ድራዉ፥ አዎቱዋ ዎናዉ በሰና፤ ቃይ አዎቱ ኦዳ ናጋራ ድራዉካ፥ ናናቱዋ ዎናዉ በሰና። አሳይ ኡባይ ባረ ኦዳ ናጋራን ናጋራን ሀይቃናዉ በሰ።17“ካረ ቢታ አሳቱ ፕርዳነ አዉ አታ ባይናዋንቱ ፕርዳ ደሽሶፓ፤ አምአት ማዩዋ አ ታልኤዳዎ ጋደ ኦይቆፓ።18ህንተካ ግብጼ ጋድያን አይልያ ግዴዳዋነ መና ጎዳይ ህንተ ጾሳይ ህንተና ያፐ ዎዚደ ከሴዳዋ ሀሳይተ። ታን ሀዋ ህንተና አዛዝያዌ ሄዋ ድራሳ።19“ነ ሾይቃፐ ካ ጫክያ ዎደ፥ ነ ዶጌዳ ምርቂያ ቆራናዉ ጉየ ቦፓ። መና ጎዳይ ነ ጾሳይ ነ ኩሽያ ኦሶ ኡባን ኔና አንጃና ማላ፥ ሄዋ በትያዉ፥ አታ አዉ ባይና ናናቶነ አምኤቶ አጋ።20ነ ዎጋራ አይፍያ ማጽያ ዎደ፥ እቱነ አተናን ዉርሳደ ማጻናዉ ላኤንዋ ጉየ ስሞፓ፤ አቴዳዋ በትያዉ፥ አታ አዉ ባይና ናናቶነ አምኤቶ አጋ።21ነ ዎይንያ አይፍያ ማጽያ ዎደ፥ አቴዳዋ ቃርማናዉ ላኤንዋ ጉየ ቦፓ፤ ሄዋ በትያዉ፥ አታ አዉ ባይና ናናቶነ አምኤቶ አጋ።22ህንተካ ግብጼ ጋድያን አይልያ ግዲደ ደኤዳዋ ዶጎፕተ። ታን ሀዋ ህንተና አዛዝያዌ ሄዋ ድራሳ።