አጩ ማረትያ ላይ
1“ላፑን ላይ ላይ ዉርሰን ህንተፐ ታልኤዳዋንቶ ኡንቱንቱ አጩዋ ማርተ።2ህንተ አጩዋ ማራና ዎጋይ ሀዋ: ባረ ላገ እስራኤልያዉ ታልኤዳ አይ አሳይነ ሄ አጩዋ ማሮ። መና ጎዳ ማሮተይ አዋየቴዳ ድራዉ፥ ታልኤዳዌ ባረ ላገ እስራኤላዉ ዎይ ባረ እሻዉ ታልኤዳባ ኦቾፖ።3ሀራ ቢታ አሳዉ ህንተ ታልኤዳ አጩዋ አካናዉ ዳንዳዪታ፤ ሽን ህንተ ህንተ ዛረቶ ታልኤዳባ ኡባ ማርተ።4“ህንተ መና ጎዳ ህንተ ጾሳ ቃላዉ አዛዘቶፐ፥ ታን ሀች ህንተና አዛዝያ አዛዞ ኡባ ባለናን ኦፐ፥ ህንተ ግዶን እት አሳይነ ህዬሰና። አያዉ ጎፐ፥ ህንተ ላታናዳን መና ጎዳይ ህንተ ጾሳይ ህንተዉ አቆ ኦደ እምያ ጋድያን መና ጎዳይ ህንተና አንጃና።6መና ጎዳይ ህንተ ጾሳይ ህንተንቶ ጌዳዋዳን፥ እ ህንተና አንጃና፤ ዳሮ ካዉተይ ህንተፐ ታልአና፤ ሽን ህንተ እቱዋፐነ ታልእክታ። ቃይ ህንተ ካዉተቱዋ ሞዳና፥ ሽን እቱነ ህንተና ሞደና።7“መና ጎዳይ ህንተ ጾሳይ ህንተንቶ እምያ ጋድያን ደእያ ቄር ካታማቱዋፐ ሀቃዋንነ ደእያ ህንተ ላገ እስራኤላቱዋ ግዶን እት አሳይ ህዬሶፐ፥ አዉ መቀ ኢቶፕተ፤ ቃይ ህንተ ኩሽያካ ሺሽ አኮፕተ።8ህንተ ኩሽያ አዉ ብርሽተ፤ አ ኮሽያዋ አያነ አዉ ታልእተ።9‘አጩዋ ማርያ ላፑን ላይይ ማቴዳ’ ጋደ፥ ህዬሳ እስራኤልያዉ ኢታ አይፍያን ጼላደ፥ አዉ አያነ ታልእያዋ ድጋናዉ ኢታ ቆፋይ ነ ዎዛናን ገለናዳን ናገታ። ሄዌ ዮፐ፥ እ ኔፐ መና ጎዳዉ ዋሳና፤ ሄዌ ነዉ ናጋራ ግዳናዋ።10ኔን አዉ ጮ እማ፤ ኔን አዉ እምያ ዎደ፥ ነ ዎዛናን አያዉ እማይታ ጎፓ፤ ያቶፐ፥ ህንተ ኦሶ ኡባን፥ ህንተ ኦይቄዳዋን የዳባን ኡባን መና ጎዳይ ህንተ ጾሳይ ህንተና አንጃና።11ሄ ጋድያን ኡባ ዎደካ ህዬስ የና ድራዉ፥ ታን ኔና እስራኤላቶ፥ ነ ጋድያን ደእያ ህዬሳቶነ መቶታንቻቶ ኬካ ግዳናዳን አዛዛይ።አይለቱዋ ላአ ከስያ ማራ
12“ኔን አቱማ ግድና ማጫ ግድና፥ ነ ዳቦ እስራኤልያ አሳ አይልያ ኦደ ሻሞፐ፥ እ ነዉ ኡሱፑን ላይ ኦ፤ ላፑን ላይን አይለተፐ ከሳ የዳ።13ኔን አይለተፐ አ ከሳ የድያ ዎደ፥ መላ ኩሸ የዶፓ።14ኔን ነ ዉድያፐ፥ ነ ኡዱማፐነ ነ ዎይንያ ጉምኢያሳፐ አዉ ኬካተን እማ፤ መና ጎዳይ ነ ጾሳይ ኔና አንጄዳዋ ኬና አዉ እማ።15ህንተካ ግብጼ ጋድያን ካሰ አይልያ ግዴዳዋነ መና ጎዳይ ህንተ ጾሳይ ህንተና ያፐ ዎዜዳዋ ዶጎፕተ። ታን ህንተና ሀች አዛዝያዌ ሄዋሳ።16“ሽን ሄ አይልያ ኔናነ ነ ጎልያ አሳ ዶሴዳ ድራዉነ ኔናና አዉ ደኡ ሎኦ ግድያ ድራዉ፥ ‘ታን ነ ጎለፐ ከሳደ ቢከ’ ያጎፐ፥17ፐንገ አ አፋደ፥ ጎ አካደ፥ አ ሀይ ሉካ። ያቶፐ እ ነዉ መናዉካ አይልያ ግዳናዋ። ቃይ አይልያ ግድያ ማጫንዉካ ሄዋዳን ኦ።18አ ኔን አይለተፐ ከሳ የድያ ዎደ፥ ኔን ቆሄቴዳዋዳን ቆፖፓ፤ አያዉ ጎፐ፥ እ ሀ ኡሱፑን ላይ ግዶን ከራዉ ኦያባይ ኦያዎ ዳኩዋ ዳሩዋ ነዉ ኦዳ። ሄዋ ድራዉ፥ ኔን ኦያባን ኡባን መና ጎዳይ ነ ጾሳይ ኔና አንጃና።ሚዛይነ ዶርሳይ የልያ ባይራ ማራቱዋ
19“ኔን ነ መህያፐነ ነ ዶርሳ ዉድያፐ ባይራ የለቴዳ አቱማዋ ኡባ መና ጎዳዉ፥ ነ ጾሳዉ፥ ዱማያ። ነ ዱማዬዳ መህያፐ ባይራ የለቴዳዋ አያነ ጎኤቶፓ፤ ነ ዶርሳ ዉድያፐ ባይራ የለቴዳዋ እክስያካ ሜዶፓ።20ኔንነ ነ ሶ አሳይ ጾሳይ ዶርያ ሳኣን መና ጎዳ ህንተ ጾሳ ስንን ሄዋንታ ላይን ላይን ሚተ።21ሽን ነ ያርሽያ መህያ ቦላይ ትላና ዮፐ፥ እ ስሌዳዋ ዎይ ቆቀ ግዶፐ፥ ዎይ ቃይ ሀራ ኢታ ፖኮባይ አ ቦላን ደኦፐ፥ ሄዋ መና ጎዳዉ፥ ነ ጾሳዉ፥ ያርሾፓ።22ሄዋ ህንተ ደእያ ህንተ ካታማን ሚተ፤ ዎጋን ጌሻ አሳ ግድና፥ ዎይ ቱና አሳ ግድናካ ገንእያነ ጋራ አሹዋዳን ሞ።23ሽን ህንተ አ ሱ ሃዳን ሳኣን ጉስተፐ አትና፥ ሞፕተ።