ሲና ደርያፐ ባናዳን እመቴዳ አዛዙዋ
1ሀ ማጻፋን ጻፈቴዳ ቃላ ኡባይ ዮርዳኖሳ ሻፋፐ ሄፍን አዋይ ዶልያ ባጋና ደእያ መላ ቢታን ኡንቱንቱ ደእሽን፥ ሙሴ እስራኤልያ አሳዉ ኦዴዳ ቃላ። ሙሴ ሀ ቃላ ኡንቱንቶ ኦድያ ዎደ፥ ኡንቱንቱ ሱፋ ጌተትያ ሳኣን ስን ባጋና፥ ፓራና ካታማዉ እት ባጋናነ ሄዋዳንካ ቃይ ቶፌላ፥ ላባና፥ ሀጸሮታነ ዲዛሃባ ጌተትያ ካታማቱዋ ግዱዋን ደእያ ዮርዳኖሳ ዛንጋራን ደኢኖ።2ኤዶማ ደርያ ኦግያና ቦፐ፥ ሲና ደርያፐ ቃዴሳ-ባርነ ጋካናዉ ገድያን ታማነ እት ጋላሳ ኦገ።3ግብጼፐ ኡንቱንቱ ከሴዳ ኦይታማን ላይን፥ ታማነ እተን አግናን፥ አግናዉ ኮይሮ ጋላሳን፥ ሙሴ መና ጎዳይ ኡንቱንቱዋ አ አዛዜዳዋ ኡባ እስራኤላቶ ኦዴዳ።4ሄዌ ሀሰቦና ካታማን ኡቲደ ካተቴዳ አሞረቱ ካዉዋ ስሆናነ፥ አስታሮታንነ ኤድራአን ኡቲደ ካተቴዳ ባሳነ ካትያ ኦጋ፥ ሙሴ ጾኔዳዋፐ ጉይያና።5አሳይ ዮርዳኖሳፐ አዋይ ዶልያ ባጋና ሞኣበን ደእሽን፥ ሙሴ ሀ ህግያ ሀዋዳን ያጊደ ቆንጭስያዋ ዶሜዳ።6“ኑን ሲና ደርያን ደእሽን፥ መና ጎዳይ ኑ ጾሳይ ኑና ሀዋዳን ያጌዳ፤ ‘ህንተ ሀ ደርያ ቦላን ሎይ ጋምኤድታ።7ዱንካንያ ኮሊደ ደንድተ፤ ደረትያ አሞረቱ ቢታነ አራባን ደእያ ኡንቱንቱ ሾሮ ቢታ ኡባ ቢተ፤ ሄዌካ ዮርዳኖሳ ዛንጋራ፥ ደረትያሳነ ባርጎትያ ቢታቱዋኮ፥ ገድሳ ባጋዉነ ሜድተራነ አባ ጋጻዉ አተ። ካናነ ጋድያኮ ቢተ፤ ሊባኖሳ ደረቱዋ አደ፥ ኤፍራጺሳ ሻፋ ጋካናዉ ቢተ።8በእተ፥ ታን ህንተንቶ ሀ ቢታ እማድ። ቢደ ህንተ አዋቶ፥ አብራሃማዉ፥ ይሳቃዉ፥ ያቆባዉነ፥ ኡንቱንቱፐ ጉይያን፥ ኡንቱንቱ ዛርያዉ እማናዉ መና ጎዳይ ጫቄዳ ቢታ ላትተ’ ያጌዳ” ያጌዳ።ሙሴ ካፓቱዋ ሱንዳ
9ቃይካ ሙሴ አሳዉ ሀዋዳን ያጌዳ፤ “ሄ ዎደ ታን ህንተንቶ ሀዋዳን ያጋደ ኦዳድ፤ ‘ታን ታረካ ህንተና ቶካናዉ ዳንዳይከ።10መና ጎዳይ ህንተ ጾሳይ ህንተ ፓይዱዋ ሳሉዋ ጾልንትያዳን ዳርሴዳ።11መና ጎዳይ ህንተ አዎቱዋ ጾሳይ፥ ህንተና ሀዋፐ ሻአ ገደ ጉጂደ ዳርሶነ እ ጌዳዋዳን ህንተና አንጆ።12ሽን ህንተ መቱዋ፥ ህንተ ፓሉማነ ህንተ ኦሻ ኡባ ታን ታረካ ቶካናዉ ዋና ዳንዳያይታ?13ህንተ ዛርያፐ ዛርያፐ አዳ ኤራንቻ፥ አኬካንቻነ ኦሱዋ ሜዚ ደእያ አሳቱዋ ዶርተ፤ ታን ህንተ ቦላ ኡንቱንቱ ካፑዋ ሱንና’ ያጋድ።14“ህንተካ ታና፥ ‘ኑን ኦናዳን ኔን ጌዳዌ ሎአ’ ያጌድታ።15ሄዋ ድራዉ፥ ታን ህንተ ዛርያፐ ዛርያፐ አዳ ኤራንቻነ ኦሱዋ ሜዚ ደእያ አሳቱዋ አካድ፤ ሻላቃ፥ ጼቱዋ ካፑዋ፥ እሻታሙዋ ካፑዋ፥ ታሙዋ ካፑዋነ ሞድያዋንታ ኦደ ህንተ ዛርያን ዛርያን ህንተ ቦላን ሱንድ።16“ያታደ ታን ኡንቱንታ፥ ‘ህንተ እሻንቱ ግዱዋን ደእያ ሞቱዋ ስስተ፤ ሄ ሞቱ እት እስራኤልያ አሳፐነ አ እሻፐ ግዱዋን ዎይ እስራኤልያ አሳፐነ ሀራ ጋደ አሳፐ ግዱዋን ደእያዋ ግዶፐካ፥ ስሲደ ጽሉዋ ፕርድተ።17ህንተ ፕርዳን እት ባጋ ማዶፕተ፤ ዎልቃማዋ ስስያዋዳንካ፥ ጉዋካ ሄዋዳን ስስተ፤ አሳ ሶምኦ ያዮፕተ፤ አያዉ ጎፐ፥ ፕርዳይ ጾሳዋ። ቃይ ህንተንቶ ዳሮ ዴጾ ግዴዳ ሞቱዋ ታኮ አህተ፤ ሄዋ ታን ፕርዳና’ ያጋድ።18ቃይ ህንተካ ኦናዋ ኡባ ታን ሄ ዎደ ህንተና አዛዛድ።ሙሴ ዎችያዋንታ ኪቴዳ
19“ሄዋፐ ጉይያን፥ ኑን ሲና ደርያፐ ደንዴዶ፤ መና ጎዳይ ኑ ጾሳይ ኑና አዛዜዳዋዳን፥ ደረትያ አሞረቱ ቢታ ብያ ኦግያን ደእያ ሄ ህንተ በኤዳ ግታነ ያሽያ መላ ቢታ አደ፥ ቃዴሳ-ባርነ ጋኬዶ።20ሄ ዎደ ታን ህንተንቶ ሀዋዳን ያጋድ፤ ‘መና ጎዳ ኑ ጾሳይ ኑና ላትስያ ደረትያ አሞረቱ ቢታ ሄኮ ሀእ ጋኬድታ።21በእተ፥ መና ጎዳይ ህንተ ጾሳይ ሀ ቢታ ህንተንቶ እሜዳ። መና ጎዳይ ህንተ አዎቱዋ ጾሳይ ህንተንቶ ኦዴዳዋዳን ከሲደ፥ ሀ ቢታ ላትተ፤ ያዮፕተ፤ ህዶታ አጎፕተ’ ያጋድ።22“ህንተ ኡባይ ታኮ ዪደ ታና፥ ‘ሄ ቢታ ዎቺደ፥ ኑን ባናዉ በስያ ኦግያባነ፥ ኑን ገላና ካታማቱዋ ኦዱዋ ኑዉ አህያ አሳቱዋ ኑፐ ስንዉ የዶይተ’ ያጌድታ።23“ሄ ቆፋይ ታዉ ሎአ ማላቴዳ፤ ያትና፥ ህንተፐ ታማነ ላኡ አሳ፥ ዛርያፐ ዛርያፐ እት አሳ ዶራድ።24ኡንቱንቱ ቤድኖ፤ ሄ ደረትያ ቢታ ፑደ ከሴድኖ፤ ቃይ ኤሽኮላ ዛንጋራኮካ ቢደ፥ ቢታ ዎቼድኖ።25ሄ ጋድያን ሞክያባፐ አማሬዳ አይፍያ ባረንቱ ኩሽያን ኦይቂደ፥ ኑኮ አክ ዬድኖ፤ ቃይ፥ ‘መና ጎዳ ኑ ጾሳይ ኑዉ እምያ ቢታይ ሎአ’ ያግያ ኦዱዋካ አሂደ ኦዴድኖ።26“ሽን ህንተ መና ጎዳ ህንተ ጾሳ አዛዞ ማካሊደ፥ ከሰናን እጼድታ።27ህንተ ዱንካንያ ግዶን እቱ እቱዋና፥ ሀዋዳን ያጊደ ዙዙሜድታ፤ ‘መና ጎዳይ ኑና እጼዳ ድራዉ፥ ይሳናዉ አሞረ ቢታ አሳቱ ኩሽያን አ እማናዉ፥ ግብጼ ጋድያፐ ከሴዳ።28ኑን ሀቃ ከሴቶ? ኑ እሻቱ “ሄ ጋድያን ደእያ አሳይ ኑፐ ዳሪኖነ አዱቂኖ። ካታማቱካ ግታነ ሳሉዋ ጋካናዉ ግምበቴዳዋንታ። ሄዋ ቦላካ ቃይ አናቀቱዋ ጌተትያ ዳሮ አዱሳ አሳቱዋ ያን በኤዶ” ያጊደ፥ ኑ ዎዛና እርጽሴድኖ ያጌድታ።29“ ‘ሄዋፐ ጉይያን፥ ታን ሀዋዳን ያጋድ፤ ኡንቱንቶ ያዮፕተ ዎይ ሻባረቶፕተ።30ህንተፐ ስንና ብያ መና ጎዳይ ህንተ ጾሳይ ካሰ ግብጼን ህንተ አይፍያ ስንን እ ህንተንቶ ኦዳዋዳን፥ ሀእካ ህንተንቶ እ ኦለታና።31ቃይ መላ ቢታን፥ ህንተ ሀ ሳኣ ጋካናዉ ዬዳ ኦገ ኡባን፥ አሳይ ባረ ናኣ ቶክያዋዳን፥ መና ጎዳይ ህንተ ጾሳይ ህንተና ቶኬዳዋ በኤድታ’ ያጋድ።32“ሀ ኡባ ታ ኦድንካ፥ ህንተ ዱንካናና ሳኣ በሳናዉነ ህንተ ባና ኦግያ በሳናዉ ቃማ ታማ ቱሳን፥ ጋላስ ሻርያ ቱሳን ህንተና ካለዳ መና ጎዳ፥ ህንተ ጾሳን፥ አማንበይክታ።ጾሳይ እስራኤላቱዋ ሙሬዳ
34“መና ጎዳይ ህንተ ሃሳያ ስሲደ ሀንቀቴዳ፤ ሀዋዳን ያጊደ ጫቄዳ፤35‘ታን ህንተ ማይዛ አዋቶ እማና ጋደ ጫቄዳ ሀ ሎኦ ቢታ፥ ሀ ኢታ የለታፐ እቱነ በኤና።36ሄ ቢታ በአናዌ ይፉነ ናኣ ካሌባ ጻላላ። እ የዳ ቢታ አዉነ አ ዛርያዉ ታን እማና፤ አያዉ ጎፐ፥ እ ባረ ኩመን ዎዛናፐ መና ጎዳ ካሌዳ’ ያጊደ ጫቄዳ።37“ህንተ ጋሱዋን መና ጎዳይ ታ ቦላካ ሀንቀቲደ፥ ሀዋዳን ያጌዳ፤ ሙሴ፥ ሀራይ አቶ ኔንካ ሄ ቢታ ገላካ።38ሽን ኔና ማድያዌ፥ ኔዌ ናአይ ኢያሱ ሄ ቢታ ገላና። እ እስራኤልያ አሳ ሄ ቢታ ላትሳናዉ ደእያ ድራዉ፥ ኔን አ ምን።39ቃይ ህንተ፥ ‘ኑ ናናይ ኦሞደታና’ ጌዳ ጉቱነ ኢታ ሎይ ሻክ ኤርቤና ህንተ ናናይ ሄ ቢታ ገላና። ታን ሄ ቢታ ኡንቱንቶ እማና፤ ኡንቱንቱካ አ ላታና።40ሽን ህንተና ግዶፐ፥ ህንተ ጉየ ስሚደ፥ ዞኦ አባ አፍያ ኦግያ ኦይቂደ፥ መላ ቢታ ቢተ ያጌዳ።41“ህንተ ዛሪደ ታዉ ሀዋዳን ያጌድታ፤ ‘ኑን መና ጎዳ ቦላ ናጋራ ኦዶ፤ ሀእ ኑን መና ጎዳይ ኑ ጾሳይ አዛዜዳዋዳን፥ ከሲደ ኦለታና’ ያጌድታ። ህንተ ኡባይ ኦላ ሚሻ ግጼድታ፤ ቃይ ገዘ ቢታ ከሲደ ኦለታናዋካ ላፋባዳን ቆፔድታ።42“ሽን መና ጎዳይ ታና፥ ‘ታን ኡንቱንቱና ደኤና ድራዉ፥ ኡንቱንቱ ከሲደ ኦለተናዳን ኦዳ፤ ሄዌ ዮፐ ኡንቱንቱ ሞርከቱ ኡንቱንታ ጾናና’ ያጌዳ።43ታን ህንተንቶ ኦዳድ፤ ሽን ህንተ መና ጎዳ አዛዞ ማካሌድታፐ አትና፥ ታን ኦዴዳዋ ስስበይክታ፤ ያቲደ ህንተ ኦቶሩዋን ገዘ ቢታ ከሴድታ።44ያትና፥ ሄ ገዘ ጋድያን ደእያ አሞራቱ ህንተናና ኦላ ጋከቲደ፥ ህንተና ማይ የደርስያዋዳን የደርሲደ፥ ሄ ኤዶማ ጋድያን ቢደ ሆርማ ጋካናዉ ሾጬድኖ።45ህንተካ ጉየ ስሚደ፥ መና ጎዳ ስንን ዬኬድታ፤ ሽን ጾሳይ ህንተ ዬኩዋ ስስቤና ዎይ ሀይዝቤና።46ያትን ቃዴሳን ሄ ህንተ ጋምኦ ኬሻ ጋላሳ ጋምኤድታ።