1አያዉ ጎፐ፥ ኑን ደእያ ሀ ሳኣ ዱንካኒ ኮለቶፐ፥ ኑዉ አሳይ ኬጽቤና ጎሊ፥ ጾሳይ ኬጼዳዌ፥ ሳሉዋን መናዉ ደእያዋ ኑን ኤሬቶ።2ኑን ሀ አላምያን ደኢደ ዳሮ ኦሌቶነ ሳሉዋን ደአና ኑ ጎልያ ማያናዉ ሎይ አሞቴቶ።3ኑን ሄዋ ማዪደ፥ ካሎቶኮ፤4ኑን ሀ ሳኣ ዱንካንያን ደኢደ፥ ዴጸቲደ ኦሌቶ፤ አያዉ ጎፐ፥ ሀይቂያ አሳተይ ደኡዋን ምተታና ማላ፥ ኑን ማያናዉ ኮዬቶፐ አትን፥ ካሎታናዉ ኮዮኮ።5ኑና ሀዎ ጊግሴዳዌ ጾሳ፤ ቃይ እ ባረ ጌሻ አያና ዋሰ ኦደ፥ እሜዳዌ አ።6ሄዋ ድራዉ፥ ኑን ኡባ ዎደ አማነቴቶ፤ ቃይ ኑን ኑ ጎለን ሀ አሳተን ደኤዳ ኬናን፥ ጎዳፐ ሻከቲደ ደእያዋካ ኤሬቶ።7አያዉ ጎፐ፥ ኑን አማኑዋን ደኤቶፐ አትን፥ በእያዋን ደኦኮ።8ኑና አማን፤ ቃይ ሀ አሳተን ኑ ጎልያ አግ ጎለ ቢደ ጎዳና እትፐ ደእያዌ ኑና ናሸቼ።9ሄዋ ድራዉ፥ ኑን ቃይ አሹዋን ደእና ደአና ይና፥ ኑ ቆፋይ አ ናሸቻናሳ።10አያዉ ጎፐ፥ ኑን ሁጲያን ሁጲያን ኦዳ ኦሱ ሎአ ግድና፥ ዎይ ኢታ ግድና፥ ኑዉ በስያዋ አካናዉ፥ ክርስቶሳ ፕርዳ ኦይድያ ስንን ኡባይካ ሺቃናዉ በሴ።
አሳ ጾሳና ዳቦይያ ኦሱዋ
11ሄዋ ድራዉ፥ ኑን ጾሳዉ ያዩሳይ አየንቶ ኤሪደ፥ ሄዋዳን ቃይ አሳካ አማንቶ፤ ጾሳይ ኑና ኡባና ኤሬ፤ ቃይ ህንተካ ህንተ ዎዛና ቆፋን ኑና ኤሪታ ያጋደ ቆፓይ።12ቤትያባን ጬቀትያዋንቱፐ አትን፥ ዎዛናን ደእያዋን ጬቀተና አሳቶ ህንተ ኦድ ዛርያባይ ደአና ማላ፥ ህንተ ኑናን ጬቀታናዳን፥ ኑን ህንተንቶ ጋሱዋ ግዳናዉ ኮይያዋፐ አትን፥ ኑና ጋላታናዉ ኮዮኮ።13ኑን ጎይያዋ ግዶፐ፥ ጾሳ ቦንቹዋሳ፤ ዎይ ቃይ ዎዛናና ደእያዋ ግዶፐካ፥ ህንተና ጎአናሳ።14ክርስቶሳ ሲቁ ኑና ግዴ፤ አያዉ ጎፐ፥ እት አሳይ አሳ ኡባዉ ሀይቄዳዋ ኑን አኬኬዶ፤ ሄዋ ግዶፐ አሳይ ኡባይ አናና ሀይቄዳ።15ፓጻ ደእያዋንቱ ባረንቱ ድራዉ ሀይቄዳዎነ ቃይ ሀይቁዋፐ ደንዴዳዎ ደአናፐ አትን፥ ስንፐ ባረንቱ ሁጰዉ ደኤና ማላ፥ እ አሳ ኡባ ድራዉ ሀይቄዳ።16ሄዋ ድራዉ፥ ኑን ሀዋፐ ስንዉ ኦናነ አሳ ቆፋን ፕርዶኮ፤ ሀራይ አቶ፥ ኑን ክርስቶሳ ካሰ አሳ ቆፋን ፕርዴዳዋ ግዶፐካ፥ ስም ስንፐ ሄዋዳን ፕርዶኮ።17ሄዋ ድራዉ፥ ኦንነ ክርስቶሳና ደኦፐ፥ ኦራ መታ፤ ጭማይ አዳ፤ በእተ፥ ኡባባይካ ኦራጼዳ።18ክርስቶሳ ባጋና ኑና ባረናና ስገዳ ጾሳይ ኡባባካ ኦዳ፤ ቃይ እ ኑዉ ሀራቱዋ ባረናና ስገያ ኦሱዋ እሜዳ።19ጾሳይ ክርስቶሳ ባጋና አሳ ኡባ ባረናና ስገ፤ አሳ ናጋራካ አሳ ቦላ ፓይደና፤ ቃይ አሳ ባረናና ስገያ ኪታካ ኑዉ እሜዳ።20ስም ጾሳይ ኑ ባጋና ህንተንቶ ሃሳይያዋዳን፥ ኑንካ ክርስቶሳ ድራዉ ሃሳይያ እ ኪቴዳዋንታ፤ ቃይ ኑን ህንተና፥ “ጾሳና ስገትተ” ጊደ፥ ክርስቶሳ ድራዉ ዎሴቶ።21ኑን ጾሳ ጽሎተ ክርስቶሳ ባጋና አካና ማላ፥ ናጋራ ኤረና ክርስቶሳ ኑ ድራዉ፥ ጾሳይ ናጋራንቻ ኦዳ።