ጾሳ ናሸችያ ደኡዋ
1ስም ዉርሰን፥ ኑናዳን ጾሳ ካልያዋንቶ፥ ጾሳ ናሸቻናዉ ህንተንቱ ዋን ደአናዉ በስንቶ፥ ኑፐ ታማሬድታ። ሄዌ ህንተንቱ ካሴደፐ ደእያ ማራ፤ ሽን ሀእ ህንተንቱ ካሰዋፐ ሎይደ ኦናዳን፥ ጎዳ የሱሳ ሱንን ህንተና ዎሴቶነ ዞሬቶ።2አያዉ ጎፐ፥ ኑን ጎዳ የሱሳ ማታ ባጋና ህንተንቶ እሜዳ አዛዙ ሀቃዌንቶ፥ ህንተንቱ ኤሪታ።3አያዉ ጎፐ፥ ጾሳይ ህንተፐ ኮይያዌ አዬ ጎፐ፥ ህንተንቱ ጌሻ ግዳናዋነ ዎሹምያዋ ኡባና አጋናዋ ኮዬ።4ህንተንቱ ሁጲያን ሁጲያን ጌሻተንነ ቦንቹዋን ህንተንቱ ማችያና ዎት ደአነንቶኤራናዉ በሴፐ አትን፥5ጾሳ ኤረና አማነና አሳቱዋዳን፥ ሎይ አሞትያዋን አካናዉ በሰና።6ኑን ቃይ ካሰ ህንተንቶ ኦዴዳዋዳንነ ህንተና ምንስ ዞሬዳዋዳን፥ ጎዳይ ሀዋ ማላባን ኡባን ሀሉዋ ከስያዋ ግድያ ድራዉ፥ ኦንነ ሀ የዉዋን ባረ እሻ ናቃናዉነ ጭማናዉ በሰና።7አያዉ ጎፐ፥ ጾሳይ ኑና ጌሻተን ደአናዉ ጼሴዳዋፐ አትን፥ ቱናተን ደአናዉ ጼስቤና።8ሄዋ ድራዉ፥ ሀ ትምርትያ እጽያ ኦንነ ህንተንቶ ባረ ጌሻ አያና እምያ ጾሳ እጼፐ አትን፥ አሳ እጸና።9ህንተ ህንተንቱ ሁጲያን እቱ እቱዋ ሲቃናዳን፥ ጾሳይ ህንተና ታማርሴዳ ድራዉ፥ ህንተንቱ ህንተንቱ እሻቱዋ ዎት ሲቃናዉ በስንቶ፥ ኑን ጻፋናዉ ኮሸና።10ቃይ ማቅዶንያ ቢታ ኡባን ደእያ እሻቱዋ ኡባቱዋ ቱሙ ህንተንቱ ሲቂታ። ሽን ኑናዳን ጾሳ ካልያዋንቶ፥ ህንተንቱ ሄዋፐ ጉጅ ጉጂደ ኡንቱንታ ሲቃና ማላ፥ ህንተና ዎሴቶ።11ኑን ካሰ ህንተንቶ ኦዴዳዋዳን፥ ዎፑ ጌዳ ደኡዋ ደእተ። ቃይ ህንተና ኮሽያዋ ደማናዉ፥ ህንተ ኩሽያን ኦተ።12ሄዋ ግዶፐ፥ አማነናዋንቱ ማታን ህንተንቱ ቦንቼታናነ ቃይ ህንተና ኮሽያባዉ ኦናነ አዉዳሽክታ።ጎዳይ ይያ ዎደ ሀይቄዳ አሳይነ ፓጻ ደእያ አሳይ ሀናናባ
13ሽን ኑናዳን ጾሳ ካልያዋንቶ፥ ህንተንቱ ህዶታይ ባይና አሳቱዋዳን ካዮተና ማላ፥ ሀይቄዳ አሳቱዋባ ህንተንቱ ኤራና ማላ ኮዬቶ።14ኑን የሱስ ሀይቄዳዋነ ቃይ ሀይቁዋፐ እ ደንዴዳዋ አማኔቶ፤ ሄዋዳንካ፥ ጾሳይ የሱሳ አማኒደ ሀይቄዳዋንታ የሱሳና አሀናዋ አማኔቶ።15አያዉ ጎፐ፥ ኑን ህንተንቶ ኦድያ ጎዳ ቃላይ ሀዋ፤ ኑን፥ ጎዳ ላኤንዋ ዩሳ ጋላሳይ ጋካናዉ ሀዋን ፓጻ ደእያዋንቱ፥ ሀይቄዳዋንቱፐ ካሰቶኮ።16አያዉ ጎፐ፥ ጎዳይ ባረ ሁጲያን አዛዙዋና፥ ኪታንቻቱዋ ካፑዋ ኮሻና፥ ጾሳ ማላካታ ጊረና ሳሉዋፐ ዎና። ክርስቶሳ አማኒደ ሀይቄዳዋንቱ ካሰቲደ ሀይቁዋፐ ደንዳና።17ሄዋፐ ጉይያን፥ ኑን ሄ ዎደ ፓጻ ደእያዋንቱ፥ ጎዳና ጫርኩዋ ግዶን ጋከታናዉ ኡንቱንቱና እትፐ ሻርያን ደንዳና። ሄዋ ድራዉ ኑን ጎዳና እትፐ ኡባ ዎደ ደአና።18ሄዎ፥ ሀ ቃላን እቱ እቱዋ መንተ።