ጾሳ ታቦታይ ኦሞደቴዳ
1እስራኤላቱ ፕልስጼማቱዋና ኦለታናዉ ከሴድኖ፤ እስራኤላቱ ኤበንኤዘረን ሺቅና፥ ፕልስጼማቱ አፌቃን ሺቄድኖ።2ፕልስጼማቱ ጭታን ጭታን ግዲደ፥ እስራኤላቱዋና ኦለታናዉ ደንዴድኖ፤ ኦላይ ሱልና፥ ኦይዱ ሻአ እስራኤላቱዋ ዎዳ ፕልስጼማቱዋን እስራኤላቱ ጾነቴድኖ።3ኦላንቻቱ ሺቄዳ ሳኣ ስሜዳ ዎደ፥ እስራኤልያ ጭማቱ፥ “ሀቼ መና ጎዳይ ኑና ፕልስጼማቱዋን አያዉ ጾንሴዴ? ኑናና ባናዳንነ ኑና ኑ ሞርከቱዋ ኩሽያፐ አሻናዳን ጾሳ ቃላ ጫቁዋ ታቦታ ሴሎፐ አነ አሆይተ” ያጌድኖ።4ሄዋ ድራዉ፥ አሳይ ሴሎ ኪትና፥ ክሩበቱዋ ግዱዋን አራታን ኡትያ ኡባፐ ዎልቃማ መና ጎዳ ቃላ ጫቁዋ ታቦታ አሄድኖ። ኤልያ ናናይ ላአቱ ሆፍኒንነ ፒንሃስ ጾሳ ቃላ ጫቁዋ ታቦታና ያን ደኢኖ።5መና ጎዳ ቃላ ጫቁዋ ታቦታይ ሺቄዳ ሳኣ ጋኬዳ ዎደ፥ እስራኤላቱ ኡባይ ቢታይ ቃጻና ጋካናዉ ባረንቱ ቃላ ቁ ኦደ፥ “ጾሳ ቃላ ጫቁዋ ታቦታይ ጋኬዳ” ያጌድኖ።6እስራኤላቱዋ ጫቡዋ ፕልስጼማቱ ስሲደ፥ “ሀዌ እብራዌቱ ሺቄድኖ ሳን ስሰትያ፥ ዎልቃማ ዋላሳይ አዬ?” ያጌድኖ። መና ጎዳ ታቦታይ ኡንቱንቱ ሺቄዳ ሳኣ ዬዳዋ ፕልስጼማቱ ኤሪደ ያዬድኖ።7ሀዋዳን ያጌድኖ፤ “ጾሳይ ኡንቱንቱ ሺቄዳ ሳኣ ዬዳ። አየ አና ኑኖ! ሀዋ ማላባይ ሀዋፐ ካሰ ሀን ኤረና።8አየ አና ኑኖ! ሀ ዎልቃማ ጾሳቱዋ ኩሽያፐ ኑና አሻናዌ ኦኔ? ሀ ጾሳቱ ግብጼቱዋ ዎራን ቦሻ ኡባን ሾጬዳዋንታ።9ህንተንቶ ፕልስጼማቶ፥ ምንተ! አሳዳን ኦለትተ! ሄዌ ዮፐ፥ ህንተንቱ ኡንቱንታ ካሰ አይለተን ሞዴዳዋዳን፥ ኡንቱንቱካ ህንተንታ ሞዳናዋንታ። ሄዋ ድራዉ፥ አሳዳን ኦለትተ!” ያጌድኖ።10ፕልስጼማቱ ኦለቲደ፥ እስራኤላቱዋ ጾኔድኖ፤ እስራኤላቱ ባረንቱ ዱንካንያኮ ባቃቴድኖ። ሄ ኦላን ዳሮ አሳይ ጎራኤቴዳ፤ እስራኤልያ ኦላንቻቱዋፐ ሀታሙ ሻአይ ሀይቄዳ።11ጾሳ ታቦታይ ኦሞደቴዳ፤ ኤልያ ናናይ ላኡ፥ ሆፍኒንነ ፒንሃስ ሀይቄድኖ።ኤልያ ሀይቁዋ
12ቢንያማ ዛረ ግዴዳ እት ብታኒ ኦላ ደምባፐ ዎጺደ፥ ሄ ጋላስ ሴሎ ጋኬዳ፤ ካዩዋ ኤርሳናዉ እ ባረ ማዩዋ ፔደ፥ ባረ ሁጲያንካ ባና ላሌዳ።13ሄ ብታኒ ጋክያ ዎደ፥ ኤል ባረ ዎዛናን ጾሳ ታቦታባ ህርጌዳ ድራዉ፥ ናጊደ ኦግያ ዶናን ደእያ ባረ ኦይድያን ኡቴዳ። ብታኒ ካታማ ገሊደ፥ ሀኔዳባ ኦድና፥ ካታማይ ኡባይ ዋሱዋ ጹሌዳ።14ኤልካ ሄ ዋሱዋ ስሲደ፥ “ሀዌ አይባ ዋሴ?” ያጌዳ። ብታኒ ኤለካ ዪደ፥ ኤልያው ኦዴዳ፤15ኤል ኡዱፑን ታማነ ሆስፑን ላይ ጭማ ግዴዳ፥ አይፊካ ጼላ አጊደ ጎልጄዳ አሳ።16ብታኒ ኤልያው፥ “ኦላ ደምባፐ ዬዳዌ ታና፤ ታን ሀቼ ያፐ ባቃታድ” ያጌዳ። ሄዋፐ ጉየ ኤል፥ “ታ ናአዉ፥ ያትና ዋኔዴ?” ያጊደ ኦቼዳ።17ኦዱዋ አሄዳ ብታኒ፥ “እስራኤላቱ ፕልስጼማቱዋ ስንፐ ባቃቴድኖ፤ ዳሮ አሳይ ዉሬዳ፤ ነ ናናይ ላኡ ሆፍኒንነ ፒንሃስ ሀይቄድኖ፤ ጾሳ ታቦታይካ ኦሞደቴዳ” ያጌዳ።18ብታኒ ጾሳ ታቦታባ ኦዴዳ ዎደ፥ ፐንግያ ማታን ደእያ ባረ ኦይድያፐ ኤል ጉየ ኩንድና፤ ባርጋል መእና ሀይቄዳ፤ አያዉ ጎፐ፥ እ ጭማነ ኦርዱዋ። ኤል እስራኤልያ ጋድያን ኦይታሙ ላይ ዳናቴዳ።19ኤልያ ናኣ ፒንሃሳ ማቻታ የላናዉ ዎዲ ጋኬዳ ሻሃራ። ጾሳ ታቦታይ ኦሞደቴዳዋነ ባረ ቦሉነ ባረ አስናይ ሀይቄዳዋ አ ስሴዳ ዎደ፥ ቆፐናን የሉ እዞ ኦይቂና የላዱ።20አ ሀይቃናዉ ማታቴዳ ዎደ፥ የልስያዋንቱ፥ “ኔን አቱማ ናኣ የሌዳ ድራዉ ያዮፓ” ያጌድኖ፤ ሽን ኡንቱንቶ አ አይነ ዛራበይኩ፤ ኡንቱንቱ ግያዋካ ሀይዛበይኩ።21አ ባረ ናኣ እካቦዳሱንዱ፤ ጾሳ ታቦታይ ኦሞደቴዳ ድራዉነ ባረ ቦሉነ ባረ አስናይ ሀይቄዳ ድራዉ፥ “ቦንቹ እስራኤላቱዋፐ ሻከቴዳ” ያጋዱ።22አ፥ “ቦንቹ እስራኤላቱዋፐ ሻከቴዳ፤ አያዉ ጎፐ፥ ጾሳ ታቦታይ ኦሞደቴዳ” ያጋዱ።