Read 1 ሳሜላ 2

1 ሳሜላ2dwr_ent

ሃን ዎሳ

¹ሃና ሀዋዳን ያጋደ ዎሳዱ፤“ታ ዎዛናይ መና ጎዳን ናሸቴ፤መና ጎዳን ታ ዎልቃይ ዳሬዳ።ታ ሞርከቱዋ ቦላን ታን ጬቀታደ ሃሳያይ፤መና ጎዳይ ታና አሼዳ ድራዉ፥ ታን ናሸታይ።

²“መና ጎዳ ማላ ጌሽ እቱነ ባዋ፤አ ማል እቱነ ባዋ።ኑ ጾሳፐ አትና፥ሀራ አትያ ዎጋ ዛላይ ባዋ።

³“ኦቶሮ ሃሳያ አግተ፤ኦቶሮ ቃላይ ህንተንቱ ዶናፐ ከሶፖ።አያዉ ጎፐ፥ መና ጎዳይ ኤርያ ጾሳ፤አሳ ኦሱዋ እ ይግ ጼሌ።

⁴“ኦላንቻቱዋ ዎንዳፊ መኤዳ፤ሽን በቴዳዋንቱ ዎልቃ ዳንጬድኖ።⁵ካል ኡቴዳዋንቱ ኮሻቲደ፥ቁማዉ ሀራዉ ኦኖ፤ሽን ኮሻት ኡቴዳዋንቱ ሀእ ካሌድኖ።ማንታ ላፑን ናና የላዱ፤ሽን ጮራ ናና የሌዳና ዳቡራዱ።

⁶“መና ጎዳይ ዎነ ፓ፤ቃይ እ ዱገ ስኦልያን የጌነ ፑደ ከሴ።⁷መና ጎዳይ ማንቀነ ዱረዬ፤ቃይ እ ዝቂሴነ ቂሴ።⁸እ ህዬሳቱዋ ባናፐ ደን።መቶታንቻቱዋካ ብድን ፕቱዋፐ ደን፤ኡንቱንታ ካፓቱዋና ኡትሴ፤ኡንቱንታ ቦንቾ አራታ ላትሴ።“አያዉ ጎፐ፥ ቢታ ባሳቱ መና ጎዳሳ፤እ ኡንቱንቱ ቦላን ሳኣ ኤሴዳ።⁹እ ጾሳ አሳቱዋ ገድያ ናጌ፤ሽን ኢታቱዋ እ ማን ጮኡ ኡዳና።“አሳይ ባረ ዎልቃን ጾነና፤¹⁰መና ጎዳና ኤቀትያዋንቱ ሊቃና።እ ሳሉዋፐ ኡንቱንቱ ቦላ ጉጉንዳን ጉማና፤መና ጎዳይ ሳኣን ደእያዋንታ ኡባ ፕርዳና።“እ ባረ ካትያዉ ዎልቃ እማና፤እ ባረ ኦኬዳዎ ጾኑዋ እማና”ያጋደ ዎሳዱ።¹¹ሄዋፐ ጉይያን፥ ኤልቃን ራማን ደእያ ባረ ሶይ ቤዳ፤ ሽን ናአይ ሳመል ቄስያ ኤልያፐ ጋርሳና መና ጎዳዉ ኦ።

ኤልያ አቱማ ናና ኢታተ

¹²ኤልያ አቱማ ናናይ ኢታ ናናቱዋ፤ ኡንቱንቱ መና ጎዳ ኤርክኖ፥¹³ዎይ ያርሹዋ እምያ አሳዉ ቄሳቱ ኦያ ዎጋ ናግክኖ። ሄዌነ፥ አሳይ ያርሹዋ ያርሽያ ዎደ፥ ቄስያ ቆማይ ሄዙ አቻ ብራታ ኮጫን አኬዳ፤ አሹ ብሮ ካእ ደእሽን፥¹⁴ዶይስያ ዎጋ ኦቱዋን ዎይ ከርያን ሄ ኮጫ የዲደ፥ ኮጫይ ኦይቂ ከስያ አይ ቆሞ አሹዋ ግዶፐነ አፊደ፥ ቄስያዉ እሜ። ያርሹዋ ያርሻናዉ ሴሎ ይያ እስራኤልያ አሳ ኡባ ኡንቱንቱ ሀዋዳን ኦኖ።¹⁵ቃይ ሞዋ ያርሽያ ሳኣን ጺጻናፐ ካሰቲደ፥ ቄስያ ቆማይ ያርሹዋ ያርሽያ ብታንያኮ ቢደ፥ “ቄሲ ቃየ አሹዋፐ አትና፥ ዶይሳ አሹዋ ኔፐ አከና ድራዉ፥ አዉ ጺጻናዉ አማሬዳ አሹዋ ሀማ” ያጌ።¹⁶ሄዋፐ ጉየ ብታኒ ዛሪደ፥ “ዎጋዳን ቄሳቱ ሞዋ ኮይሮ ጹግኖ፤ ሄዋፐ ጉይያን፥ ኔን ኮይያዋ አካ” ያግያ ዎደ ቄስያ ቆማይ፥ “ቱይት፤ ታዉ ሀእ እማ፤ ኡባ ኔን ድጎፐ፥ ታን ኔፐ ዎልቃን አካና” ያጌ።¹⁷መና ጎዳዉ እምያ ያርሹዋ ኤልያ ናናይ ካዳ ድራዉ፥ ኡንቱንቱ ናጋራይ መና ጎዳ ስንን ሎይ ዳሬዳ።

ናኣ ሳመላ

¹⁸ሽን ሳመል ናአተን ደኢደ፥ ሱፍያ ጌተትያ ክርያፐ ዳደቴዳ ኤፉደ ጌተትያ ማዩዋ ማዪደ፥ መና ጎዳዉ ኦ።¹⁹ሳመላ ዳያ ላይን ላይን ጉ ቆልያ ጊግሳደ፥ ላይ ያርሹዋ ያርሻናዉ ባረ አስናና ባደ ሳመላዉ አካደ ባዉ።²⁰ኤል ኤልቃናነ አ ማቻቶ፥ “ነ ማቻታ መና ጎዳዉ እሜዳ ናኣ ድራዉ መና ጎዳይ ነዉ ሀ ምሽራትን ሀራ ናና እሞ” ያጊደ አንጄ፤ ያትና፥ ኡንቱንቱ ባረንቱ ሶይ ስሚኖ።²¹መና ጎዳይ ሃኖ አንጅና፥ ሻሃራደ ሄዙ አቱማ ናናነ ላኡ ማጫ ናና የላዱ። ናአይ ሳመል መና ጎዳ ስንን ድጬዳ።

ኤልያነ አ ናና

²²ኤል ሎይ ኤጬዳ። አ ናናይ እስራኤልያ አሳ ኡባ ቦላ ኦዳ ኡባባነ ቃይ ጾሳ ዱንካንያ ፐንግያን ጾሳዉ ኦያ ማጫ አሳቱዋና ግሴዳዋ ስሴዳ።²³ኡንቱንታ፥ “ህንተንቱ ሀዋ ማላ አያዉ ኦቴ? ህንተንቱ ኢታ ኪታ ታን አሳ ኡባፐ ስሳይ።²⁴ታ ናቶ፥ ሀዋ አግተ፤ መና ጎዳ አሳይ ህንተንታ ግያዋ ታን ስሴዳዌ ሎኦባ ግደና።²⁵እት አሳይ አሳ ናቆፐ፥ ጾሳይ አዉ ጋናታና፤ ሽን አሳይ መና ጎዳ ናቆፐ፥ ኦኔ አዉ ጋናታናዌ?” ያጌዳ። መና ጎዳይ፥ “ታን ኡንቱንታ ዎና” ጌዳ ድራዉ፥ ኡንቱንቱ ባረንቱ አዉዋ ሴራ ስሰናን እጼድኖ።²⁶ናአይ ሳመል ጾሳ ስንንነ አሳ ስንን ድጬዳነ ሳበቴዳ።

ኤልያ ሶይ አሳ ቦላ ኦደቴዳ ትምቢትያ

²⁷እት ጋላስ ጾሳ አሳይ ኤልያኮ ዪደ አ፥ “መና ጎዳይ ሀዋዳን ያጌ፤ ‘ነ ማይዛ አዉ አሮነነ አ ሶ አሳይ ግብጼ ካትያ አይለተን ደእያ ዎደ፥ ታን ኡንቱንቶ ቆንጫድ።²⁸አሮነ ታ ያርሽያ ሳኣ ፑደ ከሳና ማላ፥ እጻና ጩዋያና ማላነ ታ ስንን ኤፉድያ ማያና ማላ፥ ታዉ ቄስያ ኡዳደ እስራኤልያ ዛራቱዋ ኡባፐ አ ዶራድ። ቃይ እስራኤልያ አሳይ ታማን ያርሽያ ያርሹዋ ኡባ ታን ነ አዉዋ ዛርያዉ እማድ።²⁹ታን ታ ደእያ ሳኣ ሺሻና ማላ አዛዜዳ ታ ያርሹዋነ እምያዋ ህንተንቱ አያዉ የ ካኢቴ? ታ አሳይ እስራኤሊ፥ ታዉ ሺሼዳ ያርሹዋ ኡባፐ ሙሩትያዋ ህንተንቶ ሚደ ኦርድያዋን፥ ኔን ነ ናና ታፐ አደ አያዉ ቦንቻድ?’ ያጌ።³⁰“ሄዋ ድራዉ፥ መና ጎዳይ እስራኤልያ ጾሳይ ሀዋዳን ያጌ፤ ‘ነ ዛሪነ ነ አዉዋ ዛሪ መናዉ ታዉ ኦና’ ጋድ፤ ሽን ሀእ፥ ሄዌ ታፐ ሃኮ! ታና ቦንችያዋንታ ታን ቦንቻና፤ ታና ካያዋንታ ታን ካዉሻና።³¹ነ ዛርያን አሳይ ጭመና ማላ፥ ታን ነ ዎልቃነ ነ አዉዋ ዛርያ ዎልቃ ይስያ ጋላሳቱ ያናዋ።³²ኔን መቶታና፤ ታን እስራኤልያ አሳዉ እምያ አንጁዋ በኣደ ኔን ቃናታና፤ ሽን ነ ዛርያን ጭማና አሳይ ኦንነ ባዋ።³³ታን ታ ያርሽያ ሳፐ ይሰና አሳይ ደኦፐ፥ አ ጋሱዋን ነ አይፊ አፎጺደ ቆቃናነ ነ ዎዛናይካ ምሹዋ ጹገታና፤ ነ ዳሮ ዘረ ኡባይ ያላጋተን ደኢደ ሀይቃና።³⁴“ነ ናናይ ላኡ ሆፍኒንነ ፒንሃስ እት ጋላስ ሀይቃና፤ ሄዌ ነዉ ማላታ ግዳናዋ።³⁵ታን ታዉ አማነትያ ቄስያ፥ ታ ዎዛናዳንነ ታ ቆፋዳን ኦያዋ ደንና፤ ታን አ ዛራቱ ደእ በአናዳን ኦና፤ ታን ዶሬዳዌ ካትያ ስንን ኡንቱንቱ ኡባ ዎደ ኦና።³⁶ነ ዛርያን አቴዳ ኡባይ ጉ ሚሻ ዎይ ባሶ ኡክ ዎሳናዉ ዪደ፥ አ ስንን ጉፋኒደ፥ ‘ታን ኡክ ማና ማላ፥ ቄሳቱ ዋፐ እቱዋ ሳኣ ማላን ታና ዎርኪ’ ያጋና ያጌ” ያጌዳ።

1 ሳሜላ 2 / dwr_ent

ሃን ዎሳ

ኤልያ አቱማ ናና ኢታተ

ናኣ ሳመላ

ኤልያነ አ ናና

ኤልያ ሶይ አሳ ቦላ ኦደቴዳ ትምቢትያ

1 ሳሜላ2dwr_ent