ሳመላ ዉርሰ ሳሮታ
1ሄዋፐ ጉይያን፥ ሳመል እስራኤልያ ኡባ ሀዋዳን ያጌዳ፤ “ህንተንቱ ታዉ ኦዴዳ ኡባባ ታን ስሳደ፥ ህንተንቱ ቦላ ካትያ ካተያድ።2ሀእ ዛር ህንተንታ ካለናዉ ካቲ ደኤ። ታና ግዶፐ፥ ታን ዳሮ ደኣድነ ጭማድ፤ ታ ናናይ ህንተናና ደኢኖ። ታን ታ ያላጋተፐ ሀቼ ጋካናዉ ህንተንታ ካለድ።3ሄኮ ታን ሀዋን ኤቃድ፤ መና ጎዳ ስንንነ እ ኦኬዳ ካትያ ስንን ታ ቦላ ማርካትተ። ታን ኦ ቦራ አካድታ? ኦ ሀርያ አካድታ? ኦና ጭማድታ? ኦና ኡቁናድታ? ታ አይፍያ ቆቅሳናዉ ኦ ኩሽያፐ ማጋንጻ ማድታ? ሀዋንቱፐ እቱዋነ ታን ኦዳዋ ግዶፐ፥ ታን ጭጋና” ያጌዳ።4ሄዋፐ ጉየ ኡንቱንቱ ዛሪደ፥ “ኔን ኑና ጭማባካ፤ ዎይ ኑና ኡቁናባካ፤ ኔን አሳ ኩሽያፐ አያነ ማጋንጻ ማባካ” ያጌድኖ።5ሳመል ኡንቱንታ፥ “ህንተንቱ ታ ኩሽያን አያነ ደምቤናዎ መና ጎዳይነ እ ኦኬዳ ካቲነ ሀቼ ህንተንቱ ቦላን ማርካ” ያጌዳ። ኡንቱንቱካ፥ “ኤ፥ እ ማርካ” ያጌድኖ።6ሳመል አሳ፥ “ሙሳነ አሮና ዶሬዳዌነ ህንተንቱ አዎቱዋ ግብጼፐ ከሴዳዌ መና ጎዳ።7ሀእ ስም ህንተንቱነ ህንተንቱ አዋቶ መና ጎዳይ ኦዳ ጽሎ ኦሶ ኡባዉ ታን ህንተናና መና ጎዳ ስንን ሞተታናዳን፥ ሀዋን ኤቂተ።8ያቆብነ አ ሶ አሳይ ግብጼ ቢደ ደእሽን፥ ግብጼ አሳቱ ኡንቱንታ ናቄዳ ዎደ፥ ህንተንቱ አዎቱ መና ጎዳዉ ዋሴድኖ፤ መና ጎዳይ ሙሳነ አሮና ኪቴዳ፤ ኡንቱንቱ ህንተንቱ አዎቱዋ ግብጼፐ ከሲደ፥ ሀዋን ዎድኖ።9“ሽን እስራኤልያ አሳቱ መና ጎዳ ባረንቱ ጾሳ ዶጌድኖ፤ ጾሳይ ኡንቱንታ ሀጾራ ኦላንቻቱ ጋዳዋ ሲሳራ ኩሽያን፥ ፕልስጼማ አሳቱዋ ኩሽያንነ ሞኣበ ካትያ ኩሽያን አደ እምና ኡንቱንታ ኦሌድኖ።10ኡንቱንቱ መና ጎዳዉ፥ ‘ኑን ናጋራ ኦዶ፤ ኑን መና ጎዳ አጊደ፥ ባኣላዉነ አስታሮታዉ ጎይኔዶ። ሽን ሀእ ኔን ኑና ኑ ሞርከቱዋ ኩሽያፐ አሻ፤ ኑን ነዉ ጎይናና’ ያጊደ ዋሴድኖ።11መና ጎዳይ ጌዶና፥ ባራቃ፥ ዮፍታሀነ ሳመላ ኪቲደ፥ ህንተንቱ ዩሹዋ ኡባን ደእያ ሞርከቱዋ ኩሽያፐ ህንተንታ አሼዳ፤ ያትና፥ ህንተንቱ ሳሮ ደኤድታ።12“አሞና አሳ ካትያ ናኦስ ህንተንቱኮ ዬዳዋ በኤዳ ዎደ፥ መና ጎዳይ ህንተንቱ ጾሳይ ህንተንቱ ካትያ ግዶፐነ፥ ህንተንቱ ታና፥ ቱይት፥ ኑን ኑና ሞዳናዉ ካትያ ኮዬቶ ያጌድታ።13ሀእካ ህንተንቱ ዶሪደ ኦቼዳ ካቲ ሀዌሽ! በእተ፤ መና ጎዳይ ህንተንቱ ቦላ ካትያ ዎዳ።14መና ጎዳዉ ህንተንቱ ያዮፐ፥ አዉ ኪተቶፐ፥ አ ቃላዉ አዛዘቶፐ፥ አ አዛዞ ማካለናን አጎፐነ ህንተንቱካ ህንተንቱ ቦላ ካተትያ ካቲካ ጾሳ ህንተንቱ ጾሳ ካሎፐ፥ ያቶፐ ሎአ።15ሽን መና ጎዳ ቃላዉ ህንተንቱ አዛዘተናን ዮፐነ አ አዛዞ ማካሎፐ፥ ጾሳ ፕርዳይ ካሰ ህንተንቱ አዎቱዋ ቦላ ዬዳዋዳን፥ ህንተንቱ ቦላካ ያናዋ።16“ስም ሀእ ኤቂ ባሽተ፤ መና ጎዳይ ህንተንቱ አይፍያ ስንን ኦያ ሀ ግታባ በእተ!17ዛርጋ ጫካ ዎዲ ሀአ ግደኔየ? መና ጎዳይ ጉጉንነ እራ የዳና ማላ፥ ታን ጾሳዉ ዋሳና። ያትያዋ ግዶፐ፥ ካትያ ህንተንቱ ኦቼዳዌ መና ጎዳ ስንን ዎልቃማ ኢታተ ግድያዋ ህንተንቱ ኤራናነ በአና” ያጌዳ።18ሳመል መና ጎዳዉ ዋሴዳ፤ መና ጎዳይ ሄ ጋላስ ጉጉንነ እራ የዴዳ፤ ሄዋ ድራዉ፥ አሳይ ኡባይ መና ጎዳነ ሳመላ ሎይ ያዬዳ።19አሳይ ኡባይ ሳመላ፥ “ኑን ካትያ ኦቺደ፥ ኑ ናጋራ ኡባ ቦላ ሀ ኢታተ ጉጄዳ ድራዉ፥ ኑን ነ ቆማቱ ሀይቀናዳን ኑዉ መና ጎዳ ነ ጾሳ ዎሳርኪ” ያጌዳ።20ሄዋፐ ጉየ ሳመል አሳዉ ሀዋዳን ያጌዳ፤ “ያዮፕተ፤ ቱሙካ ህንተንቱ ሀ ኢታተ ኡባ ኦድታ፤ ሽን ህንተንቱ ኩመን ዎዛናፐ መና ጎዳዉ ኪተትተፐ አትና፥ መና ጎዳ ካልያዋ አጎፕተ።21ማደና፥ አሸናነ ፓና ኤቃቱዋ ካሎፕተ፤ አያዉ ጎፐ፥ ሄዌ ፓናዋ።22መና ጎዳይ ባረ ዎልቃማ ሱን ድራዉ ባረ አሳ አገና፤ አያዉ ጎፐ፥ መና ጎዳይ ህንተንታ ባረ አሳ ኦናዉ ናሸቴ።23ህንተንቱ ድራዉ ዎስያዋ አጋደ መና ጎዳ ቦላ ናጋራ ኦናዌ ታፐ ሃኮ፤ ታን ህንተንታ ሎኦነ ሱረ ኦግያ ታማርሳና።24መና ጎዳዉ ያይተ፤ ህንተንቱ ኩመን ዎዛናፐ አማነቲደ፥ አዉ ኪተትተ፤ ህንተንቶ እ ኦዳ ግታባ ሀሳይተ።25ሽን ህንተንቱ ኢታባ ዛር ዛሪደ ኦፐ፥ ህንተንቱካ ህንተንቱ ካቲካ ያና” ያጌዳ።