አኪይ እዮርባማ ቦላ ትምቢትያ ኦዴዳ
1ሄ ዎደ እዮርባማ ናአይ አቢ ሀርጌዳ።2ያትና፥ እዮርባም ባረ ማቻቶ፥ “ደንዳደ ኔን እዮርባማ ማቻቶ ግድያዋ ኦንነ ኤረና ማላ፥ ነ ማዩዋ ላማ፤ ሴሎ ባ። ታን ሀ አሳ ቦላ ካተታናዋ ታዉ ኦዴዳ ትምቢትያ ኦድያ አኪ ያን ደኤ።3ታሙ ኡክ፥ አማሬዳ ኮምፑዋነ እት ኦቱዋ ኤሳ አዉ አካደ አኮ ባ። ሀ ሀርጌዳ ናአይ ሀናናባ እ ነዉ ኦዳና” ያጌዳ።4እዮርባማ ማቻታ እ ጌዳዋዳን ኦዱ፤ ደንዳደ አክያ ሶ ሴሎ ባዱ። አኪ ጼላናዉ ዳንዳየና፤ እ ጭሜዳ ድራዉ፥ አ አይፊ ደመና።5ሽን መና ጎዳይ አክያ፥ “እዮርባማ ማቻታ ባረ ናኣ ሀርግያዋ ኔና ኦቻናዉ ያዉ። ኔን እዝዉ ሀዋ ሀዋ ያጋደ ኦዳ። አ ያ ጋካደ ሀራ ማጫ አሳ ማላታናኑ” ያጌዳ።6ሄዋ ድራዉ፥ አኪ ማቻታ ፐንግያን ድእ ድእያዋ ስሲደ ሀዋዳን ያጌዳ፤ “እዮርባማ ማቻቴ፥ አነ ሃ ገላ። አያዉ ሀዋዳን ሀራ አሳ ማላታድ? ታን ኢታ ዎርያ ነዉ ኦዳናዉ ኪተታድ።7ኔን እዮርባመኮ ባደ ሀዋዳን ያጋ፤ ‘መና ጎዳይ እስራኤልያ ጾሳይ ኔና፥ “ታን ኔና አሳ ግዶፐ ቂሳድ፤ ታ አሳ እስራኤልያ ቦላ ኔና ካተያድ።8ታን ዳዊታ ዛርያፐ ካዉተ ዎ አካደ፥ ነዉ እማድ። ሽን ኔን ታ ቆማ ዳዊታ ማላ ግዳካ፤ እ ታ አዛዙዋ ናጌዳነ ታ ስንን ሱረባ ጻላላ ኦደ፥ ባረ ኩመን ዎዛናን ታና ካሌዳ።9ኔፐ ካሰ ደኤዳ ኡባቱ ኦዳዋፐ ዳርያ ኢታ ኔን ኦዳ፤ ኔን ነዉ ሀራ ጾሳቱዋ፥ ሴርሴዳ ብራታፐ ኤቃቱዋ መዳ። ያታደ ታና ሀንቀዳ፤ ታና ኔፐ ጉየ አዳ።10“ ‘ “ሄዋ ጋሱዋን ታን እዮርባማ ጎልያ አሳዉ ኢታ አሀና። እስራኤልያ ቢታን እዮርባማ ጎልያ አሳፐ አይልያ ግድና ላአ ግዲና፥ እት አቱማ አሳይነ አተናን ቆላና። እት ኡራይ ኦሻይ ዉራና ጋካናዉ ከስያዋዳን፥ እዮርባማ ጎልያ አሳ ታን ዉርሳ ከሳና።11እዮርባማ ዛርያ ግዲደ ካታማን ሀይቂያ ኦናነ ካናቱ ማና፤ ጋጻርያን ሀይቂያዋንታ ቃይ ሳሉዋ ካፎቱ ማና። ታን መና ጎዳይ ሀዋ ኦዳድ!” ያጌዳ’ ያጋ።12“ኔና ግዶፐ፥ ሀእ ኔን ደንዳደ ነ ሶ ባ። ነ ገዲ ካታማ ገልያ ዎደ፥ ናአይ ሀይቃና።13እስራኤልያ ኡባይ ናአዉ ዬኪደ ሞጋና፤ እዮርባማ ጎልያ አሳን መና ጎዳ እስራኤልያ ጾሳ ስንን ሀ ናኣን ሎኦባይ ቤቴዳ ድራዉ፥ እዮርባማ ጎልያ አሳፐ አ ጻላላይ ዱፉዋን ሞገታና።14“ሄዋፐ ጉይያን እዮርባማ ጎልያ አሳ ቆል ይስያ ካትያ መና ጎዳይ ባረዉ እስራኤልያ ቦላ ደንና።15ሃ ግዶን ዎሹ ቃጽያዋዳን፥ መና ጎዳይ ሄ ዎደ እስራኤላቱዋ ሾጪደ ቃና። አሼሮ ግያ ጾሳትዉ ኡንቱንቱ ምስልያ ኤሲደ፥ መና ጎዳ ሀንቀዳ ድራዉ፥ ኡንቱንታ አዋቶ እ እሜዳ ሎኦ ቢታፐ ኡንቱንታ ድጋና፤ ያቲደ ኡንቱንታ ኤፍራጺሳ ሻፋፐ ሄፍንን ላላና።16እዮርባም ኦዳ ናጋራ ድራዉነ እስራኤልያ አሳ እ ኦስሴዳ ናጋራ ድራዉ፥ ጾሳይ እስራኤልያ አግ ባሻና” ያጌዳ።17ሄዋፐ ጉይያን እዮርባማ ማቻታ ደንዳደ ባደ ትርጻ ጋካዱ። ጎልያ ፐንገ ጎጭላ የና ናአይ ሀይቂ አጌዳ።18ባረ ቆማ ትምቢትያ ኦድያ አክያ ባጋና መና ጎዳይ ኦዴዳዋዳንካ አ ሞጌድኖ፤ እስራኤልያ አሳይ ኡባይ አዉ ዬኬዳ።እዮርባማ ሀይቁዋ
19እዮርባም ሀኔዳ ሀራባይ፥ አ ኦላቱነ አ አይሱዋ ማራቱ እስራኤልያ ካተቱ ታርክያ ማጻፋቱዋን ጻፈት ኡቴዳ።20እዮርባም ላታማነ ላኡ ላይ ካዉቴዳ። ሄዋፐ ጉይያን ሀይቂደ ባረ ማይዛን ጋከቴዳ። አ ኮታን አ ናአይ ናዳበ ካዉቴዳ።ይሁዳ ካትያ ሮብኣማ
21ሶሎሞና ናኣ ሮብኣመ ይሁዳን ካዉቴዳ፤ ሮብኣመ ካተትያ ዎደ ላይይ አዉ ኦይታማነ እታ። መና ጎዳይ ባረ ሱን ዎናዉ እስራኤልያ ዛራቱዋ ካታማቱዋ ኡባ ግዶፐ ዶሬዳ የሩሳላመ ካታማን ሮብኣመ ታማነ ላፑን ላይ ካተቴዳ። አ ዳይ ሱንይ ናእሞ፤ እዛ አሞና ጋደ አሳ።22ይሁዳ አሳቱ መና ጎዳ ስንን ኢታባ ኦድኖ፤ ባረንቱ ኦዳ ናጋራን ኡንቱንቱ ባረንቱ አዎቱዋፐ አደ አ ቃናትሴድኖ።23ሄዋ ቦላካ ቃይ ኡንቱንቱ ባረንቶ ጎይንያ ቃ ሳኣ፥ ኤቃ ሹቻቱዋነ አሼሮ ጌተትያ ጾሳቱዋ ምስለቱዋ ቃ ደረቱዋ ኡባ ቦላነ እርጻ ምቱዋ ኡባ ጋርሳን ኤሴድኖ።24ሀራይ አትና ኡንቱንቱ ጎይንያ ግሹዋን ጎይኑዋ ዎጋ ኦደ አቱማ አሳቱ አቱማ አሳቱዋና ሻርሙጽያዋንቱ ደኢኖ። መና ጎዳይ እስራኤላቱ ስንፐ ከሲደ የደርሴዳ ጋደ አሳቱ ሜዘቴዳ፥ ሄ ሸነይያ ኦሶቱዋ ኡባ እስራኤልያ አሳቱ ኦድኖ።25ሮብኣመ ካተቴዳ እቼሻን ላይን ግብጼ ካቲ ሺሻቅ የሩሳላመ ካታማ ቆሄዳ።26መና ጎዳ ጌሻ ጎልያንነ ካትያ ጎለን ደእያ ሚሻ፥ ሶሎሞነ ቆጽሴዳ ዎርቃ ጎንዳለቱዋና ኡባ ቦንቂ አኪደ ቤዳ።27ያትና፥ ካቲ ሮብኣመ ሄ ጎንዳለቱዋ ድራዉ ናሃስያ ብራታፐ ሀራ ጎንዳለቱዋ መሴዳ፤ ኡንቱንቱ ናጊደ ዎና ማላ ካትያ ጎልያ ፐንግያ ናግያዋንቱ ካፓቶ እሜዳ።28ካቲ መና ጎዳ ጌሻ ጎልያ ብያ ዎደ ኡባን፥ ናግያዋንቱ ጎንዳለቱዋ ኦይቄድኖ። ሄዋፐ ስሚደ ኡንቱንቱ ዛሪደ፥ ናግያዋንቱ ጎለን ዎኖ።29ሮብኣመ ሀኔዳ ሀራባይነ እ ኦዳባይ ኡባይ ይሁዳ ካተቱዋ ታርክያ ማጻፋን ጻፈት ኡቴዳ።30ሮብኣምነ እዮርባም ኡባ ዎደ ኦለቲደ ደኤድኖ።31ሮብኣመ ሀይቂደ ባረ ማይዛን ጋከቴዳ፤ እ ዳዊታ ካታማን ደእያ ባረ አዎቱዋ ዱፉዋን ሞገቴዳ። አ ዳይ ሱንይ ናእሞ፤ እዛ አሞና ጋድያ አሳ። ሮብኣማ ኮታን አ ናአይ አቢ ካተቴዳ።