Zekkaryaasikaa Raaga9
Isira'eelike Naapha'n Murendeexxa Murte
1Duuchchi Woddike Goottiki hiyyichchi higgeenni Sediraake boga'n dirraan;Demasiqo'ninna muraan;Manniinxinna Isira'eelike gosa gosati minixxi ille duuchchi,Duuchchi Woddike Goottiba'a uuddaani.2Ittanni kunn murtetiki hiyyichchi gabalate'ni hexxeexxi Hamaati'ninna,yo'osha beekkuma afeeke Xiroosikenna Sidoonake qachchuwwa'ni geyaani.3Xiroosi ifi'a kollo giissexxe'eeni;birretika sibljonna bukotishsha,worqetanna ori giddixxe dhoqqeshsha tuu'lite'eeni.4Duuchchi Woddiki Gootti kinni karra isexxa isenaa'ni adhdhaani;lumoxxe abbaayya'ni afeexxa hunna isexxa enqaani:iseenna giira ite'na'a bululoke kaddaani.5Asiqeloona tennee uudeexxi sodaattaaniGaazanna rakkatte wixxirri hitaani:Aqarooninna iittanni waye uudaani; addattaachchinna gophemaani.Gaaza moyanjo iseka gophphaani:Asqeloona urmake kaddaan.6Ashidoodi giddo gargari hedheeki ardi karseme ofo'laani;Filisixxeemitotixxa hollanna balleessannoni.7Ani munde afo'o insa'neekenaa'ni,batto'echchonna qeqqeshsha insa'neeki giddii'ni fulchannoni;hafe ganteeki no'oke Magenike arda kandaani:Yihudake'ninna akeekisanjuwwake kandaani:Aqarooninna Iyyaabusitotishsha kaddaani.8Ani kinni mine anka,hunnati saamammake mannanaa'ni heqqedhdhannoni:Anka arda miince'e hirbeessinabaani:ta'a yooni jaba qicinni heqqannon.Tsiyoonike Moyanjixxa Daga
9Tee Tsiyoonixxe belto; yo'oshsha gammadi,Tee Iyyerusaalemixxe belto; ililisi,Kunna'a, qullichchikinna anjirallimoyanji atik, shaqqake kadee harre gulufeexxiharretixxe beltanjo hana ofo'lee,atibaa dagaani.10Ani loliinxa fadhadiinxa gaarruwwa Efireeminaa'ni,loliinka fadhaduwwa Iyyerusaaleminaa'ni fugussannoni;loliinxi gabenna enqendaani;Isi gosa gosake ardi'a nage'a lallabaani;galcha isixxinna lumoxxe abbaayanaa'ni abbaayyati qico'ni,Galaanakenaa'ni bogiinxe gabala qico'ni ba'lattaani.11Ati'a kinni, ati'a aagennexxe mundetixxe kakonaa'ni kexxeexxausuremeemmaka atika manna wodi'i hedhemmabaaxxe balenaa'ni qullo fulchannoni.12Ha'no usurendineexxi halchati hexxina'neeke kollo ha'nooxxibaa higge:ta'atenna kaddoole lame anga asseennexxi ha'no'a hiissannoxxa kulaanneni.13Gabe anxa dobenneshsha Yihudaa dobannon;Isira'eelinna mogidiinsha,Girkeeka manna lolakee'e la'oonfatannon;Tee Tsiyooni, oose atixxa lolakee'e ke'issannoni:koo Girikeke mannaa, atixxe oose'ni ke'naashsha assannoni:loliinke manjike wolaantichchishsha atee assannoni.Duuchchi Woddiki Gootti Ifi Leellisha
14Duuchchi Woddiki Gootti insa'ne'n leellaani;mogidik isikinna banqotishsha xalaqisaani;Duuchchi Woddiki Gootti Mageni malagata ufuufaani;bita'ixxe hobonbalte giddo me'aani.15Lumoki Duuchchi Woddiki Goottinna insa'nee gollaani;insa'nenna naapha ifika shinnaan;kinjinxe looyyanninna injifantaani;Ha'winaani; woyinetixxe bookanni machcho'eeke manjishsha cancinaani:tolchimalchiinke kasuwwa'ni fiffixxatee qophpho'eemmake miyishsha:insa'nenna iittanni wo'mine'een.16Arda ifika horiinke bobba'ishsha assedheexxi,eettene barra Duuchchi Woddiki Gootti insa'neeki Mageni insa'nee anjiraani.Kallachchi hana hedheeke fiixeeke kinjishsha,isike boga'ni warawara hinaani.17Hittatta danchoomeekenna mambe'a hinaake kandaani;midha dargaggeeye,reefixxi woyinetixxi bookanna, oosettanna melaalle nophphitaashsha assitaani.The Word for the World International