Yohaannisixxa Waleella21
Haaroxxa Iimanna Butta
1Ookkoneechchi uduma haaroxxa iimanna haaroxxa butta afenne, iitti siretixxi buttanna siretixxi iima sa'xxe'emman; abbaayyatinna ta'anni edi'a hexxabaan.2Iikki woyyichchi qachchi iitti haaroxxi Iyyerusaalemi ifike aro'i'aa seefateemmaxxe waajubichchoshsha qixxeffateexxi iimi'n Mageniinba'n butti'a dagaa wodda afenne.3Iittanni lumok hafuur eettene mootenaa'n hiyya'n fulaanaa laqenne qici: «Kunnise Mageniink galdum manjink weltiten; isinna insa'nenni welti hedhaan; insa'nenna isike arda kandaan; Mageni umo ifiken insa'nenni welt hedhaan; isinna Gootta insa'neeke kadaan.4Indiddo insa'neexxa duuchchanna insa'nexxe illetenaa'ni fiyaan; edixxi aadda saxxemmaxxee ta'anni edi'a reyo yookaan yaaddo yookaan oodhishsha yookaan seldo insa'ne'ni hexxabaan.»5Eettene moote hana ofo'lemmak, «Kunnise ani yaane duuchcha haarooxxe assannon» hiyye; higgenni anee, «Kunni hiyyichchi xuurameessakenna dhugaatike kademmaxxee borreessi» hiyye.6Isinna anee hiyyee qici: «Muuxende; Alfanna Oomega, edikinna udumik anten; dhebo'weekee hedhotika wode'e hiri belo isi'a uwwannon.7Injifataak duuchchi tenne dhaalaan; Aninna isike Gootta kadannon; isinna anke belto kadaan.8Yaane kinni yaruwwi, amanabaakiir, batto'uwwi, manjo anga sa'aakiir, yabaabuluwwi, gojaameeyye, dhariicha magenuwwa magenoofataakiir, dharchchuwwii duuchchiik boonchi diine hiyyemmake ha'yake kinjo'ninna giiratixxe abaayya giddo hunemate kaddaan. Tinninna langaxxe reyon.»Haaroxxa Iyyerusaalemi
9Iitti muuxamiinxi torbaan baluwwa itti wo'miteexxa eettene torbaane buuduwwa anga abixiteexxe torbaane ergannanaa'n mitti daggeexxi ane'e «Amo ookkone gedhechchiinxxe are kaddeexxa waajubichcho ate'ni leellishannon» hiyye.10Hafuuriki anee mitte lumoxxe qeerraxxe koobaba'a iyyemareexxi, iikki woyyichchi qachchi Iyyerusaalemi iimatenaa'n Mageniinbaa'n butti'a daggaa wodda anee'n leellishe.11Isenna Mageniinke gaachchanninni iffaamman; iseke ifiki wa'inninna hara lumoshsha fixxa kinjo Iyyasiphidishsha daa'witetishsha ca'a hiyyeemmakemman.12Tommenna lame huluwwa affeexxa qeerraxxa lumollamma dalla'uwwa affeemman; eettene huluwwa hana tommenna lame erganna uurrite'naa Isira'eelike gosa gosake minike summuwwinna itti borreessemeemman.13Borote'ni sase huluwwa middake'n sase huluwwa bita'ake'n sase huluwwa, dhidhimake'n sase huluwwa hexxemman.14Ookkonne qachchik dalla'i tommenna lame boosuwwa afe'emman; tenne boosuwwa'ninna tommenna lame ookkone gedhechchixxi ergameeyyeke summa itti borreessemeemman.15Ane'ni haaso'a'n hedhemmak iimik erganji ookkone qachcha, qachchiinxa huluwwanna dala'uwwa mika'emmaxxe worqetixxe zange afeemman.16Ookkone qachchik qeerrininna godobi weliqixxete kadeexxi shoole kasikemman; isinna ookkone qachcha zangeti mike; qeerinni isikinna lame kumanna shoole dhibba kiilo meetire kade; godobi isikinna ejumi isik iitanni kadde.17Iittanni ookkone qachchika dalla'a mike; qeerinni isikinna ookkone iimike erganjike mika'emmake manjinke mikisanjinni dhibbanna shoole tommenna shoole ciqilemman.18Iikki dalla'i ijaaremeemmak Iyyasiphedixxe fiixa kinjinitemman; qachchichikinna daa'witetishsha ca'ateexxe ca'itte worqenni giissemeemman.19Qachchichiinke dalla'ixxi boosuwwa duuchchinge bifake fiixeeke kinjinni danchchossende'emman; taakaxxe booso Iyyasiphid, lamngaxxik senpere, sakkaxxik kelqedon, sholgaxxik meregi,20ondixxik serdonkis jiyaxxik, serfiyoon, torbaxxik kiristilobee, sadeetixxik, biraale, sallanixxik, werawire, tommixxik kirisphirasisi, tommenna mittessoxxik yakinet, tomenna langaxxik ametesixinositemman.21Temmnenna lamiinxi huluwwa tommenna lame lame golalooka fiixa dancha kinjo affeemman; mitti mittinxi hula mitte mitte golalooke dancha fiixa kinjinni giissendeemman; qachchiink lumo ori daa'witetishsha ifa ifi giddii'n sa'isaake ca'itte worqemman.22Duuchchiinxa dande'aak Gootti Mageninna iikki gedhechchi ookkone qachchike Galma kademmaxxee ookkone qachchi giddo Galma afebe'non.23Mageniike gaachchanni isi'a ifisammaxxee, gedhechchikinna isike ifa kademmaxxee iikki qachchi arsho yookaan agenji isi'a ifiso'a hassissabaan.24Arduwwi isike ifa'ni mammaremaan; buttatik moyanjuwwinna ifi ifika ulfinna isi'a iyyedangaan.25Ookkonna hashsha hedha gopheemmaxxee hula isixxi heene barra'ninna cufendabaan.26Ardiink gaachchanninna ulfinni isiba'a dagaan.27Gedhechchiinke hedhotike maxaafa'ni borreessemekeer gadhi darre battite yaane assa'neekinna dhara haaso'aaki duuchchi isibaa e'yabaan.The Word for the World International