Yohaannisixxa Waleella2
Erga Efesooni'n Hexxeexxe Mageniinxe Tuuta'a
1Efesooni hexxeexxe Mageniinxe tuutake iimike erganji'a hitetexxi borreesittato qici: Torbaane urjuwwa ifixxe middixxe anga'n afe'eek, torbaane worqeti xassike uggemalchixxe oddo'n mammarema'neeke hiyya'nee qici:2Huje atixxa, elo'a atixxa, ossa atixxa ege'neennen; fuggaleeyyetanna gaga'mi hittetexxi insa'nee waaldettexxa, ergameeyyete kandebaang no'o ergameeyyeten hiyya'neekaaranna qo'nissetexxi insa'ne dhariyyete kandeexxa affeettexxa ege'neennen.3Iittanni ti'ni hite'e ossitettexxanna anke summixxee rakko adhdhitteettexxa ege'neennen; tennee duuchcha'n ko'witebexxon.4Kaddomalee atee'e ci'maannexxe yaane hexxeen; tinninna edixxa atixxa jaalala waaldeeten.5Yoona habaa'n ibbettexxa hedi; aaddetanna aaggettexxi edo assitataxxa yaane assi; aadde aaggo gophphotole atika xassiinka uggemalcho isxxe bakkanaa'n adhdhannon.6Yaane kinni ati affe'eettexxi eloxxi yaane, tinninna ani gibannoxxa Niqolaatotixxa huje atinna gibbe'eeten.7Hafuuri Mageniinxe tuuta'a haaso'aaxxa mansha afe'eek laqowwaal. Injifataak, Mageniinke eloke hiddichchixxe bakka'n hedheeke hedhoti haqichchinaa'n itaashsha assannon.Seemirnesixxe Hexxeexxe Mageniinxe Tuuta'a
8«Semirneesi hexxeexxe Mageniinxe tuutake iimike erganji'a hite borreesittatto qici:Edikinna muuxamiink, reyeexxi hedhaake kadeek9rakko atixxanna hiyyumma atixxa ege'neennen; kaddoo malee'e ati dureessaken; Ayihudake kadebaang ani Ayihudake hiyya'n atee summa balleessa'neekaara ege'neennen. Insa'ne kinni duuriisiinke maabaran.10Ate'n gelto'a hexxeexxa rakko mee sodaati; kunse duurriisi ha'noo hega uudo'a ha'noo giddii'n mitte mitte usurriinke mine'n darbaan; tomme barranna rakko adhdhitinaan; reyoti qioco'ninna xuurameesake kadi; hedhotika kallachcha ati'a uwwannon.11Hafuuri Mageniinxe tuuta'a haaso'aaxxa mansha afe'eek laqowwaal; Injifataak langaxxe reyonni harnga miidhemaba'a.
Pherigamoon Hexxeexxe Mageniinxe Tuuta'a
12«Phergamooni hexxeexxe Mageniinxe tuutake iimike erganji'a hittettexxi borreessittatto qici:Lamiin darree'n qara afe'eeka wolaantichcha afe'eek hiyya'nee qici:13Ati duurriisiinxi moote hexxeeba hexxaattexxa ege'neennen; kaddo malee'e anka summa duutee abixxiteetten; duurriisi hedha'neeke ha'nooke qachcha'n ookkone shiyeemeeka ank xuurameessi dhugaa kula, Antiphaasi hedhemmake barro'n midde ane'n afe'eettaxxa amana midde waakkattebexxon.14Kaddo malee'e ate ci'maannexxa heenoxxa yaane afe'eennen; Isira'eelito dharichchi magenuwwi'a tolchendeexxa ita itto'aanna itteexxi yabaabuldo'a insa'ne edo gugguffachcho ugguro'a Baalaaqi barachchiisemmaxxa eettenee Bele'aamixxa Barachcho hordofaak mitti mitti manni atinni hedheen.15Iittanni Niqolaatotixxa barachcho hordofaak manni atinni welti hedheen.16Tennexxee aadde aagi; kada gophphoole ate'n rakkee dagannon; anke afo'iike wolaantichchinni ha'noo otannon.17Hafuuri Mageniinxe tuuta'a hiyyaaxxa mansha afe'eek laqowwaal; injifataakee ookkone sho'omeeke menninaa'n isi'a uwwannon; iittanni isoo adhdhaake manjo kadoole malee'e ayyinna isoo ege'nabaaka haarok summi itti borreessemeeka golalooka kinjo isi'a uwwannon.
Erga, Tiyaxiroon Hexxeexxe Mageniinxe Tuuta'a
18«Tiyyaxirooni hexxeexxe Mageniinxe tuutake iimike erganji'a hittettexxi borreesittatto qici:Giirati bubenjishsha hexxeexxa illeeranna giirati kashilo'n finiineeka sageettoti sibljo fakkattaaxxa lekkaara afe'eek Mageniink Beti hiyya'nee qici:19Huje atixxa, jaalala atixxa, amana atixxa, atixxa ergatenshanna ossa atixxa ege'neennen; iittanni edixxe atixxe huje caala ta'ixxi saxxaaxxa ege'neennen.20Kaddo malee'e atee ci'maannexxe yaane afe'eennen; ani wabeekake hita'neexxa manjichcho Elzabeelii'i ga'mami hitee walde'eeten; ise ank erganjuwwi yabaabulo'aanna dharichcha magenuwwi'a tolchendeexxa ita ito'a barachcho ifixxenni insa'nee dedhisa'neen.21Ifixxe yabaabulanaa'ninna aadde aaggo'a ise'a yanna uwwennan; ise kinni gara gibbe.22Tennexxee rakkotixxe taqe hana isee hunannon; ise'n yabaabulaakaara iseke ornaa'n aadde aaga gonphoole rakko jabaxxa insa'ne'en iyyedagannon.23Isexxa oosenna reyoti ganannon; ookkoneechchi uduma duuchchiinxi Mageniinxi tuutaari ani qalbetanna yaada qo'nisannoke kadennexxa qalbeefantaan; ha'noo mitte mittengee ha'nooxxe huje hujeshshanni hira ha'no'aa uwwannon.24Barachcho isexxa hordofinemmabaakeenna duuriisinxe dhi'mo buqo yaane hiyyendaaxxa isexxa barrachchiisa adhdhitinemabaak Tiyyaxirooni gatinemmaake ha'no'a kinni hiyyaannexxi tenneten: Ha'no'n lebennexxi wele ba'o fe'abe'non.25Ani daganno qici'a affine'eexxa yaane duutine abbixxe.26Injifateekenna huje anxa muuxami qica'a muuxakeenna Ayihudake kadebaake manni hana baallooma isi'a uwwannon; isinna27‹Insa'ee sibljinxe siqichchonni moyaan;faariinke miyishshanna insa'nee bulleessaan;›Tinninna ani Anna ankenaa'nbaallooma adhdhena qicishshate.28Aninna soodimarinka bakalcha isi'a uwwannon.29Hafuuri Mageniinxa tuuta'a hiyyaaxxa mansha afeeke laqowwaal.
The Word for the World International