Faarotikaa Maxaafa77
Dayyeesatixxa Soodachcho
Faarsaleeyyetike Sooresi'a Edotaami'a, Asaafixxa Faaro.
1Haafura anka gikki asse'e Magenoke'n oodhenne;laqaashshanna hafuura gikki asse oodhenne.2Rakkatenne wodda Mageno soodatenne;hashsha duuchcha anga iimi'a ke'ise Mageno soodatannon;kaddo malee lubbo anxi dayyayyaatebaan.3Mageno hedanno wodda aadenne;hede herreganno wodda hangul hiyyenne.4Ille anxenaa'n diipho hoyyitete;wixxirri hiyyennenni haaso'akanna gophenne.5Saxxeexxa barruwwa hedenne;olmixxa wogguwwanna qaabbatenne.6Faaro anxa edixxa hashsha qaabbatenne;hede herrega'n ifi'aanni ifi hiyye'e qoraana qici,7«Dada Duuchchik Gootti duuchchi woddi'a no'oo waalaa?Ta'anni elqi'a no'aa langaxxa haranga mararabaa?8Jaalala isixxi duuchchi woddi'a baxxeeta?Asso'aa addachchiiseemmak haaso'ita muuxemebang gataata?9Mageni marara dedhe'ee?Mufe godoba ba'lata isoo hoyyitee?»10Aninna, «Dada Duuchchik Duuchchi Woddki Goottixxi hunna jijjirende'eshsha hedatitinni anee miiteen» hiyyenne.11Ee, Duuchchi Woddike Goottaa! Assittetexxa lumolla yannuwwa qaabbataannen;sa'eemmake baro'n hujjeeteka mambe'uwwa kassi hiyyaannen.12Assittettexxa lumolla huje duuchcha herregannon;mambe'iinxa atixxa hujenna lebe lebee'e hedannon13Ee, Magenoo, ori atik duuchchi woyyichchaken;Lumoke no'oke Magenishsha hedheek weli magenuwwi ayyete?14Ati mambe'a yaane assittattoken;ati gosa gosake ardi giddo hunna atixxa leellishsheeten.15Hunna atixxenni lumoxxa arda atikixxa Ya'iqoobixxanna Yooseefixxa horte wodde'eten.16Ee, Magenoo! Heddi wodi'i atee uudeexxi sodaate;dhi'mo abbaayyanna culphisse.17Duumanchuwwi xeenna gansiise;iimi'n dindinso dindinde;banqo gabuwwatisha duuchchiinbaa xalaqqisse.18Atixxe dindiinsook luulji hobonbalte giddo laqeme;atixxe banqok balaqii butta duuchcha'n xasse;butta lele'miteexxi sheke sheke hite.19Ori atik Abbaayya giddo,hodhdhichchi atikinna lumollamma wodi'i giddon;yaane kinni faana atixxi leellita'emmabaan.20Allalsanji gedhebo allalammashshaMuusexxenna Aaroonixxe anga'n arda atika akeekkette.The Word for the World International