Faarotikaa Maxaafa74

Ardiinke Nage'i'aa Soodatendeexxa Soodachcho

1Ee, Magenoo! No'o'o haranga mayee waldete?Atixxe allale hunda hedheeke atike gedhebo'n aare atixxi mayee bubbe?2Oliminaa'n fi'litteteka atixxe gamo kadaashshagarbummatena'ni woddeteka atika arda,itti galde'e hosseetexxa Tsiyoonixxa kooba qaabbati.3Naaphi atike galmi giddo hedheechcho duuchcha balleese'een.4Atik naaphi atike galmi giddo geerare;ookkonna ifika baandira olte.5Insa'nenna gongomi giddo haqqe karatee'e,qoce adhammake manna lanbaan.6Gimotika seessuwwaqocetinna burrisik enqine.7Insa'ne atika mine gunbe;atik summi ye'emaaxxa bakka battoosine.8Insa'nenna «Amme insa'nee baalooma no'ok hunda galchino» hine.Insa'nenna ookkone bogi giddo Mageno magenoofachchitxxa bakka duuchcha gunbe.9Ta'inni edi'a beessis hedhebaan;wabeeko haaso'atinna hexxabaan;tinni yaane hitte qico turtaaxxa no'o giddii'n ege'naak hedhebaan.10Ee, Magenoo! Naaphi ate'n haani qico'n qacifata'n hedha?Summa atika duuchchii wodda tuffata'n hedhaa?11Mayeete anga atixxenni insa'nee balleessa gophphete?Mayeeta atixxa middixxa anga mirqexxete?12Ee, Magenoo! Edi'ninni ati moyanjo anken;buttate'ninna anjirumma atixxa iyyedageeten.13Lumoxxe atixxe hunnanni abbaayya lameba shattete;jawwe fakkataaka abbaayya giddike biniinchika umuwwa cancaqqette.14Ati leewaataani hiyyemaaka naachcha fakkataake biniinchika umuwwa canicaqqete;maala isikanna qiilla gammooje'ni hexxaaxxe daduwwaanna ita assite uutteten.15Muummuwwatanna burquwwa yaa'ashsha assiteten;lumollammi galaanuwwi kinni bagaashsha assitteten.16Hashsha atixxe barranna atixxe;arishshotanna agenjo bakka ifi ifixxe'ninni uggiteten.17Ati buttatee gabala murtette; harsokanna bono daddeten.18Ee, Duuchchi Woddike Goottaa! Atik naaphi ate'ni gacifata'nee qico uuddate;gowwi ardi summa atika tuffateexxa qaabbati.19Gargaarsa afebaake atike mannixxa lubbo naaphake'n sa'isite uuttoxxe'e;atika rakkichcha arda duuchchi woddi'a deettoxxe'e!20No'aa aagetexxa kako hedi;buttate'n dukkana hexxeeba duuchcha xaqaro wo'mite'een.21Miicemeeki ardi salphate higaashsha assittoxxe'e;hiyyeeyyenna rakkiyye summa atika saadowwaal.22Ee, Magenoo! Ke'i! Atixxe yaane'a morom;gowwi manni barra duuchcha ate'ni gacifata'neexxa qaabbat.23Atike diinka geerarsaduuchchi woddixxa atike naaphixxa dhaadachcho deettoxxe'e.

The Word for the World International

https://app.library.bible/content/2b894378475c6aea