Faarotikaa Maxaafa22
Yaaddotixxa Oodhishshanna Galatiinxa Faaro
Faarsaleeyyetik Sooressi'a, «Boro haachchaabba wodda gadansiinke» hiyyemeeke meelinni Faarsendeexxa Daawwitixxa Faaro.
1Anke Magenoo! Anke Magenoo! Mayee ane'e waaldette?Anee anjirtabexxoshsha mayee anenaa'n bayyattette?Mayeete fooxxi hiyya anxa midde laqqabexxo qico'ni bayyatteettek?2Anke Magenoo barra ate'ni oodhennen, ati kinni laqqeebexxon;hashshanna atee ye'edhennen sammi hiyyenne woddinna hedhebaan.3Kaddo malee ati woyyichcha Magenon.Isira'eelike ardik galati atixxa moote buqaan.4Edik no'ok annuwwi atee addateen;atee addateemmaxxeenna atinna insanee fulchitteten.5Gargaarsake ate'ni oo'nee wodda dhaqqabbeten;insa'ne ate'ni addantee woddanna shonkeemmabaan.6Ani kinni corroqati jala hedhenneke manjon;manji ane'ni geeba'neen; ardake'ninna tuffateme'eenneken.7Uudeeki duuchchi ane'n qacifateen;alba ifikanna ane'ni guduunfeexxi umo ifika le'misa'n anee hiyyaa qici:8«Duuchchi Woddike Gootta'ni addate'een isi isoo gatisowwaalta.Isoo eeyyammaxxee isi isoo fulchowwaalta!» hinaan.9Atendeemman ani nage'ik ilemannoshsha assite'eetak;unu'naannaxxa yannanna anee heqqiteetaak atenden.10Ama anxike godoba'ninna anee heqqiteteki ateten;anxe ilenshaxxe barranaa'n ati, anke Magenon.11Rakko ane'ni daggo'a shiqqeemmaxxeenna anee gargaaraak hedha gopheemmaxxeeani birii'ni bayyattoxxe'e.12Heddi naaphi ittaaxxe korommeshsha anee buqeen;hunnaammette Baasake bogixxe korommoolshannaanke qarqara'n hedheen.13Bulte adhdhamakenna itanammake neenqishshaanki naaphi afo'ao ane'n haanni asse.14Hunna gophee'e duneme wode'eeke kadeennen;micci anki duuchchi mikita mikitanaa'n lo'o hiyye;godobi ankinna gagatishsha baqqe.15Qonqo anxi balchiinsha bagge;arabi ankinna laagadake'n dhaphphi hiyyereyeke manjishsha bukote'ni anee ibisseten.16Fuggaaleeyye wonshiinke haagansha anee buqqe;anga lekka anxa onte xalli assine.17Ani huqatee'naa miqe anxi leelte;naaphi ankinna anee dhaphphi hiyye'e hubate uuda'n cee'me.18Seemma anxa qoqoodemme;ooddoono anxe'inna hixa iblisine.19Duuchchi Woddike Goottaa ati kinni anenaa'n bayyattoxxe'e;Anke gargaarsanjoo! Anee gargaartotta'a rakke dagi.20Lubbo anxa naaphiinke wolaantichchanaa'n,hedho anxa konne worshuwwinaa'n gatis.21Neenqiinke afo'onaa'n anee gargaar;gafarsiinke gaafanaa'ninna anee gatisi.22Summa atika anke arda'n kulannon;insa'ne bukki hineexxe bakka'n atee galateeffatannon.23Ha'noo Duuchchi Woddika Gootta sodaatinaak manni isoo galateeffatte;ha'no Ya'iqoobixxi sanne duuchcha isoo ulfeesse! Ha'noo Isira'eelixxi sanne duuchchaIsoo saadde.24Isi miicemeeka manjo tuffatebaan;dudduronna iso'n wirri hiyyabaan;yaane kinni gargaarsakee raareexxa raare laqe.25Hujjettexxe eloxxe huje'a ardi bukki hiyyeexxe bakka'n atee galateeffatannon;atee sodataake manni edo wereegenneka wereega uuwwannon.26Hiyyeeyye ittee godditaan;Duuchchi Woddika Gootta harsaak manninna isoo galateeffataan;hexxineeke baro duuchcha'ni godobi ha'nook gammada'n hedhowwaal.27Buttatixxe gabala qico'n hedheek manni duuchch Duuchchi Woddika Gootta qaabbate'e isibaa'a higaan;buttate'n hedheek gosa gosak ardi duuchchi isoo magenoofataan.28Duuchchi Woddik Gootti butta duuchcha'n moyanjoke kadeemmaxxeegosa gosak ardi duuchchinna isi hunda galaan.29Dureeyye duuchcha isi'a heeshshi hite'e magenooffaattaan;reyee'naa'a buttin itaak manji duuchchi dageexxi ati edo guluffataan.30Daggaxxi ila isi'a ergataan;Duuchchi Woddike Goottixxa yaanenna udumixxe ila'ni haassottaan.31Insa'ne qullummatixxa isixxa huje lassina'n,isi hujeexxa qullumma ilemaake arda'n haassonnaan.
The Word for the World International