Faarotikaa Maxaafa144

Injiffachchotixxa Faaro

Daawwitixxa Faaro

1Anga anxa bagedokee,qubba anxanna lolakee leenjiseekrassa anxi Duuchchi Woddik Gootti saademowaal.2Isi eeyyallo anke Magenonnajabake gollan,anee anjiraake anke gollaan;iso'ni gollatannoxxe anxe wonte,ardikinna ani'a hiremaashsha assaak isoten.
3Ee Duuchchi Woddike Goottaa, isi'a xexxe'attotta'a isi manjiingi maachchoo?Isi'a heddotta'a isinni manjiink belti maachcho?4Manji hafuuriinshaten,bari iskinna saxxammaxxe gaadiddoshshaten.5Ee Duuchchi Woddike Goottaa,iima benqe assite'e butti'a dirri;wiliildo'a koobuwwatanna tuqi.6Banqotanna balaqqisse'e naapha xeer,mogidduwwa atika darbate'e insa'nee bogii'n fulchi.7Iim'ni anga Atixxa butti'a diriirsi;jabake wode'enaa'nialaguwwiinxe anganaa'ninna anee fulchite'e anjir.8Afo'o insa'neekenni dhara calla haassonnaan,middixxa anga insa'nexxa iimi'a ke'issine'e kakantaak dharkiten.
9Ee Mageno, haaroxxa faaro ati'a faarsannon;tomme jimmaateke baganninni ati'a faaro faarsannon.10Ati moyanijuwwaakee injiffachcho uuttatton;erganjo atika Daawwitii'i shiyaake wolaantichchanaa'ni gattissatton.11Afo'i insa'nek dhara haaso'aake,middixxa anga iimi'a ke'isseexxi dhark kakataakealagi mannixxe anganaa'ni anee anjir.12Labbaxxi no'oxxi oose dargageessummate'nielo qico kadee nophphammake hiddichchishsha kaddowwaal;meyyaxxi no'oxxi oosenna mootummatika mine dancheessatee'ebocemeemmake kasi kasiinke utuphuwwishsha kaddowwaal.13Doonuwwa no'oxxe'n gargar gargar hexxeexxi midha wo'mitowwaal;gedhebi no'ok kumuwwik,tomme kumuwwinni no'oke diida'n horowwaal.14Hori no'oki alfowwaal;rimo'a ibisoqe'e, hore bira sa'owwaal;no'onna booji'eemmonnoqqe'e;oruwwa no'oke'ninna yaadotixxi oodhishsha laqendoqqe'e.
15Tinni eebba insa'nexxe kadde'eeke ardixxa wodo;Duuchchi woddik Gootti insa'neke Mageno kade'eeke ardixxa wodo.

The Word for the World International

https://app.library.bible/content/2b894378475c6aea