Mammaassiinkaa Maxaafa7

Yabaabulto Manjonaa'n Bayyata Hasissaaxxa

1Anke beltoo! Hiyyichcho anka heqqedh;ajajuwwa ankanna ifi giddo galchedhi.2Ajajuwwa anka heqqedhi, hedhoti hexxatton;ate'e barachchiisannexxa barachchonna atixxe illeke gummichchishshanna heqqedhi.3Tennera anga atixxe'n usudhdhi;atike godobi giddonna borreessedhi.4Muxxumma dayyo atixxishsha,qalbeeffachchotanna atike shiqike firishsha uudi;5Tinni yaanuwwa atee'e yabaabulto manjichchonaa'ninnadedhissaake annafeexxe areke haaso'anaa'n gattissaan.6Barratixxa barra anke minixxe maskooteke golonaa'n,gadhi'a uudenne.7Qalbeeffachchotixxa xe'ya afeeka oosichcha belto,yaadik oosomateeke manni giddo affenne,dargaggeeyye giddi'ninna gargar hiisse'e iso'o hubatenne.8Isi mine isek darre'nmine isek qarqara hexxeexxe weldeennaka ora sa'nemman.9Galgala, bogi siphphi siphphi hiyya'n me'amma wodda,hashshenna himmi hiyyo'atemman.
10Ookkoneechchi uduma manjichcho mitte iso'o affo'a gadhi'a fulde,ifi gurgudhitammaxxe manjoxxa oddoono oddo'witeexxi manjo dedhisatika yaada ifi giddo abixiteemman.11Isee illimooltenna shookkoke hiyyendaaxxa yaane egendebaaxxe,lekka isexxi mine ofoldabaaxxe;12Mittele ora mittele dikko giddonna,weldeenna weldeenna'n uurta'n gaada.13Ookkonee dargaggeessanna hanqalfite sunqexxe,illimoollummatinna iso'o hittee qici:
14«Ani mittummatika tolcha telcho tolchennexxi,werreega anka muuxe'eenne.15Tennexxee atee afonnaa fulenne;jaba qicinni atee'e hase'eennan; ta'a atee'e kunse alfeennen.16Gibtsee'ni daggeexxa,dancha seemma taqe anxi hana fayeennen.17Taqe anxe'n,karbe almuuninna qarafa hiyyendaaxxe haqqexxa shitto fiffixeenen.18Amo, soodaa qico'ni jaalala goddino;welinna hanqalfine gammandoo!19Aro'i ank mine hedhebaan;bayyi ora me'eni.20Jiraka maallaqa adhdhe me'emmaxxee,illeema higabaan» hite.
21Xe'maake ifike hiyyichchinni iso'o dedhisse;shaqqake ifike haaso'inni iso'o sobbe.22Duliimbaa ooffemammake kormishsha;rake fonxoro giddo e'yammake gafarsishsha,Qoxxinni mitte belo isinna ise'e hordofe me'e.23Gabe tidho isixxa ottaa qico'n,isoo hedho gophissaaxxa ege'nebaang,Phirri hite'e fonxoro giddo e'yitammaxxe cii'chchoshsha kade.
24Anxe oose! Hiyyaannexxa laqqe;dho'o hitine caqasse.25Yaada ha'nooka ora isekibaa wirri assitinoqqe'e,yookaan iseke dedhiinke ora'n e'yitinoqqe'e.26Salphisse'e hundeekir heddoken;birteekirinna laakkosi iimi darre hedheeken.27Iseki mini reyotiba'a,hirreessi giddonna iyyemaraake oran.

The Word for the World International

https://app.library.bible/content/2b894378475c6aea