Nehimiyakaa Maxaafa8
1Ardi duuchchi Wodiinxe Hula edigama hedheeke ba'linna'ni mitte manjishsha bukki hine; ookkoneechchi uduma Duuchchi Woddiki Gootti Isira'eeli'a ajajemmaka Muuseke seerika maxaafa borreessanji Izira iyyedago'a kulle.2Tennexxe qeesichchi Izira torbake agenjixxe takkaaxxe barra'n laballi, melaallena wele galchedha dande'aaki duuchchi hedheeba ard edo seeriinka maxaafa iyyedaage.3Isinna «Wodiinxe hula» edidarre hedheeke ba'linniba alba wirri hiyyexxi; labballo, melaallenna wele galchedha dande'aake manni duuchchi edo urreexxi gorsii'n saafo'i qico'n haafura gikki asseexxi haaseesse; ard duuchchi seeriinka maxaafa sammi hiyyeexxi caqase.4Borreessanji Izira tenne'ni qephphi assende ijaarendeexxe medireke hana uurreemani; isi biranna middi darre'n Metitiyya, Shema'i, Anaya. Uuriya, Kelqiyaasi, Me'iseeya, bita'i darre'n kinn Fedaaya, Misa'eeli, Melikiya, Hashuumi, Hashibaadanahi, Zekkariyasinna Mesulaami uurrineemmani.5Iziranna maxaafa bane; qephphichcha booncho'n uurreemmaxxee duuchchiingi isoo uda'nemmani; maxaafa banee woddanna ard duuchchi ke'e uurre.6Iziranna Duuchchi Woddika Gootta Lumoka Mageno galateeffatte; ardi duuchchinna anga iimi'a ke'isseexxi «Hami'n! Hami'n!» hiyyaamman; ookkoneechchi uduma albki buttinake'n gonbisemeexxi Duuchchi Woddika Gootta sagande.7Konneechchinni butti'a hexxeexxi Leewwito Iyyaasu, Baani, Seeraabiya, Yaamini, Aquubi, Sabatayi, Hoodiya, Me'iseeya, Qolxaasi, Azariyaasi, Yozabaati, Hanani, Feeliya ardi ookkoo uurreshshanni hedhee'na'a seera insa'ne'a barrise.8Insa'nenna haasoossinemmaka Mageniinka seeriinka maxaafa ardi ege'na dande'ashsha haaseseechchi uduma insa'ne'a mitte mittenda ardake tinka'ni barrinseemman.9Ookkoneechchi uduma arda galchaammaki Nehimiya, borreesanji qeesichchi Izira, ardakanna barsiisaammakki Leewwito insa'ne, «Tinni barra Duuchchi Woddike Gootta Mageno ha'nooke woyyitte barra'n kaddeemmaxxee yaaddinoqqe, ooxxinoqe'e» hine. Ard duuchchi seeriinka hiyyichcho lanqaamma wodda oo'na'nemmani.10Nehimiyanna insa'ne, «Me'itine eloxxa ita ittine, xe'mitaaxxa ha'wa ha'witine gammadde; mittelchchonna qophpheessedhebaake manni'a afineengenaa'n insa'ne'a qooddine erge, Tinni barra Gootta no'oke woyyitte barra'ni; Duuchchi Woddike Goottixxi gammashsho jabeenna ha'nookee kaddeemmaxxee yaaddinoqqe'e» hiyye.11Leewwito, «Tinni barra woyyitte barra kaddeemmaxxe sammi hiyye; yaaddinoqqe» hiyyoti arda sammi assite.12Tennexxe ard duuchchi'a hiyyemeeki hiyyichchi ageemmaxxee, jila jille gammanda'n indo'a, ha'wino'a, ita ifixxenaa'n qoonde ergno'anna me'ine.13Agenjiinxe langaxxe barra'n shiqi shiqike firik akeekisanjuwwi, seeri hiyya'neexxa baranto'a qeesetinna Leewwitto welti borreessanjo Izira qarqara bukki hine.14Isira'eeli torbake agenjo'n ulfeessinaaka ayyaana fooqi giddo ofolle ulfeessinaashsha Duuchchi Woddiki Gootti Muuse gamii'ni uuweeka ajaja seeri giddo borreesseme'na anfe.15Tennexxe ifi ifike qachcha qachcha'ninna Iyyerusaalemi konnee hiyyichcho lallabaashshanna lassinaashsha hiyyee qici, «Tullichchuwwinba'a marre; zayitetikanna gamoojjeke ejersanaa'ni, Baarsineeti hanaaxxe, meexxetena'ninna shafi callixxe haqqexxa damoole iyyedange; ha'noonna borreessendeexxe aaddanni fooquwwa ijaarre» hiyye ajaje.16Tennexxe ard fuleexxi damuwwa iyyedage, mitti mittingi mine mine ifingixxe heelichchoxxe xelleephphon, ifi ifinxe baxxe'n, Mageniinke minike ba'linna'n, «Wodi'inxe hulake» ba'lina'ninna Efireemixxe hulake ba'linna'n fooqo ijaare.17Booji'otenaa'n higeemmaki ard duuchchi fooqo ijaareexxi giddo ofo'le. Neweke beltike Iyyaasuke baronaa'n ettene yanna qico'n Isira'eeli iitta assite ayyaana ulfeessite egendebaani; lumo qiconna gammandeen.18Siretixxe barranaa'n muuxamini qico'n, Izira barra barra'ninni Mageniinke seerika maxaafa haaseessa'nemmani. Insa'nenna ayyaana torbaane barra ulfeessine; saddeetixxe barra'ninna seeriinshshani muuxamiinxa bukki'i assine.
The Word for the World International