Nehimiyakaa Maxaafa2
Arxekisiisi Nehimiya Iyyerusaalemi'a Me'o'yaa Eeti Uwwe
1Moyanji Arixxeekisiissi moyeexxe lame tomme wogga'n Niisaani hinaake agenjo'n woyinetixxi booka qophpheeseme wodda, woyyinnetixxa booka aadhe moyanjokee uuwenneni. Edi wodda alba anika himmi asse ege'nebo'noni.2Tennexxe moyanji, «Elagophpheboxxongi maye'e albi atiki gola'le? Tinni godobi giddo affeettexxe yaado male'e welechchobaani» anee hiyye.Aninna yo'oshsha sodaateennani,3Aninna moyanjo, «Moyanjo duuchchi wodda moyi; annuwwa anika mongeeki qachchi diigemaa wodda, cufanuwwa giirati gunbaa wodda tennee uuda'ni hitta huqata gophanno?» isi'a hiyyenneni.4Moyanjiikinna «Ati maachcho hassaatteta?» hiyye.
Ookkoneechchi uduma aninna iimike Mageniinbaa soodatenneni;5Aninna moyanjoke, «Ati moyanjo eetaattexxee kaddoolenna erganji atiki ani ati edo eyyemennexxe kaddoole, haaroba qammalche ijaaronnaa annuwwa anika moongemmake Yihudiinke qachchibaa me'onnaa eeti ani'a uwwi» hiyyenneni.6Ookkone wodda, moyanji isi bira ofoldeexxe motitte ifixxini welti hedheexxi, «Ori me'e barra me'isaake? Haano higge daggatto?» hiyye anee qore. Moyanjikinna me'annoxxa eeyye; aninna haano higannoxxa iso'ni kulenneni.7Aninna isi'a hiyyennee qici, «Moyanjo eetaattole, Yihudiinka boga geyanno qico'ni nage'iki ane'e sa'issinaasha Efiraaxisi wido boga galcha'neeke galchanjuwwi'a borreessa borreesite ani'a uwwi.8Ittanni moyanjiinka gongoma heqqaammake Asaafi'a, galmini bira hedheeke kinjiinke dalla'ixxe huluwwaa, qachchiinke dalla'uwwi'aana aninna hedhannoke mini'a ijaarsake'e kaddaaxxa haqqe, ani'a uwwendaashsha borro ani'a borreessi» Elooxxi anike Magenixxi anga aninni hexxemmaxxe moyanji ani'a eeti uwwe.9Tennexxee Efiraaxisi wido hedheeke boga galchaammakiriba'a mare'e moyanjiinxa borruwwa uwwenneni; moyanjikinna loliinke mannika akekisanjuwwanna fadhado gulufaammaki manninna aninni welti me'aashsha asse.10Horoonki Senbalaaxinna Amoonik erganji Xoobiya tennee lanqeexxa yanna Isira'eelike nage'i'a hedaaki manji dageexxee yo'oshsha aarre.
Nehimiya Iyyerusaalemika Dalla'uwwa mammareme Uude
11Aninna Iyyerusaalemi'a me'enneni; ookkonna sase barra turenelchi uduma,12aninna heenoke manninni welti hashsha fulenneni. Iyyerusaalemi'a assannoxxa Mageni qalbe anxi giddo uggeexxa yaane ayye'ninna kulebo'noni; gulufennexxa gaange malee'e weliichchi hedhemmabaani.13Ani hashsha fulennexxi dhooqatixxe hula darre'n dhudhdhuufiinxe wodi'inxe balebaa'ni kora hunnamaxxe hulaba'a marenneni; diigemeeka Iyyerusaalemika dalla'uwwanna giira itte birteeka cufanuwwa uudenneni.14Ookko'ninna wodi'inxe muummeexxee hulabaanna moyanjiinke baleessibaa marenneni; kaddo malee gulufennexxi gaange saxxaaki boonchi hedhemmabani.15Tennexxe dalla'a uuda'n hashsha dhooqa sa'ennexxi alalle qabatenneni; udumi'anna wirri hiyye higennexxi Dhooqatixxe Hula darree'n e'yenneni.16Yihudake, yookaani qeesetee, yookaani Ja'labuwwakee yookaani Jaliqabuwwakee huje hujaammakee mannaa mittilchi haaso'ennechchi hedha gophpheemmaxxee'e; haba me'ennexxa yookaani maa asseennexxa Jalqabuwwi ege'nebaani.17Aninna insa'ne'a, «Anfennexxa rakko kunn uddina'neeni; Iyyerusaalemi diigendeeni; cufanuwwakanna giira itte birteeni; ta'a amme Iyyerussaalemika dalla'a haaroba ijaarro; yooni oso'lemmabo'noshsha» insa'ne'a hiyyenneni.18Ittanni eloke anike Magenixxi anga aninni hexxeexxanna moyanjikinna ani'a hiyyeexxa insa'ne'a kulenneni.Insa'nenna «Amme haaroba qammalchine ijaarro» hineechchi uduma tenne eloxxa huje hujete'n ke'ne.19Yaane kinn Horoonaki Sanbalaaxi, Amoonitotik erganji Xoobiyanna Arabiki Gesheemi tenne lanqeexxi no'o cee'mina'ni tuffante; iittaanni, «Kunn hujjina'neechchi maachcho? Moyanjoke'n fuggoxxini kexxino'a hassina'ne?» hine.20Aninna insa'ne'a, «Iimiki Mageni no'o'a muxxaani; no'o isiki erganjuwwi hujete'e ke'naanneni; ha'no kinn Iyyerusaalemi'n qoobbi yookaani no'o'a hasisaani hitinaachchi yookaani kassi assaaka raaga affinebaani» hiyye insa'ne'a hiissenneni.
The Word for the World International