Luqqaasixxaa Wengeele15
Ba'eemmake Gedhechchika Mammaassa
1Mitte barra qaraxa bukki assammakiirinna cubbaaleeyye duuchcha hiyyaaxxa laqatee Yessuusike qarqara'n qoqqobe.2Feerisitonna Muuseke seerik barachchiisalluwwi, «Kunni manjichchi cubbaaleyyeti hosaan; insa'nenni weltinna itaan» hiyya'n Yessuusii aallate.3Yessuusinna hiyya'n insa'neexxee mammaakee qici4«Ha'noo giddii'ni mitti dhibba gedhebo afee'naa konne giddii'n mitti ba'oole sallane tommenna sallane badda'ate'n waaleexxi ookkone ba'eeka afatee hasto me'abaak ayyete?5Afee woddanna gammade'e dugummote'n dulkeexxi6ifike minibaanna illee iima higaan; jaaluwwa ifikanna olla'uwwa ifika mitteba ye'eexxi insa'ne, ‹Ba'eemmaka anka gedhechcho alfeennaxxee aninni welti gammadde!› hiyyaan.7Ha'noo'ni kulo, iittanni aadde aaga hasissabaake sallane tommenna sallane qulliyye irra aadde aagaake mitte cubbichchixxe'ee iimate'n gammashsho kaddaan.Baxxeemmaxxe Saanteka Mammaassa
8«Tomme birre saantime affeexxe manjichchonaa'n tommetenaa'n mitte baxxeexxe kaddoole affa qici'a ifa issexxe'e mini filteexxi jaba qicinni hassabaaxxi manjichcho ise ayyete?9Isee affaa woddanna jaaluwwa ifikanna olla'uwwa ifika mitteba yexxeexxi insa'ne, ‹Anenaa'n baxxeemmaxxa saante alfe'ennaxxe aninni welti gammadde!› hitaani.10Ha'noo'ni kulo, iittanni aadde aagaake mitte cubbaaleessixxe'ee Mageniinxe erganna edo gammashshote kaddaani.»Ba'e Afemeeke Beltixxee Mammaassa
11Lebeexxi Yessuusi insa'ne'n hiyyee qici; «Mitti manjichchi lame labbaxxe oose afeemmani.12Lami giddii'n maa'n belti anna, ‹Anke annaa atixxe karranaa'ni ani'a geyaaka qoobbo uwwi› hiyye. Annikinna karra ifixxa lamiinxe ifixxe oose'aa qoode.13«Heddo barranna turebaang iikki maa'n beltichchi isoo'o geyemmaka qoobbo duuchcha bukki assedheexxi bayyi bogiba'a me'e; ookkoonna fooggaleexxi maallaqa ifika bire.14Isinna afemaachcho duuchcha bireechchi uduma ookkone bogi giddo duuchcha jabak solo'i kade; isinna rakkatate'n ke'e.15Tennexxee ookkone bogike mitte manjichchi hunda aage; manjichchikinna booyye isi'a allalaashsha ifike fichchi giddi'aa isoo erge.16Isinna booyye ittaammaxxe midhaka huura ito'aa alche'nemman; yaane kinni isoonni midde isi'a uwwa'emmak hedhemmabaan.17«Qalbeeffachchote'n higeexxa yanna kinni hiyyee qici, ‹Me'i anke annik hujalluwwi ite gopheexxi galchedha'ne; anee kinni kaba solo'i shiyo'ate.18Ke'e anke anniba marennexxi; Annayyo Mageni edonna ati edo balleessenneni.19Ta'anni elqa'a atike belto hiyyeme ye'ema ani'a hasissaba'a; yaane kinni ati'a hujammake mitte erganjishsha ane'e uudi iso'o hiyyannon› hiyye.20Tennexxe ke'eexxi ifike anniba'a me'e.«Yaane kinni bayyann hedhee'naa anni isik iso'o afeexxi isi'a marare; isiba'anna gonga'n mareexxi isoo hanqalfe sunqedhe.21«Beltikinna isoo, ‹Annayyoo Mageni edonna ati edo balleesseenneni; ta'anni edi'a atike belto hiyyeme ye'ema ani'a hasissaba'a› hiyye.22«Anni isik kinni ifike erganjuwwa'n hiyyee qici, ‹Rakkineexxi duuchchiinxenaa'ni caaldaaxxa seemma iyyedagine'e iso'n oddeesse; qubichcho isike'n qube, lekka isixxe'ninna kophe uggurre!23Ha'yo jibbichchanna iyyedaggine isi'a dulle; inda'ni gammando!24Kunn ank belti reyeemmani; ta'a kinni hedhoke kade'eeni; ba'edhemman, afeme'eni!› ookkonneechchi udumanna gammadate'n ke'ne.25«Eettene yanna isik angafi belti fichcha hedhdhemmani. Ookkoo'n illee iima higa'n mini'a shiqee wodda massinqotikanna sirbiinka hafuura laqe.26Isinna erganjuwwi giddii'n mitte ye'eexxi tinni yaane maachcho? Hiyyeexxi qore.27Ergajikinna iso'ni: ‹Dayyo atike dageedheen; nage'ikinna fayya hedheexxi dagemmaxxee anni atik ha'yo jibichcha isi'a duledheen› hiyye.28«Angafi belti mufateexxi mini'anna e'ya gibe; anni isikinna mini'a e'yaashsha isoo kadhate.29Isi kinni annake'n hiisse hiyye haaso'eeqic, ‹Kunise, konne baro duuchcha garbiinsha ati'a ergateme'ennen; ajaja atikenaa'n mittekanna midde xe'ishebo'no; ati kinni jaaluwwa ankenni gammadannoshsha mitte re'etika beltanjo midde ani'aa uute egendebexxo.30Yaane kinni atik belti karra atixxa yabaabulto melaalle'n bireexxi dagee woda ha'yo jibichcha isi'a duldetten› hiyye.31«Ann isikinna isoo, ‹Anke beltoo, ati duuchchi wodda aninni welti hexxetten; anke kadeechchi duuchchi atichcho.32Kunni atik dayyi kinni reyeedhemman; ta'a kinni hedhoke kade; ba'eemman, afeme'een; tennexxee jillennexxi gammada no'aa hasiissaani.› »
The Word for the World International