Read Luqqaasixxaa Wengeele 11

Luqqaasixxaa Wengeele11

Yessuussi Barachchiisseexxa Soodachcho

¹Mitte yanna Yessuusi mitte booncho'n soodata'nemmani; soodachcho bireechchinni uduma hordofeeyye isixxi giddii'ni mitti iso'o, «Gootta! Yohaannisi hordofeeyye ifixxa soodachcho barachchiissemmashsha no'onna soodachcho barsiisi!» hiyye.²Yessuussinna insa'nee, «Soodattinaa wodda hittina'ni soodattinaa qici« ‹(Iima hexxetteke no'oke anna) no'oke!Summi atik woyyoomowwaal.Mootumma atixxi daggowwaali!³Barratixxa ita barra barra'ninni no'aa uwwi.⁴No'o balleessemmakeri'a gattowwaal hinannashshan,balleessa no'oxxa no'aa gattowwaal hiyyi.Fuggoxxenaa'n no'o ba'ati malee'e; hega uudematiba'anna no'o mee e'ishi.› »

⁵Lebexxi Yessuussinna hordofeeyye ifixxe'e hiyyee qici, «Ha'noo giddii'ni jaalo afe'ek mitti wodhakka isiba mareexxi, ‹Koo anke jaalo! Sase buddeena ani'a liqeessi!⁶Miti ank jaal orii'n ane'n dagee'na'a isi'a shiqishannoxxa mitte itanna afe'ebe'non hiyyeexxi iso'o kadhatoole.›

⁷«Iikkinna mini giddii'ni iso'n, ‹Ane'e rakkissooxxe! Hula danqarende'en; oose anxinna aninni welti dhiphpheen; tennexxe'e ke'ennexxi ati'a uwwa dande'abo'non› hiyyaata?⁸Ha'no'ni kulo ifike jaalo kadeemmaxxeenna uwwa gophoole midde iso'o ko'wisemmaxxe calli'a hasaaxxa isi'a uwwaan.

⁹«Tennexxe ani ha'noo'ni hiyyanee qici: kadhate ha'no'a uwwendaani; halse, alfitinaani; hulatanna gangaanne ha'no'aa banendaan.¹⁰Tinni kaddeechchi kadhataak duuchchi adhdhaan; halsaaki duuchchinna alfaan, hula ganganaakeenna isi'a banenda.

¹¹«Ha'noo giddii'n annake kadeek belti ifik (Daabo kadhatoole kinjo uwwaak ayyete?) qulxu'me kadhatoole, bofa isi'a uwwaaki hedheeta?¹²Yookaan qulxu'me kadhatoole is'a gaaddo uwwaata?¹³Ha'noo fuggaaleryyende kaddineen hexxineexxi oose ha'nooxxe eloxxa uwwa, uwwa egendinoole iimate'n hedheek ha'nook anni isoo kadhataakeeri'a hittatta Woyyichcha Hafuura caala bira sa'isseexxi uwwa gopha?»

Yessuussinna Bi'elzebuuli'i

¹⁴Mitti barra Yessuussi afo'o duudeeka fuggichcha hafuura fulcha'nemmani; fuggichcha hafuuranna fuleechchi uduma iikki afo'o duudeemak manjichchi haaso'e; mannikinna mambe'a hiyye.¹⁵Mitti mitti manni kinni, «Fugguchchi hafuurike umo kade'eeke Bi'eelzebuulinni fuggichcha hafuura fulcha'neen» hine.¹⁶Weli kinni iso'o hega uudo'a iimatenaa'n beessisa insa'ne'n leellisho'a isonaa'n hansa'emman.¹⁷Yessuussi kinni heduma insa'neeka ege'neexxi insa'nee hiyyee qici, «Weli weli qoodendaaxxi mootuma baxxaan; iittanni mitti mini hadi wel welinaa'n gargar higoole ibaan.¹⁸Seexanikinna weli welinaa'n gargar higoole mootumma isixxi hitta uurritata? Ha'noo kinni anee, ‹Isi Fuggichcha hafuura Bi'eelzebuulixxe hunnan fulcha'neen› hitina'neeni.¹⁹Yoona ani fuggichcha hafuura Bi'eelzebuulixxe hunnan fulcha'ennelchinni oose ha'nooxxita ayyixxe hunnanita konnee fuggichcha hafuura fulchita'ne? Tennexxe oose ha'nonxi ha'noo'n murtaan.²⁰Ani kinni fuggichcha hafuura fulcha'ennek Mageniinxe hunnanni kaddeechchinni Mageniinxi mootumma ha'noobaa daggeexxa ege'ne.

²¹«Worbi manjichchi hasisaa qico'n loliinka miya ka'le'e mine ifika heqqedhoole karra isixxi nage'ik hexxani.²²Yaane kinni isi irra caala worbi manjichchi dageexxi isoo lole injifatoole isi addate'emmaka ookkoone loliinka miya isonaa'n adhdhaan; karra isixxa duuchchanna adheexxi welekee qoodaan.²³Aninni welti hedhebaaki anee gareera; aninni welti bukki assedhabaakinna xeeraake.

Fuggichchi Hafuuri Manjoke'n Illee Ima Hige E'yaaxxa

²⁴«Fuggichchi hafuur manjokenaa'ni fulaaxxa yanna hafuura adhdhatika hasto wodi'i hedheebaake booncho'n dowaan; hafuura adhdhaaxxa bakkanna afa gophoole kinni ‹Fulenneke anke minibaa ilee iima higannon› hiyyaan.²⁵Illee iima hige dagaa wodda mini iikkinna fiyemeexxi qixxeseemmena'a afaan.²⁶Ookkonneechchi uduma mareexxi wele isi irra fuggataaka wele torbaane fuggichcha hafuuruwwa aadhe dagaan. Isi edo hedhemmake mine'ninna e'yineexxi ookko he'naan; ookkone majichchi'a edixxe isixxe jironaa'n udumixxi hara iso'n fuggatteexxe kaddaan.»

²⁷Yessuussi tennee haaso'ande'n hedhee'naan ardi giddii'ni mitte manjichcho hafuura gikki assiteexxi, «Ate'e ilde unuunsiteexxe amaxxa wodo» hite.²⁸Yessuussi kinni hiisseexxi «Wodo, Mageniinka hiyyichcho laqeexxi ajajemmaakeerixxen» hiyye.

Yoonaasika Beessisa

²⁹Heddi ardi bukki hiyye wodda Yessuussi «Tinni ila fuggoxxen; beessisa uuddo'a hassaan; yaane kinni wabeeka Yoonaasike beessis gadhi darre weli isi'a uwwemaba'a.³⁰Tinni kaddeechchinna Yoonaasi Neneweke qachchike manni'a beessisake kademmashshanni Manjiinki Beltinna tenne ila'a beessisake kadaan.³¹Bita'ixxi mootitte murtetixxa yanna tenne ilanni welti kexxeexxi insa'ne'ni murtaan; ise Solomoonika beekkuma laqatee buttatixxe gabalanaa'n daggeemmaxxee kunse Solomoonaa'ni sa'aak kaba hedheen.³²Neneweke qachchik manninna murtetixxe barra'ni tenne ilanni welt ke'eexxi tenne ila'ni muraan; Nenewek manni Yoonaasika lallaba laqeexxi cubbo ifixxee aadde aange'een; kunse Yoonaasinaa'n sa'aak kaba hedheen.

Yessuussi Ifiinka Fakkeenna Barsiiseexxa

³³«Xassa xasseexxi sho'ondeexxe bakka'n yookaani qoreti hunda uggaak ayyinna hedhebaan; tenne irra e'yaak manni ifa uuddo'a xassemalchoke'n hana ugginaan.³⁴Bisiink xassi Illeten; ille atixxi fayyaxxe kaddoole bisi atik duuchchi wa'a hiyyeeke kadaan. Ille atixxi fayya afa gophphoole bisi atik duuchchi dukkanate kadaan.³⁵Tennexxe ati giddo hedheek ifi dukkanate kadabaashsha heqqedhi!³⁶Yoona bisi atik duuchchi wa'a hiyyeeke kadoole; dukkanate kadeek bisi atik hedha gophoole xassi wa'a hiyye ifammashsha bisi atikinna ittanni wa'a hiyye ifaan.»

Yessuussi Ferisitootika Mannanna Muuseke Seerixxa Barsiisanuwwa Komateexxa

³⁷Yessuussi konne haaso'a bireeshshanni Feerisichchi mitti Yessuussi'i isinni welti ita ito'a ye'e; tennexxee ke'e mareexxi ito'a ofo'le.³⁸Yessuussinna anga anshedhebanggi itaa'naa uude wodda Feerisichchi mambe'a hiyye.

³⁹Gootti Yessuussinna Ferisichcho, «Ha'no Feerisito! Kubbaayyinkanna qoreti gadhi darre ca'a assitinaan; ha'no'n giddo kinni saamikinna fuggoxxe wo'mite'eni.⁴⁰Ha'no gowwoole! Gadhidarre dadeeki Mageni gidi ddarre dadagopheeta?⁴¹Yaane kinni giddo hedheechcho hiyyeeyyete'e uwwe! Ookkonneechchi uduma duuchchin gelchi ha'no'a luqqi hiyyaan.

⁴²«Feerisito ha'no'a aanne'e; bassibelotenaa'ni, sugettetenaa'ni, okoshetenaa'ninna iittanni wele shiixxaramma lataachchuwwanaa'n tommitte Magenoke'e uutinaan; kaddo malee dhugaa assanna Mageno eeyya ga'ma'mi hitinaan; yaane kinni eettene waaldinebaang tenneenna hassa ha'no hassissamman.

⁴³«Feerisito ha'no'a aanne'e; Muuseka seera barantammake mine'ni ulfinnika barcuma, dikko giddonna duuchchiing anga ha'no'aa ke'iso'aa eetinaan.

⁴⁴«Mann ege'nebaangi hana me'ammake mooggo fakkaattinammaxxe'e ha'no'a aanne'e!»

⁴⁵Muuse Seerinke muxxalluwwanaa'n mitti hiisseexxi Yessuussi'i, «Baarsiisanjo! Ati tenne'e haasoosattatto wodda no'oteqa yowwita'ette!» hiyye.

⁴⁶Yessuussi hiiseexxi, «Ha'no Muuseke seerik muxxalluwwi ha'no'a aanne'e! Manni ba'edha dande'abaaxxa ha'urto ba'o insa'ne'n ba'isinaan; ha'no umo ha'nooken kinni eettene ba'o qubichchi ha'nokenni midde tuqqinabaan.

⁴⁷«Ha'nooki annuwwi shiyemmaxxe wabeekoka moogguwwa danchoossitnnammaxxee ha'no'aa aanne'ee!⁴⁸Yoona ha'noo, ha'nooke annuwwixxa huje kokeessitinaaxxe dhugaa kullan; insa'nee wabeeko shinne; ha'nonna mooggo insa'neeka giissitina.⁴⁹Tennexxee Mageniinki beekkumi hiyyee qici, ‹Wabeekonna ergameeyye insa'ne'a ergannon; insa'ne mitte mitte shinnaan; welekanna shorrinshaani› hiyye.⁵⁰Tennexxe tinni ila butta dadendeexxe yannaa'n dunendemmaxxe wabeeko duuchchixxe mundexxee qorendaaxxen.⁵¹Aabeelixxe mundenaa'n saffeexxi tolchimalchiinxe oddo'ninna woyyichcha galmixxe oddo'n dunedeemmaxxe Zakkaariyaasixxe mundexxee tinni ila qorendaan.

⁵²«Ha'noo Muuseke seerik muxxaluwwi ege'natixxa qulfe abixxitinemmaxxe'e ha'no'aa aanne'e; ha'noo umo ha'nookenni e'yitinaba'a; e'yammakaaranna hoyyitine'een.»

⁵³Yessuussi ookkoo'ni fulechi uduma Muuseke seerixxi barachchiisalluwwinna Feerisito fuggo iso'o gareerta'n heddo qortumuwwinni iso'o mekki assate'n kexxe.⁵⁴Tenne assina'nemmachchinna isinge haaso'inninni iso'n yaane illo'atemman.

The Word for the World International

https://app.library.bible/content/2b894378475c6aea