Hayyoolee9
Abeemeeleekii'i
1Yiruba'aalik belti Abemelek isixxe amatik hadi hedheeba Sekemike qachchiba mareexxi amatike hado duuchcha'n hiyyee qici:2«Sekemike manna duuchcha'n hitine qortinaa qici: ‹Iitti torbaane tomme Yiruba'aalixxi oose mo'o, yookaan mitti manji calli ha'no galcheexxa woyya?› Ani kinni ha'noke maalanna mico kadennexxa qaabatte.»3Amatik hadinna isixxe tukke kade'e tenneenn Sekemik manna'n kulle; Sekemik mannina «Isi dayyo no'oken» hina'n Abemelekii'i hordofatee hede.4Ba'aaliberitike mini hadinaa'n torbaane tomme sibiljo birre aa'ne iso'n uune; Abemelekinna eetten torbane tomme sibiljo biren bokkaametanna baashe manna hire; insa'nenna isoo hordonfe.5Ifike anike minibaa Ofira'a mareexxi eettene torbaane tomme Yiruba'aalixxa oose ifika dayyuwwa mitte kinji hana gorra'e; Gedewoonik maa'nichchi belti Iyyo'ataami kinni sho'omemmaxxe gate.6Ookkoneechchi uduma Sekemikinna Betimilok ardi duuchchi Abemelekii'i moosinso'a Sekemi giddo eettene sooddo qarqara hedheeke qilxiinke haqichchi birra bukki hine.7Iyyo'ataami tennee laqe wodda Gerizaanixxe koobaxxe xungo'n fuleexxi hafuura gikki asse hiyyee qic, «Ha'no Sekemike mannaa! Ani hiyyanexxa laqqina'noole Magenikinna ha'nooxxa laqaan.8Barratixxa barra haqqe bukki hite ifi'n moyanjo moosinsino'a fulde; ejersiinka haqichchonna ‹Ati no'o moyi› hite.9«Ejersiink haqichchinna ‹dharicha magenuwi'anna mannakee la'otee kaddeexxa zayite uwwannaxxa waale haqqichchuwwa'n moyonnaa marano?› Hiyye.10«Ookkoneechchi uduma iikki haqqichchuwwi balaseti haqichcho ‹daggettexxi no'o'n moyi› Hine.11«Balaseti haqichchi kinn ‹anxa xe'menna eloxxa gummisannaxxa gumma waale haqqichchuwwake'n moyona'a marano?› Hiyye.12«Tennexxee iikki haqqichchuwwi woyinetka hiddichcho ‹daggettexxi no'o'n moyi› hiyye.13«Iikki woyinetik hiddichchinna kinni ‹dharichcha magenuwwanna manna gammachiisaaxxa anxa woyinetixxa booka waalennexxi haqqichchuwwake'n moyonaa marano?› Hiyye.14«Tennexxee iikki haqqichchuwwi duuchchi qosorotixxa ute ‹daggeettexxi no'o moyi› hiyye.15«Iitti qosorotixxi utenna ookkonee haqqichchuwwa, ‹Anee moyanjo assitino'a heddino'oole daggineexxi gaaddisi anki hunda gollatte; tennee assa gophphino'oole kinni giira qosorotixxe utenaa'n giira fuldeexxi Libaanoosika haqqichchuwwanna ittowaal› hiyye.16«Yoonna Abemelekii'i moosisine'eek qajeelummatanna dhugaa'a assatite kaddoole Yiruba'aalinna isika mini hado eeloxxenni uddineexxi isi asseexxe isi'a hasissaaxxa assitineexxe kaddo'oole.17Anki anni ha'nooxxee loleexxanna ha'noo Midiyaamitotixxe anganaa'n gatiso'a ifixxa hedho uwweexxa heddine'een hiyyaten.18Techcho kinni ha'no anke annike mini hado'n elobaaxxenn kexxineexxi isixxa torbaane tomme oose mitte kinji hana shiltineen; ha'noke fira kad'emmaxxee anki anni ifixxe garbittenaa'n i'leemmaka Abemelekii'i Sekemik moyanjo asseexxineeni.19Yoona techcho Yiruba'aali'anna isike mini hadi'a assitinexxi dhugaatitenna qajeelummatite kaddoole Abemelekinn welti gammadde; isinna ha'non welt gammadowwaal!20Tinni kada gophphoole kinni Abemelekinaa'n kexxeexxi giira ha'noo Sekemikanna Beetimiloonika manna ittowwaal: iittann Sekemii'inna Betimiloonike mannanaa'ni giira kexxe Abemeleki'i ittowwaal.»21Ookkoneechchi uduma Iyyo'ataami tennee haaso'eechchi uduma dayyo ifika Abemelekii'i sodatemmaxxee baqateexxi Bi'eer mare ookko ofo'le.Abemelekinna Seekemika Arda
22Abemeleki Isira'eeli'n sase wogga moye:23Ookkoneechchi uduma Magen Abemeleki'ninna Seekemik mannixxe oddo'n fuggichcha hafuura erge; tennexxee Sekemik manni iso'n fuggoxxin ke'e.24Mageni tenne asseechchi eettenne Yiruba'aalixxe torbaane tomme oose'n assendeexxe xaqarotixxe hujexxeenna dundeemmaxxe insa'nexxe mundeexxee dayyi insa'nek Abemelek dayyuwwa ifika shiyaashsha isoo gargareeke Sekemike manna'n halo fulateeten.25Sekemik manni Abemeleki'n naaphuummat ke'eexxi heenooka manna filati koobuwwatixxe xungo'n sho'eme gadaaka manna uggine; iikki manni ora ookkone sa'ammake manna duuchchanaa'n mulqedhe; Abemelekinna tennee duuchcha laqe.26Ookkoneechchi uduma Abedik belti Ga'aali ifik dayyuwwinn welti Sekemi'a dage; Seekemik manninna godobi mittin isoo addate.27Duuchchiing ifike woyinetke hiddichchuwwik fichchibaa marreexxi gumma qoce'ne; woyinetixxa bookanna giisineexxi ba'la qicinn ayyaana ulfeessine; ifike magenuwwike galmi giddo e'yineexxi ookko inde ha'wina'n Abemelekii'i yowwine.28Abedik belti Ga'aalinna hiyyee qici: «Abemelek ayyeete? No'o Sekemik manni isi'a hiremmaanek mayeete? Isi Yiruba'aalike beltobaata? Zeburi, Hamoorika anna Sekemii'i eggatemammmakebaata? Seekemika anna Emoorike manni'a hiremme; Mayee isi'a ajajjemmanno? Tenne mannii'n ha'noxxe gosaxxe booso kadeeke Sekemike anni'a, Hamoori'a xuurameeyyete kadde.29Konnee arda akeekaannek ante kaduunnadu! Iikki woddi Abemelekii'i ookko'n fulchannan; higgeen iso'n ‹Sannachcha atika jabeessexxe fulde loli!› Hiyye kulannan.»30Ookkone qachcha galchammak Zebuli, Abedik belti Ga'aalika haaso'a laqe yo'oshsha aare.31Abemelekibaa sho'ik erganjuwwa hiyye ergee qic, «Abedik belti Ga'aali ifike dayyuwwinn welti Sekemi'a dage'een; ate'n ookkone qachchika manna elobaaxxenn ke'isine'een.32Yoona atinna atinni hedhemmak ardi hashshanni ookkoo'n kexxine diidi giddo riphphine gaade.33Soodo gorsa arishsho fuldaa wodda kexxineexxi ookkone qachcha'n kino darbitina'n lola ke'isse; Ga'aalinna isinni hedhemmak manni ha'noo lolo'a dagaa wodda dandeetinee qico ijaba qicinni insa'nee ganne.»34Tennexxee Abemelekinna isinni hedhemmak manni duuchchi hashshanni ke'e fule; Sekemike qarqara'ninna shooleba qoodemeexxi riphe gaade.35Abedik belti Ga'aali ookkone qachchinaa'n fuleexxi eettene e'yatixxe hula'n uurre wodda Abemelekinna isinni hedhemmak ardi ripheexxi gaadammabaa'n fule.36Ga'aalinna insa'nee afeexxi Zebuli'i, «Uuda! Eettene koobaxxe xungonaa'n ardi dirrate'n hedheen!» Hiyye.Zebulinna, «Koobatik gaadisi manjoke fakkatee'naa haakeeten» hiyye hiise haaso'e.37Higgeenni Ga'aali, «Uudabexxoo! Ardiqa eettene koobaxxe oddonaa'n addadde dagate'n hedheen; mitte kuta gojaalleyyetike qilxi daree'n dagate'n hexxeen!» Hiyyeexxi haaso'e.38Ookkoneechchi uduma Zebuli hiyyee qic: «Iitti atixxi onno'a duuchcha ta'a haba martee gelte? ‹Abemeleki hiyyemaake manjichchi'a isi'a ergatemaannek mayeete?› Hita'n qorta'ettak atetemmabaata? Iikki tuffatte'eetak manni konneten, kexxe marte insa'nee loli.»39Ga'aali Sekemika arda akeeka'n fule Abemeleki lole;40kaddo malee'e Abemelek isoo shorre; qachchiike ookkone dalla'iinke cufani qico'n hedheeke ora'n banjaa wodda heddi manni mado'e ibe.41Abemelekinna Aruuma ofo'le; Zebuli Ga'aalinna dayyuwwa isika Sekemii'ni shorre fulche.42Langa baro Seekemik ardi fichchi giddi'a me'eexxa Abemeleki'n kulende.43Isinna ifika manna adhdheexxi fule; ookkoneechchi uduma konne manna saseba qoodeexxi ookkone fichchuwwi qiddo rinphe gandaashsha asse. Sekemi manni ookkone qachchinaa'n fulaa wodda afeexxi riphe gaadamabaa'n insa'nee shiyo'a fule.44Ookkoneechchi uduma Abemelekinna isinn welti hexxemmaxxi kutuwwa bakka abixxatee wiinamik ookkone qachchixxe hulabaa gongitaammaxxa yanna wele gatteexxi lame kuttuwwa iittanni gongita'n marteexxi ookkone fichcha'n hedheemmaka manna birte.45Eettene barra Abemelek barra duuchcha ookkone qachcha lola'n hoseexxi abixxe; giddo hedheemmaka arda bire; ookkonee qachchakanna diigeexxi isi hana maxine facaase.46Sekemike kinjiinke dalla'i giddo hedhemmak manni tennee laqeexxi Elberitike magenooffachchotike galmi giddo hexxeexxe kollo giddo e'ye.47Abemelekinna insa'nee Sekemi bukki hineexxa laqe.48Isinna isik manni duuchchi Tsalimoonixxe kooba qabate; Abemelekinna qoce aadhdheexxi heenoxxe haqichchiinxa dame woxeexxi dugummote'n duke; isinni hedheemmaka mannanna, «Rakke! Ani assa'naa uuddinemmaxxa asse» hiyya'n ajaaje.49Ardi iikki duuchchinna damuwwa woxeexxi Abemelekii'i hordofe; eettene damuwwanna eettene kollote'n irkinse tuuleexxi manni giddo hedheemmashanni hedhee'naa giirati insa'nee gunbe; tennexxee Sekemike kinjiinke dalla'i giddo hedhemmak mitte kuma geyaak meyya labbak manni reye.50Ookkoneechchi uduma Abemelek Tebesike qachchibaa mareexxi isoonna buqe abide.51Kaddo malee'e ookkone qachchi giddo kinjiixxi qeerrixxi jabaxxi xellephpho hexxemmaxxee ookkonee qachchik ardi duuchchi meyya labbake hiyyemebaang ookko'a baaje; eettenee hulanna giddii'n cufe'neexxi eettene xelleephphoxxe heellichcho hana da'mine.52Abemelek loleexxi eettene kinjiinxa xelleephpho abide; giiratinna isee gubo'a isexxe hulaba geyeeshshanni,53mitte manjichcho iimi'n damiinka suusuqanjo isi umoke'n wocci assiteexxi isike umika qoonjo butuchchite.54Isinna wiinamik loliinka isika miya ba'edhammak ye'eexxi « ‹Meyaxxe shilteen hinabaashsha maganneten wolaantichcha atika luqisse anee shiyi.› » Hiyye ajaje. Tennexxee isik erganjinna isoo ote'naa isinna reye.55Isira'eelik ardi Abemelek reyeexxa calla uudeexxi duchchiing ifi ifike minbaa me'e.56Konne qicin Abemelek torbaane tomme ifika dayyuwwa shiyati ana ifike'n asseexxe fuggo'a Mageni isixxe hujeka hira isi'a uwwe.57Iittanni Magen Sekemike mannixxa fuggo duuchcha insa'ne'ninni wirri asse; konne qicinni Yirube'aalika belto Iyyo'ataamixxi badino insa'ne'n gelte.
The Word for the World International