Hayyoolee2
Duuchchi Woddike Goottixxi Erganna Bookimike Bogi Giddo
1Duuchchi Woddik Goottixxi erganna Geligeelii'n Bookimi'a me'iteexxi Isira'eelika arda hiyyee qic, «Ani Gibtseke boganaa'n fulche edike annuwwi'a uwwonnaa kako aageennake bogibaa'a hanoo iyyedage hiyyennee qici: ‹Ha'noonni welti aagennexxa kako ijje dedhabe'non:2Ha'no konne boga'n hedha'neeke ardinni welti firoodiinoqqe: magenoonfanta'neka miseechchixxa fakkuwanna diiggine birre› ha'no kinni ani hiyyennexxa waaldineexxi hanooxe fedhiishshan assitine'een.3Tennexxe ta'a konne arda ha'no edii'n gamake'n hiisabe'noxxa ege'ne: insa'ne ha'no'a naapha kandaan: dharichchi magenuwwi insa'neeki gufote ha'noo'n kadaan»4Duuchchi Woddike Goottixxi erganji konne hiyyichcho Isira'eelike ardi duuchchi'a haaso'ee wodda Isira'eeliki ardi hafuura gikki asseexxi oodhe:5Ookkone boonchonna Bookimi hine ye'nechchi tenne daafenniten. Insa'neenna eettene bakka'ni Duuchchi Woddike Gootti'a tolcha shiqinshe.Iyyaasuxxa Reyo
6Iyyaasu arda ifika geegeesichchi uduma mitti mittiniing Isira'eelk mini hadi boga dhaalatee'e ifi fike geegibaa me'ine.7Iyyaasuke baro'ninna isi uduma Duuchchi Woddik Gootti Isira'eelike ardi'a hujeexxa lumollamma yaane uuddeexxi geedhe hexxeeke baro duuchcha'n ardi Duuchchi Woddika Gootta magenoonfatte.8Duuchchi Woddike Goottik erganji Neewek belti Iyyaasu dhibbanna tomme wogga geye lummedhe:9Isinna koobatike Efireemike boga'n hexxeexxe Ga'ashi koobabaa'n middi darre'n hedheke isinge bogi giddo «Timinaati Seeraahi» hiyyemaaba moogemeen.10Iitti ila duuchcha muddeechchi uduma Duuchchi Woddik Goottinna isi Isira'eelike ardi'a hujemmaxxa eloxxa yaane egendeebaaxxi udumixxi ila dagge.Isira'eeliki Ardi Mageno magenoonfata Waalee qico
11Konneechchi uduma Isira'eeliki ardi elobaaxxa huje hujati Duuchchi Woddika Gootta elobaaxxa yaane hunje. Aliimi hine ye'na'neeka dharichcha magenuwwa magenoonfante:12Gibtsee'n fulcheeke Duuchchi Woddika Gootta edike insa'neke annuwwike Mageni'a ergatema waalle; qarqarake'n hedheeki ardi magenoonfata'neeka dharcha mageno magenoonfatate'n ke'ne: konneechchuwwa sagadati Duuchchi Woddika Gootta mufachchiinse.13Insa'nenna Dada Duuchchika Gootta magenoonfata waalleexxi «Ba'oolinna Asitaarooti» hiyyendaaxxa miseelchixxa fakkuwwa magenoofante.14Tennenaa'n kexxeexxa Duuchchi Woddik Gootti Isira'eelike arda'n lumoshsha mufate: saamake mannixxe anga'ni insa'nee sa'isse uwween: qarqarake'n hedhemmake naapha'ni wocci asse. Ookkoneechchi uduma Isira'eelki ardi naapha lole ifinaa'ni hoyyedha dande'a gophe.15Isira'eelki ardi lolakee fuleexxe qixxe duuchcha'ni Duuchchi Woddik Gootti insa'ne'ni edise haaso'emashanna kakateemmashanni injifateemashsha Dada Duuchchik Giittixxi anga insa'ne'ni lolidaama. Tennennaa'ni kexxeexxa insa'ne lumoxxe rakko'n inbe.16Ookkoneechchi uduma Duuchchi Woddik Gootti tenne bokkaametixxe anganaa'n anjirtaaxxa hayyoole insa'ne giddii'n file.17Yaane kinni Isira'eeliki ardi insa'neke sooreessuwwi'a ajajema ginbe; Duuchchi Woddike Gootti'a anfeemmaxxa xuurameessuwwa xe'insheexxi dharcha magenuwwa sagande: annuwwi insa'nekinna Dada Duuchchike Goottika ajaja ulfeessaamman: insa'ne kinni annuwwi me'eeka ora hordonfebaan.18Duuchchi Woddik Gootti hayyoole fileexxe yanna'n isi hayyoolndi welti hedhemman: insa'nee shorra'nemmakenna miicammake naaphixxe buuttonn ardi raara wodda Duuchchi Duuchchi Woddik Gootti insa'nee mararaammaxxee hayyooletike baro duuchcha'n naaphiinxe anganaa'n insa'nee gargaaraamman.19Yaane kinni sooreesi reyaa wodda hinge wele dharichcha magenuwa hordofati; isoo ulfeessatinna magenoonfatati annuwwi irra fuggoxxa yaane huja'ni elobaaka adaba waalleemmabaan.20Tennexxee Duuchchi Woddik Gootti Isira'eelike arda'ni mufateexxi hiyyee qici, «Kunni gosa gosak ardi ifike annuwwinni kako aagemaxxa yaane hujete'n hosinsebaan seerakanna heqqe'nebaan.21Tennexxe Iyyaasu reyeechchi uduma bogi giddo hedhemmaka manna mittekanna fulchinebaan.22Iittanni kunni Isira'eelik ardi edike annuwwi insa'neekishsha Duuchchi Woddike Goottika ora hordofaaxxanna hordofabaaxxa afatee konne arda imaaniinsha assedhe hega insa'ne uudatiten.»23Tennexxee Duuchchi Woddik Gootti Iyyaasuxxe anga'n sa'isse uwwat ookkone gosa gosatika arda hirbange'n fulcheban.The Word for the World International