Hayyoolee19
Mitte Leewwichonna Isixxa Gadhixxa Suumetixxa Jaalo
1Ookkone baro'ni Isira'eeli giddo moyanji hedhemmabaan; eettene yanna'ninna tullichiinke Efireemike boga'n hedha'neek mitte Leewwichchoman; kunni manjichchi Yihudaxxee galcha'n hexxeexxe Beetelihemii'n mitte dubarcho shiixxooxxe are assedhe aadhdhe.2Yaane kinn iitti shiixxoxxi isixxi are yabaabulde; isenna isoo waaldeexxi Yihudake boga'ni hedheeke ifike annike minibaa Beetelihemi'aa me'ite. Isenna ookko shoole agenjo turteechchi uduma,3iseki aro'i isee araarsedhe ifibaa hiisedho'aa isebaa mare. Isinna maraa wodda ifika garbichchonna lame ifixxa harre abixxeemman. Iitti manjichchonna ifike annike minibaa isoo e'yishshe, iseki anninna isoo uude wodda gammashshotti adhdhe.4Eettene beltok anninna ookkoni turaashsha jabeese isoo kadhate; tennexxe isi ita'ninna ha'wa'ni sase barra isinni welti ookko gale.5Insa'nenna sholgaxxa barra gorsa bariisa ke'ne, isinna me'atee qophpheefate, eettene beltok anni kinn beltiinka anna hiyyee qici, «Hunna alfitattoshsha edisse'e midha afo'o uggudhi; ookkoneechchi uduma me'itatton» hiyye.6Tennexxe'e lamiing manni itateenna ha'watee welti ofolle. Beltotik anninna ookkone Leewwichcho, «Ballo telchonna gammada'ni kabanni gali» hiyye.7Iikki Leewwichchi me'atee ke'eexxi beltotik anni kinni ookko turaashsha malchammale isinna higgeeni ookko gale.8Ondixxa barra gorsa bariisa iikki Leewwichchi me'atee ke'aa wodda, beltotik anni, «Bllo midha afo'o uggudhi; bogi galgalo'ee'na laanna me'itatton» isoo hiyye; tennexxe iikki lamiing manni isinni welti ite.9Ookkoneechchi uduma iikki Leewwichchi isixxe shiixxooxxe arenninna garbichchik welti me'atee ke'ee wodda, eettene beltok anni hiyyee qici, «Yoonna bogi hashshe'een kabanni galli; siphphi siphphi hiyye'en galle gammadde; gorsa bariisa kexxineexxi ora ha'nooka me'itinaan» hiyye.10Yaane kinn iikki Leewwichchi eettene hashsha ookko'o galjetee'e hasebaan, tennexxee feenemmaxxa eettene lame harre nna shiioxxxa are ifixxa aadhdheexxi Iyyaabusi hiyyemaake Iyyerusaalemike qachchibaa me'ine.11Insa'nenna Iyyaabuusi'a genneeshshanni bogi hashsheemmaxxe'e garbichchi gootta ifkaa, «Amoo ballo'o konne Iyyaabusike qachchibaa gorre'e ookko gallo» hiyye.12Isiki goottinna, «Isira'eeliki ardi hedha'nebaake qachcha'ni marrabo'non; konne booncho sa'nennexxi Gibi'a marre gallo» hiyye hiise.13Isinna garbichcho, «Amoo mee Gibi'a yookaan Raama'a geyatee'e wo'laano ookko hedheeke boonchona'ni mitteke'ni gallanonn» hiyye.14Tennexxee insa'nenna Iyyerusalemi'i sa'ne ke'ne me'ine; Biiniyaamixxe galcha'ni hexxeexxe Gibi'a genneeshshanni arishsho aagge.15Insa'nenna galjetee ookko'a gorre. Insa'nenna marreexxi ookkone qachchike loolla'ni ofolle; me'ine qachchin qarqara ofolle, yaane kinni mine ifike'ni aadhdhe insa'ne galchaaka mittekanna gonphe.16Eettene hashsha ookkone tullichiinke Efireemike boganaa'n dage'e Gibi'ake bogi giddo hedha'neek wele bogik geerchi huccammabaa'n hoseebaa'n dage; ookkone bogik manni kinni Biiniyaamitotemman.17Iikki geerchi toggi hiyyeexxi ora me'amaka ookkone qachchik loolla'li uude wodda, «Habaa'n daggete? Habaa me'itaatte?» Hiyye isoo qore.18Iikki Leewwichchi hiyyee hiise qici, «No'o dangeenki Yihuda Beeteliheemii'n bayyataake tullchuwiinke Efireemike boganaa'niten. Aninna Yihuda Beteliheemi hedhenani; ta'a Duuchchi Woddike Goottike minibaa me'aanen. Anee'e ifike minibaa adhdhaaka manjo afeebo'non.19No'o harre no'oxxee biilanna oki'a; no'o garboole atixxi ani'aana kado garbitte atixxee'e, no'onni welti hedheeke dargageesi'a itanna woyinetixxa booka abixxinee en; wele mittiichchinna no'o'aa hasisabaan.»20Iikki Geerchinna, «Baga nage'ik dagginee! Amme anibaa galle! Ha'no'a hasisaachcho duuchcha shiqishannon; kaba ba'linake'ni galdinnoqqe» hiyye.21Tennexxe isi ifike minibaa isoo e'yisheexxi eettene harre'a oki'a uwwe. Keesumatinna lekka ifixxa anshexxe; itte, ha'wite.22Insa'nenna eettene ita ha'wa'ni he'ne'na gammashonde'ni he'nee'na heenok ookkone qachchixxi baashuwwa ookkone mine buqqe; hulatanna ganganna'ni, «Mine e'yishsheetteka manjichcho gadhi'a fulchi Isinni yababullonaa hanseennen!» Hine.23Ookkone minik anninna gadhi'aa fuleexxi insa'ne hiyyee qici, «Koo anke dayyuwwa, tenne elobaaxxa yaane ballo assitinoqqe'e, kunni manjichchi anke minibaa e'yeemmaxxe'e iitta hexxeexxa cubbo assitinoqqe'e.24Yoona duudo dubarcho kaddeexxi anixxi beltonna ookkone manjichchixxi shiixxoxxi are he'neen. Ani insa'ne ta'anni ha'no'aa gadhi'a fulchee'naa salphisine eetineexxa insa'nee asse. Yaane kinn konnee manjichcho'ni calla iitta hexxeexxa shookishshaaxxa elobaaxxa yaanenna assitinoqqe.»25Yaane kinni iikki manni isixxa lanqebaan; tennexxe iikki Leewwichchi shiixxoxxa are ifixxa insa'ne'aa gadhi'aa fulche; iikki manninna manjichchoti yabaabulle; hashsha duuchcha mitti mittik itti isenne galleexxi boro haachchabaa wodda isee'e wocci assine.26Bogi soodee wodda manjichcho iseki aro'i hedhemmake minibaa higge me'ite. Isenna weddumete'ni arishsho fuldaa qico'ni ookko'o wabbi hite.27Iseki goottinna bariisanni ke'ee ora me'atee'e huna banee fulaa wodda, shiixxoxxi isixxi are anga hulatibaa farri assiteeshshanni wuddumede'ni ibbee'na afe.28Iikki Leewwichchinna ise'e, «Ke'i, me'inoo!» Hiyye. Yaane kinni ise rerteemmaxxe'e cuqqi hitebaan. Ookkoneechchi uduma rensha ookkone harrichcho'ni fe'eexxi ifike minibaa ke'e me'e.29Isinna ifike miniba mare geyeeshshanni eettene shiixxoxxa are tommenna lameba kukkuteexxi Isira'eelike boga duuchcha'ni geessise:30Tennee uudek duuchchi, «Isira'eelk ardi Gibtsek boganaa'ni fulemaxxe yannanaa'n safee'e iitta hexxeexxa yaane uudendebaan; kadde egendebaan. Yoonna ha'noonna no'o maa assiyyo hasisaaxxa tenne yaane hedde, mari'atte» weli'aan weli Hine.The Word for the World International