Hayyoolee12
Yofitaahenna Efireemika Manna
1Efireemiki manni hunna ifixxa giisedhe Tsaafonik galaana foofeexxi Yoftaahee, «Ati Amoonito loldotaa fuldatto wodda atinni welti me'inonnaa'a mayee no'o'ni kula gophpheette? Ati giddonni hexxee'naani mine atike'ni giira worrannon.»2Yoftaahenna insa'ne hiyyee qici, «Aninna anki ardi Amoonike manninn welt jaba qicinni lolemmenne wodda ha'noo qophedhee'naa ha'no insa'neexxe angaa'n anee anjirtinebaan.3Ha'no anee gargaartina'nebaaxxa afennexxi lubbo anxa xe'mifatebe'no shenendinni Amoonito lolatee foofenne; Duuchchi Woddik Goottinna anga anxe'n insa'nee sa'isse uwwe. Mayeeteta ha'no anee loldino'aa daggineechchi?»4Ookkonnechi uduma Yoftaahe Gele'adika manna bukki asseexxi Eefireemike manninni welti loleme; Efiremki manninna, «Ha'no Gale'adike mannaa ha'no Efireemixxenna Minaasexxe oddo'n ofoldine'eechchi Efireeminaa'n baajjineeten» hinemmaxxee Gale'adik manni Efireemika manna lole.5Gele'adito Efireemike bogibaa foosamaka Yordaanoosika galaana abinde; baaje fulo'a mitti Eefireemichchi foofo'a eeti'i insa'nee laqedhaa wodda Gele'adiki manni, «Ati Eefireemike bogike manjo?» hine isoo qorraaman iikki manjichhcinna, «Waawwoti!» hiyyoole;6insa'nenna, «Shibooleti» hiyyi hinaan; isi kinni hiyyichchoo toggi asse hiisebaang «Siboolit» hiyyoole isoo Yordaanoosike galaana foofatixxe bakkuwwanaa'n mittete'n isoo abinde shinnaan; eettene yanna'ni shoole tommenna lami kumi Efireemik manni shiyeme.7Yoftaahe jaane wogga duuchcha Isira'eelii murte akeekisanjoke kade. Gele'adichchi Yofitahe reye; isinna Gele'adike qachchuwwi giddii'ni mitteke'n moogeme.Ibitsaanii'i, Elooniinna Abidoonii'i
8Yofitahee'n itti aaneexxi Beetelihemik Ibitsaan Isira'eelii'i akeeke.9Ibitsaani sase tomme labbaxxa oosenna sase tomma dubarra afeemman; dubarra isika gosa isixxi kadebaake manna'n heerunsise; isixxe gosa kadebaake dubarra labbaxxa ifixxe oose'anna aadhise; torbaane wogga Ibitsaan Isira'eelii'i akeeke.10Ibitsaaninna reye Beetelihemi'n moogeme.11Isi uduma Zabilonichchi Eelooni Isira'eelii'i tomme wogga akeeke.12Ookoneechchi uduma Eelooni reye; Zabilonixxe galcha giddo hedheeke Ayyaloonike boga'n moogeme.13Eloonii'ni itti aaneexxi Piri'atoonik Hilelik belti Abidooni Isira'eelii'i akeeke.14Abitsaanna torbaane tomme harre'n gulufaaxxa shoole tomme labbaxxa oosenna sase tomme oosetixxa oose afeemmani. Isinna saddeeta wogga Isira'eelii'i akeeke.15Ookoneechchi uduma Hilelik belti Abidooni reye; koobitike Amaaleqitotike boga'n Efireemixxe galcha giddo Piri'atooni moogeme.The Word for the World International