Iyyaasu6
Iyyaarkoxxa Iba
1Ookkone wodda Isira'eelito soda'atenaa'ni kexxeexa Iyyaariko jaba qicinni cufendeemman; gadhi'anna kadi giddi'a e'yaammak manji hedhemmabaan.2Duuchchi woddik Goottinna Iyyaasu'u hiyyee qici, «Kunse ani Iyyaariko isek moyanjinna iseke loliinke manninnaa'ni anga atixxe'ni sa'issee uwwe'enen.3Konne qachcha ha'nooke loliinke manni welt mittele dowwe; tennenna jaane barra asse.4Torbaane qeese torbaane malagata abixxiteexxi taabooti edo saxxowaal; torbaxxe barra'ni qeese malagata ufuufa'ni ookkone qachcha torbaanele dootowaal;5Uurabeloka malagatiik hafuura laqqinaa wodda ardi duuchchi hafuura gikki asse raarrowwaal; ookkoneechchi uduma ookkene qachchik dalla'i diigemaan; ardikinna alallee qabataan; mitti mitting manji hedhe hedhemmabaa'ni giddi'a e'yowaal.»6Neewek belti Iyyaasu qeese ye'eexxi insa'nee hiyyee qici «Kakotika taaboota dukke; torbaane qeese torbaane malagata a'liteexxi Duuchchi Woddike Goottike taabooti edo me'itowaal» hiyye7Ardakanna, «Edi'a sa'we; qachchakanna dowwe; ka'leek loliiki manninna Duuchchi Woddike Goottike taaboti edo me'inowaal» hiyye ajaje.8Iyyaasunna ardake'n haaso'eechchi uduma iitti torbaane qeese Duuchchi Woddike Gootti edo torbaane malagat abixxiteexxi ifiifika malagata ufuuffa'ni edo sa'ne; Duuchchi Woddike Gootti kakotike taabootinna insa'ne hordofe.9Ka'leek loliink manni malagata ufuuffaaxxe qeese edo sa'e me'a wodda kiphake kadeek heqanjuwwi kinni taaboota hordonfe; eettene yanna duuchcha'ni malagati uurabelo ufuuffema'nemman.10Iyyaasunna arda, «Bararasatixxa raare raartinoqqe'e; hafuura ha'nookanna gikki assitinoqqe; ani raare hiyyannoxxee barra qico'ni afo'o hanookenaa'ni mittechchonna bucuqqi hitinoqqe; raartinaak ookkoneechchi uduman» hiyya'ni ajaje.11Tennexxe Iyyaasu Duuchchi Woddike Goottika taabota dulike'nnexi ookkone qachcha mittele doonashsha asse; ookkoneechchi uduma ardi kaanbetibaa illee iima higgexxi gale.12Iyyaasunna langa baro bariisa ke'e; qeesetinna Duuchchi woddike Goottika taaboota dukke.13Iitti torbaane qeese torbaane malagata abixxiteexxi Duuchchi Woddike Goottike torbbaane qeese malagate ca'lite ufuuffa'ni Magenike taabooti edo me'ita'n malagata uurrisabelo ufuuffate'n kexxe; ka'leek loliink manninna insa'ne'e edii'n mei'na wodda kiphi heqanjuwwi kinni Duuchchi Woddike Goottika taaboota hordonfa'nemman; itti qeesenna uurrisabelo malagata ufuuffa'nemman.14Tenne langaxxe barra'ni qachcha mittele dooneechchi uduma kaanbe'a illeema hinge; jaanne barra duuchcha iitta assine.15Torbaxxa barra reefi boro haachchaba wodda ke'neexxi, edi woddishshanni ookko qachcha torbaanele doone; ookkone qachchanna torbaanele dooneek eettene barra callamman.16Torbaxxe dowwe'n qeese malagata ufuufaa wodda Iyyaasu arda hiyyeexxi ajajee qici, «Duuchchi Woddik Gootti konne qachcha hano'a uwwedheen raarre!17Qachchakanna isi giddo hedheechcho duuchchi Duuchchi Woddike Gootti'a foyemeeke kademmaxxe ijenda balleesse; no'o erginennexxa colibaleeyye shoxxemmaxxe eettene yababulto Re'aabii callanna isenni welti iseke mine'ni hedheek calli lubbo gattowaal.18Ha'noo kinni okkone hoyyemeechchinaa'n mittechcho adhdhitineexxi umo ha'nooke'n ba'ne idaqitinabaashsha ifi heqqedhdhe; kadagophoole Isira'eelixxe kaanbe'ni ba'ne geltaaxxe assitinaan; fuggoxxa yaanenna ise'ni iyyedagginaan.19Iikki birretike sibiljininna worqe iittanni sageettotik sibiljinna sibliink miyuwwi duuchchi Duuchchi Woddike Gootti'a woyyomeeke kadeemmaxxee isike miya massatike mi'ne'n aagowaal» hiyye ajaje.20Malagata ufuufemaa wodda ardik raarre; malagatiinka hafuuraa laqeexxi ardi hunnati raara wodda dalla'i diigeme; mitti mitting manji hedhemmabaa'ni giddi'a e'ye; iikki qachchinna anga insa'nexxe'n ibe.21Ookkone qachchi giddo hedheechchi duuchchi kunninna labbakana, meyaka geedhenna ka'uma lalokanna gedhebo ittanni harre wolaantichchi kutti assine.22Iyyaasunna ookkonee boga dooyyemmaka lame manna, «Etene yabaabulto manijichchoka mine mare; ise'a assitino'a kakatineemmashshanni isenna isecho kadeechcho duuchcha ookkone'ninna fulche» hiyye.23Tennexxe lame ka'umi colibaaleyye e'yiteexxi Re'aabii'i anna isekanna ama isexxa iseka dayyuwwanna iseke kadeeka duuchcha ookko'n fulchine; iseka fira duuchcha fulchineexxi Isira'eelitotixxe kaanbe gadho uggine.24Ookkoneechchi uduma ookkone qachchanna giddo hedhemmachcho duuchcha gunbe; birretike sibiljinna worqqe sageettotike sibiljonna sibliinka miya Duuchchi Woddik Gootti miya massatike mi'ne'n uggurre.25Iyyaariko dooyyinaashsha Iyyaasu ergemmaka manna shoxxemmaxxe eettene yabaabulto Re'aabi iseka mini hadonna iseke kadeeka duuchcha gatinse isenna techchi qico'ni Isira'eelitotixxe oddo'ni hexxeen.26Ookkonne wodda Iyyaasu hiyya'n kakatee qici; Konne Iyyaarkoka qachcha illee iima hiisseexxi ijaaraak Duuchchi Woddik Gootti edo isi badinemmeeka kadowaal:«Isi booso isixxa safa wodda,isikk angaf beltinna ba'owaal;Dalla'a isika jaaraa wodda,maa'nichchi isik beltinna ba'owaal» hiyye kakate.27Tennexxe Duuchchi Woddik Goottinna Iyyaasunni welt hedhamman; Iyyaasuki gurrinna ookkone bogi giddo duuchchaa'ni laqeme.The Word for the World International