Read Iyyaasu 13

Iyyaasu13

Abidema Hasissaa'nanni Gateeka Boga

¹Iyyaasuxxi wogga lebba'ni me'itemmaxxe'e cime, Tennexxe Duuchchi Woddik Gootti hiyyee qici, «Ta'a atixxi wogga lumoxxen; cindeetten; yaanne kinn abidemebaang gateeki heddo boga hedheen.

²«Abidemebaang gateeki boguwwi: Filisixeemikenna Geshuureke ardike boga duuchchan.³Kunni boguwwi Gibtsee'n arishsho fuldamma darree'n Shiihorite hiyyemaake galaaninaa'n ke'exxi Middi darre hedheeke Aqarooni hiyyemaake qachchixxe gabala qico'n hedheek bogi. Kunni duuchchi Kenaanike boga hiyyemaan. Kunni boguwwinna ondiinge Filsixeemike moyanjuwwike Gaazake, Ashidoodike, Asiqeloonake, Gaatinna Aqaroonike moyanjuwwi galchammak boga kadaa woda kunninna Awwitotike bogamman.⁴Weli kinni Kenaani giddo Me'aara hiyyemaake Sidoonitotike boginninni gabala Amoorake ardixxe Afeeqi qico'n hedheeki;⁵Gebaalitotika bogganna boroti darre'n Haromoni'emixxe kooba'n bita'i darre'n hedheeke Ba'aaligadike qachchinaa'n Hamaasixxe weldeenna qico'n hedheeki Libaanoosi bogi duuchchi abidemebaan.

⁶«Libaanoosi'ni Misirefootimayiimi qico'ni hedheeke kooba callike boga'n hedhaammaka Sidoonito ani umo anke Isira'eeli edi'n shorranoon; ati kinni ani ate'e ajajennashshann boga Isira'eelike ardi'a geegoke kadaashsha qoodi.⁷Konne boguwwanna qadaada kado'a qooddattoki Isira'eelixxe gosake sallane mini'anna gamisa Minaaseke mini'aten.»

Yordaanoosike Gaalani'n Boroti Darre'n hedheek Bogi Qoodemee qico

⁸Roobeelikinna Gaadik ardi ittanni Minaaseke minik gamis ardi Duuchchi Woddike Goottik erganj Muuse insa'nee geyaaka geegoke uwwee'na edi wodda adhdhine'en; kunni boginna Yordaanoosike galaan wido boroti darre'n hedheeken.

⁹Insa'ne'a uwwemeemmaki geeginna Aroonixxe Dhooqake kayyike kasa'n hedheeke Aro'eeri hiyyemaake qachchanaa'n ke'exxi ettene dhooqa giddo oddote'n hedheeke Medeba hiyyemaake qachchike diidanaa'n Diboon hinaake qachchi qico'n hedheeke bogan.¹⁰Ittani Amoorik moyanji Siihooni moyeeke Haseebonike qachchanaa'n Amoonike ardixxe gabala qico'n hedheeka boga duuchcha mitteba abideeten.¹¹Gele'adiki, Geshuureki, Ma'ikaki boguwwi duuchchinna Harmonixxe koobaki bogi duuchchi Baasaanike bogi duuchchinni Saleka qicon hedheeke boga mittenba abideeten;¹²Raafayitotixxe hafe kadeemaka Asitaarootinna Edirayii'ni moyeemaka Baasaanika moyanjo Oogixxa mootumma duuchcha laphphaan. Muusenna konneera duuchcha injifateexxi fulche.¹³Kaddomalee kinni Isira'eelk ardi Geshuurikanna Ma'ikaka arda bogi giddii'n fulchebaan; tennexxe insa'ne telchi qico'n Isira'eelike ardixxe oddo'n hedeen.

¹⁴Muuse Leewwike gosatike mini mini hadi'a geyaaka geego uwwebaan; Mageni Muuse'e ajajemmashshann Duuchchi Woddika Gootta Isira'eelike Mageni'a tolchimalchoke'ni ciincesinaake tolcha kade'e shiqaake tolchanaa'ni alflinaak qoobbi insa'ne'a geegoke kadee uwweme'en.

Roobelike Mini'a Geego

¹⁵Muuse Roobelike minike ardi'a aanchi anchinn geyaaka geego qoode.

¹⁶Insa'neke geeyeki bogi Arinoonixxe dhooqake kasa'n hedheeke Aro'eerinna ettenne dhooqa giddo oddote'n hedheeke qachchibaa'n itti aanne hedheek boga kute sa'eexxi Medebake qachcha bira hedheeka suubbichcha boga mitteba abidaan.¹⁷Ittann Haseebonika qachcha; suubbichchi boga'n hedhemmaka Diboonika; Bamotiba'oolika; Betibe'aalimetsoonika;¹⁸Yahaatsika, Qedemootika, Mefa'aatika,¹⁹Qiriyatayiimika, Sibemaka, dhooqa giddixxe kooba'n hedheeka Tseretishahaarika,²⁰Beetipe'orika, Pisiga hinaaxxe kooba hunda hexxeexxe dhooqa boga duuchchanna Beetiyeshimootika qachchuwwa duuchcha mitteba abideeken.²¹Suubbichchi boga'n hedheemmaka qachchuwwa duuchchanna Haseebonike qachchi giddo hedha'n moye galchaammake Siihoonii'i Amoorake moyanjika boga duuchcha mitteba abideeken. Muuse moyanjo Siihoninna Midiyaamike ardika akeekisanjuwwa kadeemmaka Ewwii'i, Reeqeemii'i, Tsurii'i, Huurinna Reba'ii'i injifateemman. Kunni akeekisanjuwwi duuchching arda galcha'ammki moyanjo Siihooni'a gabara'neetemman.²²Isira'eelik ardi shiyemmake manninaa'n mitti mora'n galaammaka Bi'oorike belto Bele'aamitemman.²³Dhidhimi darre'n Yordaanoosik galaani Roobelike minike aanchi aanchi ardi'a uwwemeemmake bogixxi gabalamman. Kunni bogi isi giddo hedheeke qachchuwwinna qarqarake'n hedheeke shiixxaramma qachchuwwi duuchchin Roobelike minike aanchi aanchi arda'a geegoke kado'a uwwemeemmaken.

Gaadike Minika Geego

²⁴Muuse Gaadike minike aanchi aanchi ardi'a geyaaka geego qoode.²⁵Insa'ne geeyeki bogi Iyyazeeri hiyyemaaka qachchanna Gele'adi bogi giddo hedheeka qachchuwwa duuchcha mitteba abide'e, Amoonike ardika gamisa boga leba'n Raabake qachchanaa'n boroti darre'n hedhemmake Aro'erike qachchi qico'n hedheeken.²⁶Bogi insa'nekiki ba'linni Haseebonike qachchana'n ke'eexxi Ramati Mitsiphakenna Beexonimike qachchuwwi qico'n, iittanni Mahinayimike qachchana'n Lodebaarike bogixxe gabala qico'ni geyeedhen;²⁷iittanni Yordaanoosixxe dhooqa giddo (Haseeboniki moyanji, Siihooni galchaammaka wele gateeki) Beetiharaamii'i, Beetinimiraa'a, Sukootii'i Tsafoniinna Kinereetixxe Abbaayyake kasi qico'n Yordaanoosiki galaanii'n dhidhimii darre'n hedheeka Haseebonik moyanji, Siihooni galchaammaka wele gateeka boga mitte abidaan.²⁸Gaadike minike aanchi aanchike'e ardi'a geegoke kado'a uwwememmaki qachchuwwinna qarqarake'n hedheeke shiixxaramma qachchuwwi duuchchi koneratemman.

Boroti Darre'n hedhammake Minaaseke Minike Gamisa aanchi aancike ardika Geego

²⁹Muuse gamisa Minaaseke minike ardi'a geyaaka geego uwweeki, aanchi aanchinni qoodetemman.³⁰Boga insa'nekixxi gabala Mahinayimika qachchanna Baasaani qico'n hedheeka boga duuchcha mitteba abideeten; Baasaaniki bogi kunni Baasaanika duuchchiinga boganna iittanni Baasaan giddo Ya'irri hiyyemaake boga'n hedheeka duuchchiinga 60 qachchuwwinninni Baasaanik moyaji Oogixxa galcha mitteba abideeten.³¹Iittan Gele'adiki gamisi bogi, Asitaarootikinna Edire'iki qachchuwwi; konne qachchuwwa Baasaaniki moyanji Oogi moye galchaammaken, kunni duuchchin bogi gamisa Minaaseke gosati minike Makirixxe horite'a aanchi aanchinni qoqqoodeme.

³²Muuse Mo'aabike diida'n hedhemma wodda Yordaanoosike galaani wido Iyyaariko'n boroti darre'n hedheemaka boga qoodeeki konne qicinnitemman³³Yaane kinn Muuse Leewwike gosatike mini'a geyaaka geego uwwebaan; insa'nki geegi Duuchchi Woddika Gootta Isira'eelike Mageno kadeemmaxxe'e; geego insa'neka alfinaaki Magenoke'e shiqaammake tolchinaa'nite kaddeexxa kulende'en.

The Word for the World International

https://app.library.bible/content/2b894378475c6aea