Iyyaasu11
Iyyaasu Moyanjo Yabininna Wele Moyanjuwwa Injifate qico
1Hatsoorik moyaji Yaabini Isira'eelixxa injifachcho laqe wodda Yobabii'i Madoonike moyajibaa Yobaabi'a, Shimiroonikenna Akishafike moyanjuwwibaa2iittanni middake'n koobatike boga, Kinereetike bita'ii'n Areba, dhidhimake'n gammoojje boganna Doorike tullichchinaa'n dhidhimi darree'n hedhemmake moyanijuwwibaa erge.3Ittanni Yordaanoosi'n Arishsho fuldamma darre'ninn dhidhimmii darre'ni hedheek Kenaanitotibaa, Amooritotibaa, Hiititotibaa, Feeriizitotibaanna koobuwwa callike boga'ni hexxa'neexxe Iyyaabusitotiba; iittanni kinni Mitsiphake boga'ni Harmoonixxe kooba hunda hedheeke Hiwaatotike moyanjiba'a erga dhaame.4Inisa'nenna abbaayyatike qarqarike maanchishsha bira sa'eka ifike loliinke mannanna loliinxa fadhadixxa gaare adhdhine dange.5Kunniichchi duuchchi moyanjuwwi mitteba hige'e Isira'eeli lolo'a Meroomi hiyyendaaxxe muumme bira dage qecece.6Duuchchi Woddik Goottinna Iyyaasu'u, «Insa'ne sodaattoxxe'e. Ani Isira'eeli'a lolennexxi soodo tenne yanna'n rensha insa'neka Isira'eelixxe anga'n uwwannon; atinna fadhodo insa'neka mogolchita'n insa'nexxe fadhadixxa gaaruwwanna gubbatton» hiyye.7Tennexxe Iyyaasu isike loliinke manninni welt Meroomixxe muummebaa duuleexxi si'atebaang lole miidhe.8Duuchchi Woddik Goottinna Isira'eeli injifataashsha midditte uwweemmaxxe'e, Isira'eeli manni loleexxi middi darre'n Misirefootimayiiminna lumoke Sidoonake qachchi qico'n, boroti darre'n kinni Mitsiphphaxxe dhooqa qico'n lolla'n shorrine, mitti manjinna lubboti gatebaang duuchchiinga kutti assine.9Iyyaasunna Duuchchi Woddiki Gootti ajajaxxa duuchchinixxa asse. Insa'neka fadhadonna mogolcha'ni fadhadiinxa gaaruwwanna gube bire.10Iyyaasunna illee iima higeexxi Hatsoorii'i lole injifate anga ibilse, moyanijokanna wolaantichchiki shiye. Eettene yanna'ni Hatsoriki moyanji ookkone baro'n hedhemmake wele bogike moyanjuwwi duuchchinaa'n hunnati sa'akemman11Isira'eelik loliinki manni Hatsoorike qachchi giddo hedhemmaka manna duuchcha wolaantichchiki shiye bire, lubboti gateeng hedhemmabaan, qachchakanna gunbe.12Duuchchi Woddike Goottik erganji Muuse ajajemmashshanni Iyyaasu konne'e qachchuwwa duuchcha anga ibilsexxi moyanjuwwa kanna wolaantichchiki shiye bire.13Kaddomalee Iyyaasunna isiki loliink manni Hatsoorike qachcha gadhi darre Isira'eelik koobbuwwate'n hedheeka qachcha gunbek hedhebaan.14Isira'eeliki ardi konne qachchuwwika horenna karra duuchcha boojine'a ifi'a adhdhine, manna kinni wolaantichchiki birre, mite manjonna lubboti gatinsebang shinne birre.15Duuchchi Woddik Gootti garbichcho ifika Muuse'e ajajemmashshanni Muusenna Iyyaasu'u ajaje; Iyyaasunna kulendemmashanni asse; Duuchchi Woddik Gootti Muuse'e ajajemmaxxe duuchchanaa'ni muuxebaangi mitte gatisexxi yaane hexxemmabaan.16Iyyaasu ookkone boga duuchcha koobatika boga Negeebii duuchcha, Gooshenika boga duuchcha, dhidhimi darrexxa gammoojje, Arebanna iittanni Isira'eelika boga suubbichchakanna gammoojjichcha boga bukki asse abixxe.17Iittanni Seyiiri qico'n marte geliteexxe Halaqixxe koobana'ni Herimonixxe kooba hunda Libaanoosixxe dhooqake Ba'aaligadike bogi qico'n hedheeka moyanjuwwa duuchcha booji'a'ni shiye bire.18Iyyaasunna konnee duuchchiinge moyanjuwwinn welt heddo wogga lolema'n tureeman.19Geba'oonike qachchaxxe Ewwitoxxe gosake arda male Isira'eelinn nage'iki weli aageki hedhemmabaani, wele qachchika arda lole'e abindemmakemman.20Konne qachchuwwiki ardi duuchchi mudaashsha, Duuchchi Woddik Gootti Isira'eeli lollaashsha godoba insa'neka jabeessemmaxxe'e Isira'eelik ardi mararte belo insa'ene bire. Tinninna Duuchchi Woddiki Gootti ediseenni Muuse'e ajajeemmake ajajamman.21Eettene yanna Iyyaasu isike loliinke manin welt duuleexxi Kebiroonike, Debirike, Anaabike koobatike qachchuwwainna Isira'eelikenna Yihudake koobacallike boga'n hedhammaka qerrarramma Anaaqixxa gosaka arda duuchchi bire. Iyyaasu konne duuchchiinga arda bire'e insa'en he'nemmaka qachchanna bakka balleesse.22Anaaqixxe gosana'ni shixxooki manni calli Gaazake, Gaatikenna Ashidoodike qachchuwwa'n gateeke male Isira'eelike bogi giddo lubboti gateek hedhemmabaan.23Duuchchi Woddik Gootti Muuse ajajemmashshanni Iyyaasu boga duuchcha anga iblse; mitte mittenge Isira'eelixxe gosake mini'a geyaaka qadaada qoode. Tennexxee Isira'eeliki ardinna bagedokenaa'n gate.The Word for the World International