Yoonaasikaa Raaga1
Yoonaasixxa Magenokee Ajajema Giba
1Duuchchi Woddik Gootti Amitaka belto Yoonaasii,2«Lumoke Neneweke qachcha'ni hedheeke mannixxi huje elobaaxxe kadde ane'n leellite'en; isexxe hiyyichcho anka hafuura gikki assite lassi» hiyye.3Yoonaasi kinni Duuchchi Woddike Gootti edii'ni Terseesi'a me'atee hede. Tennexxee Yoonaasi Iyyopheke qachchibaa goreexxi Tersesi'a me'ita'neexxa Lumoxxa Hobolo alfe; Lumoxxa Hobolo ajajammake manjichchi'a hasisaaka maallaqa uwwe ookko'a me'a'neeke manninn welti me'o'a gulufe, sila isixxe bado'ni Duuchchi Woddike Gootti edii'n miliqe gato'aatemman.4Duuchchi Woddik Gootti kinni jabaxxa diidallo ke'isse, tinni kexxeexxi jabaxxi diidallo Lumoxxa Hobolo enqitaa qico'n gelte.5Lumoxxa Hobolo gulufeemmaki manni duuchchi ifi finge Magenibaa raare; Lumoxxi Hobolo shollexxo'a hineexxi feenemmachcho abbaayyate'ni hunne. Konne wodda Yoonaasi Lumoxxe Hobolo giddo buttike golo'ni diiphee cokokki hiyyeemman.6Lumoxxa Hobolo ajajaammaki manjichchi Yoonaasibaa mareexxi «Koo ati hitta diiphphato? Dedha Mageni kadha atinxa inqo laqeexxi ba'nabe'noshsha no'o'a marare gargaaraxxe hexxeeni atika Mageno Soodati» hiyye.7Ookkone Lumoxxa Hobolo gulufeemmak manni duuchchi weli'anni weli «Tinni elobaaxxi yaane ayyixxe buutonni no'o'ni daggeexxa egennonaa mitte mitte no'onge'ni hixa ibinso» hine. Hixa ibinse wodda hixikinna Yoonaasi'n ibe.8Manni kinna Yoonaasii «Tinni yaane ayyixxe buutonni no'o'ni daggeexxa no'aa kuli ballo; habaa'ni daggete? Huje atixxi maachcho? Ilemi atiki habate? Gosa atixxi maye?» hine qorre.9Yoonaasinna hiisseexxi «Ani Ibirichchoken, aninna abbaayyatanna buttina dadeeka Duuchchi Woddika Gootta iimika Mageno magenoonfataannen» hiyye.10Yoonaasi edise haaso'emmake haaso'anaa'ni manni Yoonaasi Duuchchi Woddike Gootti edii'ni baqate me'aanke manjo kadeexxa egenne; tennexxee lumoshsha soodaateexxi «Mayee tennee assitette?» hiyye.11Lumoxxe Hobolo giddo ofo'leemmaki manni abbaayyatiki danbala'i itti jabaata'ni me'eemmaxxee'e «Kunni danbala'i sammi hiyyaashsha atee maa assinanno?» hiyye qorre.12Isinna hiisseexxi «Kunni lumooki danbala'i anxe buutonni ha'no'ni dageexxa ege'neennen; isexxee anee aaxxine abbaayya te'ne'ni hunne; danebala'ikinna sammi hiyyaan» hiyye hiisse.13Lumoxxi Hobolo me'itaashsha assammake haqichchiki wode'e udumi'a dhiinbaa'ni abbaayyati qarqara geesisate'e wo'laanne; kaddo malee'e danbala'iinxi hunna lumoshsha lebba'ni me'iteemmaxxee'e dandeennebaan.14Tennexxee insa'nenna «Ee Duuchchi Woddike Gootta no'okee ati eettettexxa assiteetten; konne balleessa afebaa manjo lubbo baxxaashsha assinonnole anga sa'e manjishsha assite no'o uuddoxxe. Ati eettettexxa assiteetaxxee'e qullitte munde dhangalaanseneshsha assite no'oo uuddoxxe» hina'ni Duuchchi Woddike Goottinba raarre.15Ookkonneechchinni udumi'a Yoonaasii wodi'i giddo hunne; abbaayyatik danbala'inna sammi hiyye.16Mannikinna lumoshsha assee Duuchchi Woddika Gootta sodaateexxi tolchakanna shiqise; werreegakanna Duuchchi Woddike Magenokee werreege.17Duuchchi Woddiki Goottinna Yoonaasii liqiinsitaaxxa qulxu'me qixxeesse; tennexxee Yoonaasi qulxu'metike godobi giddo sase hashshanna sase barra ture.The Word for the World International