Iyyoobikaa Maxaafa6
Iyoobii'i
1Ookkoneechchin uduma Iyyoobi hiyyee qici:2«Ani rakkatenne qicinna yadeenne qico minkeeleunda'nechcho kadee'naa uunida'neele3Silan abbaayyatike maanichchi irra a'uurantennexxeeten jaammi hiye'e haaso'enneki.4Duuchchiinxa dande'aaki Mageni Ifike mogiduwwinni anee oteenha'la konne mogiduuwwixxinna anike bisi giddo duuchcha facaateeni;bajabaja assaaki Magniinki ochchi ane'ni timeen.5Isi harre ittaaxxi badda'a heexxe'naa ha'issaa?Yookaani qotiyyichchi okee'i hedhee'naanni itaachi'a barooda?6Bushaxxa ita maxine ugginebaaki inda?Yookaani quuphphi giddiki wodi'i xe'ma?7Iitta hexxeexxa ita cori ane'e gibisaitonnoolenna ela gophisa.8«Soodachcho anixxa laqee Mageni,halchennelchcho ani'a uwweele,9Mageni anee balleesseele,hedho anixxa kute'e qurubbi asseele,eeyyannani!10Konne woyyichchika hiyyichcho giba gophaannaxxeefeetee qiconna rakko ane'e'ni bira saxxeelennagammada'n uutaalannani.11«Maa uduuda afenneke hedhoti hedhanno hiya'enne?Maa hedhaanneki bari gatee'na osaa'enne?12Ani kinjoke odo'weenne?Yookini bisi sageettoti sbiljke?13Ani ifi kiphanno hiyaannoxxi hunna hexxebaani,afeennaxxi hunna ani giddii'ni xo'o hiteeni.14«Sinsino'e jaalo ifika gibaaki manjji,Mageno sodaata waaleke manjoni.15Anki jaaluwwi kinni burqe bagamma burqike wodi'ishsha,adaachchisaakebaan16Haarsixxa yanna konne wode'ekaadee baqaqe'naa hu'nusso'aan,17Boni daga wodda kinni baqe baxxaanilagi bage'e (duwwitti) gataan.18Gaaluuwwa fe'edhe ora me'ammaki manniorri'ni gore'e wodee hasito gammoojje qiilla giddo doonsakiyya hiya'nee reyaani.19Ora me'ammaki Teema hinaake bogiki manni wodee hasito dagaani,Saabake bogixxi dadaaltuwwanna wodi'i hedheeshsha adattani.20Addanteemmaki wodi'i baggee'na'a anfaa wodda mekki hina'ni;eettene bakkaba'anna gennaa wodda aarre bojogemmaan.21Ha'no ani'a ookkone bage gatemmake wodi'ishshaten;anee'ni gelteexxa rakkonna abara uuddinee alaltineen.22Egedhdhi isi ani konnechcho ani'a uwweyookaani karra ha'nooxxeni anee lubbo hirre hiyyeenna?23Yookaani naphiinxe anganaa'ni anee woddeyookaani miicammake mannixxe anee gatisee hiyyeene?24«Deedhi hujenneki heedhe?Ane'ni kulle ani sammi hiyyannoni.25Dhugaatiki hiyyichchi auroolenna aannete afeen!Ha'nooki haaso'i kinni mittilchi'aanna woyi fuleekebaan26Haaso'a anika afo'oke'n xixxinaa?Anee konnee hoophpholeenneke manjichchika haaso'a diidallotishsha uddineen.27Annanna ama afebaake belto'ni ha'no weli'an weli hixa ibirsitinaan,ifi'a duroondino'a jaaluwwa ha'nooka gurgudhdhitnoo'a gadhaffissinaan.28«Ballo'o alba anika uuddeha'no edo dhara haaso'anno?29Balesitine'enita'ana waale; ane'ni mitti dedhi hedhebaxxa ege'ne30Anke afo'ona'ini fugoxxi fulide'eani dharanna dhuuga garigari ase'e egenebo'no hiyyote?The Word for the World International