Eermiyaasikaa Raaga52

Iyyerusaalemixxa Iba

1Sedeqiyaasi moyaa wodda lame tommenna mitte woggamman; Iyyerusaalemi'ni tommenna mitte wogga moye; ama isixxiki summinna Amixaalite hiyyenda'emman; isenna Libiinake bogike manjixxe Ermiyaasixxe beltomman.2Sedeqiyaasi Iyyo'aaqemi assemmashshanni Duuchchi Woddike Gootti edo elobaaxa yaane isinna asse.3Duuchchi Woddiki Gootti Iyyerusaalemi'inna Yihuda'ni tennee duuchcha geessiseelchinna muuxamake'n isi edo insa'nee balleesseelch mufatemmaxxeetemman.
Sedeqiyaasinni Baabiloonike moyanjo'n jalle.
4Tennexxee Sedeqiyaasi moyeexxe sallaneessoxxe wogga'n tommeesoke agenjo'n, tommeessoxxe barra'nni, Baabiloonik moyanji Nabuukadanatsoori ifika sannachchuwwa duuchcha ka'lisheexxi Iyyerusaalemi'a duule; qachchakanna buqe; qarqarake'ninna buttin iimi'a tullube.5Qachchikinna moyanji Sedeqiyaasi moyeexxe tommenna taakkeessoke moyetike bariqico'n buqendeemman.
6Sholgeessoke agnjixxe sallaneessoxxe barra'n qachchi giddo beeli itti jabaate hedhemmaxxee; ardi itaachcho gopheexxi:7Qachchiink dalla'i enqeme; sannachchi duuchchi edii'ni baaje. Baabilooniki manni qachchin qarqara he'noolenna, moyanjinke hiddichchuwinke boonchi bira lame dalla'ixxe oddo'ni hedheeke cufaniba hashshunte qachcha waaleexxi baanje; Araba'ana ke'ne me'ine.8Yaane kinn Baabiloonike mannik sannachchi moyanji Sedeqiyaasi duuka shorra'n mareexxi Iyyaarikoke diidiba dhaqqabe; loliink isiki manni duuchchinna isiba'n gargarti he'nee'na, moyanjo abixxine.
9Isinna Hamaatike boga'ni Ribla hedheeke Baabiloonike moyanjiba adheme; Baabiloonik moyanjinna ookkone iso'ni mure.10Ribla Baabiloonike moyanjo, Sedeqiyaasixxa labbaxxa oose annini edo gorra'e; ittann Yihudaka jalqabuwwa duuchcha shiye;11Okkoneechchi uduma Sedeqiyaasixxa illuwwa giddii'n fulche; sageettotike sibljike haachchabin usureexxi Baabilooni'a adhdhe me'e; ookkona reyaaxxe barraqico'n usurii mine'ni turse.

Woyyichchi Galmxa Findigensha

12Baabilooniki moyanji Naabukadanatsoori moyeexxe tommenna sallanixxe wogga'n ondesoke agenjixxe tommeessoxxe barra'n, Baabiloonik moyanji mootummatike minike heqqanjike ajajallo kadeek Nabuzardaan Iyyerusaalemi dage.13Duuchchi Woddike Goottik galminna, moyajiink mootetik mini ittanni Iyyerusaalemi hedhemmaka minuwwa duuchcha giirat gube. Wele kinoti ijaaremeeka qeeraramma minenna giirat kutti asse.14Mootummatika mine heqqammake ajajalli hunda hedhemmaki Baabiloonike manniki sannachchuwwi duuchchi Iyyerusaalemike qarqara'n hedheeka dalla'a duuchcha diinge birre.15Mootummatike miniki heqqanjik ajajalli Nabuzerdaan mitte mitte hiyyeeyyenna qachchi giddo gateeki ardi, angatixxa oge afemmaka mannanna baaje Baabiloonike moyanjiba shiqeekara adhdhe me'e.16Yaane kinni mootummatike miniki heqqanjuwwik ajajalli Nabuzerdaan wele bogi giddo hiyyeeyye kade hedhemmaka woyine kansaashshann fichcha huccinaashsha ookkone gatilse.
17Baabiloonik manni Duuchchi Woddike Goottike galmi giddo hedhammaka sibiljiinxe sageettoka utuphuwwa, elqenna kayya hiisa'neeka ofo'lisanjuwwanna sibljinxe sageeton hunje'eka wode'iinka gonga enqine butuchchine; sageetto duuchcha Baabiloonike moyanjba aa'ne me'ine.18Konneechchuwwi gadho odo'wa, hixaana guphphinammaxxa galuwwa, sibiljiinka hubura, akkaafiinsha hedheeka faafasunjo, mooqquwwa galmi giddo la'oonfattammaka sageettotike sibiljika miyuwwa duuchcha adhdhine.19Mootummatika mine heqqammak ajajalli ca'itte worqeninna ca'itte sibiljo birrenn hujemeeeka miyuwwa duuchcha hubbuqqitte qore, hixaana gunbammalchuwwa, sibiljiinika hubura, torbaane dhankoka xasiika ofe'lemalcho, ba'laxxa mooqqonna tolcha shqinshaaxxa qoruwwa kaddaaxxa qallasuma duuchcha adhdhine me'ine.
20Moyanji Solomooni Duuchchi Woddike Goottike galmi'a sibiljo birren hujisemmaxxi; lami utuphuwwa, lumoke wode'iink gongi, isi hundii'ni hedheeki tommenna lami jibootinna elqenna kayya higaak ufo'lisanjuwwik a'urrinna kiilotixxe mike iima;21Mitti mitting utuphuwwiinki qephphinni tommenna saddeeta ciqilen; kasi kasii'n tommenna lame ciqilemman; oddo duwwi hedhemmaxxe'e mitti mitting ba'linni furdinni shoole taakkomman.22Mitte utuphiin umi hana tuulende hexxeexxi sageetto sibiljiinxi ejuma onde ciqile kadaa wodda qarqara duuchcha'n Roomaanixxa bifa afeeka sibljo sageettotixxi gargar hexxeexxi elolla bifa afeemmakemman; weli utuphi Roomaanixxe gargar hexxeexxa bifa afeenn hedhe konnen wele fakkaataamman.23Gadhi darree'ni sallane tommenna jaani Roomaanuwwa farri hite leellitaa wodda; qarqarake'ni hexxe biifa'neexxi iimi darre hexxeexxe Roomaanuwwik laakkossi mitte dhibbamman.

Yihudk Ard Babilooni'a Adhdhemeexxa

24Mootummatika mine heqammake ajajalli qeesooletik sooreessa kadeemmak Serayaani, langaba iitti aane'eka qeesichcho Sofooniyaasiinna sasiinga cufana heqqammakara usureexxi adhdhe me'e:25Qachchi giddo gateeki ardi lolammake mannike sooreessa kade'emmaka ajajallo, torbaaniinga moyanjuwwika gorsalluwwa bogi giddike ardi giddii'n loliinke'e kadaaka manna fi'leemmaka ajajallo, borreessanjokanna qachchuwwi giddo leelleeka wele jaane tomme manna aadhdhe.26Mootummatika mine heqqammak ajajalli Nabuzardaan konnee manna duuchcha aadheexxi Baabiloonike moyanji hedhemabaa'a Ribla'a adhdhe dage.27Moyanjikinna Hamaatike boga'ni anfeeke Ribla hiyyemaaba shinne birre.
Konne qicini Yihudaanna ifike boganaa'ni booji'ende adhdhende.
28Naabukadanatsoori booji'exxi adhdhemmake manniki laakkossi konneechchi butta hedheen:
Moyeexxe torbaaxxe wogga'n, Sase kumanna leme tommena sase Ayihudiinka manna;
29Naabukadanatsoor moyeexxe tommenna Saddeetixxe wogga'n, saddeeta dhibbanna sase tommenna lame manna Iyyerusaalemii'n;30Naabukadanatsoori moyeexxe lame tommenna sase wogga'ni, mootummatike minike heqqanjik ajajallo Naabuzerdaan Torbaane dhibbanna shoole tommenna onde Ayihudiinka manna boji'e adhdheen; Laakkossi insa'neekinna shoole kumanna jaane dhibba mannamman.

Yu'aakinixxa Tikensha

31Yihudaki moyanji Ikooniyaani booji'emeexxe sase tommenna torbaxxe wogga'ni, Yoormaroodeki Baabilooni'n moye; tenne wogga'ni tommenna langake agenjo'ni lame tommenna ondixxe barra'ni Yihudak moyanji Ikooniyaani'i hede; usuriinke minenaa'inna iso'o tikise.32Eloke hiyyichchinn isoo yaansise; ifi bira Baabilooni booji'eme hedhemmake moyanjuwwi iimi darre ulfini booncho'ni iso'o ugge.33Yu'akiini usurii mine'n hedhemma wodda oddo'wammaxxa semma fulchedhe hune; lubboti hedhee bariqico duuchcha'n moyanjiinxe qorenaa'n itaake kade.34Baabiloonik moyanjinna Yu'akiini reyaaqico'n, lubboti hedheek baro duuchcha'n kuta belo barra barra'inna itaacho isi'a uwwaamman.

The Word for the World International

https://app.library.bible/content/2b894378475c6aea